Muleafwa Abasambi ba Baibo pa Kuti Balesalapo Ukubombela Yehova

1-2. (a) Cinshi cilenga abasambi ba Baibo bamo baleshingashinga ukusalapo ukulabombela Yehova? (b) Finshi twalasambililapo muli cino cipande?

BUSHE mwalishingashingilepo ukuba Inte ya kwa Yehova? Nalimo mwaletiina ukuti abo mwalebomba nabo, abali ifibusa fyenu nelyo balupwa lwenu bali no kumufulilwa nga mwaba Inte ya kwa Yehova. Nangu mwalemona ukutila te kuti mukumanishe ukukonka amafunde ya kwa Lesa. Ifi nga e fyo cali, ninshi kuti mwaishiba ifyo abasambi ba Baibo bomfwa, kabili kuti mwaishiba ne cilenga cilebakosela ukusalapo ukubombela Yehova.

² Yesu alishibe ukuti ifintu fya musango uyu, kuti fyalenga umuntu afilwa ukulunduluka mu fya kwa Lesa. (Mat. 13:​20-22) Nomba talekele ukwafwa abaleshingashinga ukuba abasambi bakwe. Mu fyo alecita na mu fyo alelanda, alilangile abasambi bakwe ifya kwafwa abashingashinga ukulunduluka pa kuti, (1) baleishiba ifilelenga belalunduluka, (2) baletemwa sana Yehova, (3) baleishiba ifyo balingile ukubikako sana amano na (4) baleishiba ifya kucimfya amafya. Kuti twacita shani pa kuti tulekonka ifyo Yesu asambilishe abasambi bakwe ilyo tulesambilisha abasambi ba Baibo mu citabo citila Kuti Mwaba ne Nsansa Umuyayaya! pa kuti basalepo ukulabombela Yehova?

MULEAFWA UMUSAMBI WA BAIBO PA KUTI ESHIBE IFILELENGA ELALUNDULUKA

3. Cinshi nalimo calengele cikosele Nikodemo ukuba umusambi wa kwa Yesu?

³ Nikodemo uwali pa ntungulushi sha baYuda ishalumbwike, na o wine calimukosele ukusalapo ukuba umusambi wa kwa Yesu. Ilyo papitile nalimo imyeshi 6 ukutula apo Yesu atendekele ukubomba umulimo wa kubila imbila nsuma, Nikodemo alilwike ukuti Lesa e watumine Yesu pano isonde. (Yoh. 3:​1, 2) Na lyo line, Nikodemo asalilepo ukuyamona Yesu mu bumfisolo pantu ‘aletiina abaYuda.’ (Yoh. 7:13; 12:42) Nalimo aletontonkanya ukuti nga aba umusambi wa kwa Yesu, bali no kumupoka icifulo kabili tali no kutwalilila ukukwata icuma cakwe cimo.a

4. Bushe Yesu ayafwilishe shani Nikodemo pa kuti eshibe ifyo Yehova alefwaya ukuti acite?

⁴ Nikodemo alishibe Amafunde, lelo alingile ukwishiba ifyo Yehova alefwaya ukuti acite. Bushe Yesu amwafwile shani? Ali-itemenwe ukumwafwa nangu ca kuti bwali bushiku. Na kabili Yesu alyebele Nikodemo bwino bwino ifyo alingile ukucita pa kuti engaba umusambi wakwe. Amwebele ukuti alingile ukulapila, ukubatishiwa no kutetekela Umwana wa kwa Lesa.—Yoh. 3:​5, 14-21.

5. Kuti twacita shani pa kwafwa umusambi wa Baibo pa kuti eshibe ifilelenga elalunduluka mu fya kwa Lesa?

⁵ Nangu ca kuti umusambi wa Baibo alishiba bwino Amalembo, nalimo mulingile ukumwafwa pa kuti eshibe ifilelenga elalunduluka. Pa mulandu ne ncito abomba, nelyo nga ca kuti balupwa lwakwe balemukaanya ukuba Inte ya kwa Yehova, kuti afilwa ukufikilisha ifyo apanga ukucita mu fya kwa Lesa. Kanshi mulekwatako inshita ya kwafwa umusambi wenu. Nalimo kuti mwamwita ku ng’anda ku mwenu pa kuti mwisheko nankwe. Nga mwacita ifi, nalimo kuti camwangukila ukumwebako amafya ayo akwata. Mulekoselesha umusambi wenu ukuti afwile ukwalukako muli fimo, kabili mulemwibukishako ukuti ico alecitila ifi, ni co alefwaya ukusekesha Yehova, te kufwaya ukusekesha imwe.

6. Kuti mwa-afwa shani umusambi wa Baibo pa kuti ashininkishe ukutila kuti akumanisha ukukonka ifyo alesambilila? (1 Abena Korinti 16:13)

⁶ Nga ca kuti umusambi wa Baibo ashininkisha ukuti Yehova akalamwafwa pa kuti alecita ifyalungama, cikalamwangukila ukulakonka ifyo asambilila. (Belengeni 1 Abena Korinti 16:13.) Umulimo wenu kuti twaulinganya ku mulimo wa kwa kafundisha. Ilyo mwali ku sukulu, ni kafundisha wa musango shani mwatemenwe sana? Nalimo kafundisha uo mwatemenwe sana ni ulya uwalemutekanishisha ilyo alemweba ukutila kuti mwakumanisha ukwishiba ifyo alemusambilisha. Ifi fine e fyo no usambilisha bwino Baibo alingile ukulacita. Tafwile ukulasambilisha fye umusambi ukuti alingile ukulacita ifyo Lesa afwaya, lelo afwile no kulamweba ukuti Yehova nga amwafwa, kuti ayaluka. Kuti mwacita shani pa kuti mulecita ifi twalandapo?

MULEAFWA UMUSAMBI WENU UWA BAIBO PA KUTI ATEMWE YEHOVA

7. Bushe Yesu ayafwile shani abasambi bakwe pa kuti batemwe Yehova?

⁷ Yesu alishibe ukuti abasambi bakwe nga batemwa Lesa, bali no kulakonka ifyo alebasambilisha. Ilingi line alebasambilisha ifyali no kulenga batemwa sana Shibo wa ku muulu. Ku ca kumwenako, Yesu alingenye Yehova ku mufyashi umwaume uupeela abana bakwe ifintu ifisuma. (Mat. 7:​9-11) Bamo pa bo Yesu alesambilisha nalimo tabakwete bashibo ababatemenwe. Elenganyeni ifyo baumfwile ilyo Yesu alandile icilangililo ca mufyashi umwaume uwapokelele umwana wakwe umwaume ilyo abwelele pa ng’anda nangu ca kuti alicitile ifintu ifingi ifyabipa. Cilya icilangililo Yesu alandile, calengele abantu baishiba ukuti Yehova alitemwa sana abantu kabili alafwaya ukubafwa.—Luka 15:​20-24.

8. Kuti mwacita shani pa kuti mulenge umusambi wa Baibo atemwe sana Yehova?

⁸ Na imwe bene kuti mwalenga umusambi wenu atemwa sana Yehova nga ca kuti ilyo mulemusambilisha, mulelanda sana pa mibele ya kwa Lesa. Ilyo mulemusambilisha, mulelenga amona ukuti ifyo alesambilila fyalyampana ne fyo Yehova atemwa abantu. Ilyo mulemusambilisha pa cilubula, mulekomaila pa fyo icilubula cakuma uo mulesambilisha. (Rom. 5:8; 1 Yoh. 4:10) Umusambi wa Baibo kuti atemwa sana Yehova nga atontonkanya pa fyo Yehova amutemwa.—Gal. 2:20.

9. Finshi fyalengele ba Michael baaluke, batampe no kubombela Yehova?

⁹ Natulandeko pali ba Michael aba ku Indonesia. Ilyo balekula, balebasambilisha icine, lelo tababatishiwe. Ilyo bafishishe imyaka 18, baile ku calo cimbi uko baile mu kubomba umulimo wa bunamutekenya. Pa numa, balibwelele ku Indonesia mu kuupa. Lyena balishile abena mwabo no mwana wabo umwanakashi no kubwelelemo ku calo uko balebombela. Ilyo ba Michael bali kuli ico calo, abena mwabo no mwana wabo balitendeke ukusambilila Baibo kabili balekonka ifyo balesambilila. Ilyo banyinabo bafwile, balibwelelemo ku Indonesia mu kusunga bashibo, kabili balisumine ukutampa ukusambilila Baibo. Ilyo balesambilila mu cipande citila “Sambililenipo na Fimbi” mwi sambililo 27 mu citabo citila Kuti Mwaba ne Nsansa Umuyayaya!, ifyo basambilile fyalibafikile sana pa mutima. Ilyo ba Michael batontonkenye sana pa fyo Yehova aumfwile ilyo amwene Umwana wakwe alecula, balililile. Ba Michael batendeke ukutasha sana Yehova na Yesu pa cilubula. E ico balyalwike kabili balibatishiwe.

MULEAFWA UMUSAMBI WENU PA KUTI ALEBIKA SANA AMANO KU KUBOMBELA YEHOVA

10. Cinshi Yesu acitile pa kuti abasambi bakwe baaluke, balebombela sana Yehova? (Luka 5:​5-11) (Moneni ne cikope.)

¹⁰ Bamo pa babalilepo ukuba abasambi ba kwa Yesu balilwike bwangu bwangu ukuti Yesu e wali Mesia, lelo balingile ukwishiba ukuti umulimo uo balingile ukubikako sana amano, mulimo wa kubila imbila nsuma. Ilyo Yesu aebele Petro na Andrea ukuti balebomba nankwe inshita yonse, ninshi baliba kale abasambi bakwe. (Mat. 4:​18, 19) Petro na Andrea balebombela pamo na Yakobo na Yohane umulimo wa bulondo, kabili uyu mulimo wale-enda bwino sana. (Marko 1:​16-20) Ilyo Petro na Andrea ‘bashile amasumbu yabo,’ bafwile balipekenye ifyo bali no kulasakamana indupwa shabo ilyo balebomba na Yesu inshita yonse. Cinshi calengele baitemenwe ukuleka ubulondo? Mwi buuku lya kwa Luka, Baibo itweba ukuti Yesu alicitile icipesha mano icalengele bashininkishe ukuti Yehova ali no kulabasakamana.—Belengeni Luka 5:​5-11.

11. Finshi twingashimikilako umusambi pa kuti tukoshe icitetekelo cakwe?

¹¹ Kwena te kuti tucite ifipesha amano nga fintu Yesu alecita. Lelo kuti twalaebako abasambi ba Baibo ifyo Yehova afwa abantu ababika sana amano ku kumubombela. Ku ca kumwenako, bushe mulebukisha ifyo cali ilyo mwatendeke ukulongana? Nalimo mwalingile ukulanda na bamwingishe incito ukuti tamwali no kutwalilila ukulabomba na pa numa ya kwinuka pantu mwalingile ukulaya mu kulongana pali iyo nshita. Ilyo muleshimikilako umusambi wenu ifyo Yehova amwafwile, mulemwebako ne fyo icitetekelo cenu cakosele ilyo Yehova amwafwile, pa mulandu wa kuti mwalisalilepo ukulamubombela.

12. (a) Mulandu nshi tulingile ukulasendelako aba bwananyina abalekanalekana ilyo tuleya mu kusambilisha umusambi? (b) Kuti mwabomfya shani amavidio pa kuti musambilishe bwino umusambi? Landeni pa ca kumwenako.

¹² Na kabili, umusambi wenu uwa Baibo kuti asambililako fimo nga ca kuti bamunyinefwe na bankashi bamwebako fimo ifyo ba-alwileko pa kuti balebika sana amano ku kubombela Yehova. E ico mulesendako aba bwananyina abalekanalekana ilyo muleya mu kumusambilisha. Mulebeba ukuti bamushimikileko ifyo basambilile icine ne fyo bacitile pa kuti balebika sana amano ku kubombela Yehova. Ilyo mulesambilisha umusambi mu citabo citila Kuti Mwaba ne Nsansa Umuyayaya!, mulekwatako inshita ya kutamba amavidio ayaba mu cipande citila “Sambilileni na Fimbi” e lyo na yaba mu cipande citila “Ishibilenipo na Fimbi.” Ku ca kumwenako, ilyo mulesambilila isambililo 37, kuti mwalanda sana pa fishinka ifyaba muli vidio iitila Yehova Akulatupeela Ifyo Tukabila.

MULEAFWA UMUSAMBI WENU PA KUTI ALEISHIBA IFYA KUCIMFYA AMAFYA

13. Finshi Yesu aebele abasambi bakwe?

¹³ Pa miku iingi Yesu aebele abasambi bakwe ukuti abantu bali no kulabacusha. Pa bali no kulabacusha pali no kuba na balupwa lwabo. (Mat. 5:11; 10:​22, 36) Ilyo Yesu ali mupepi no kufwa, aebele abasambi bakwe ukuti bali no kubepaya pa mulandu wa kuti balepepa Yehova. (Mat. 24:9; Yoh. 15:20; 16:2) Abakonkomeshe ukuti balingile ukuba abacenjela ilyo balebila imbila nsuma. Ku ca kumwenako, abebele ukuti tabalingile ukulaumana no muntu onse uwalebasuusha pa fyo basuminemo, no kuti balingile ukuba abacenjela pa kuti batwalilile ukubila imbila nsuma.

14. Kuti twacita shani pa kuti umusambi eshibe ifya kucita pa kucimfya amafya ayo engakwata pa mulandu wa kuti alesambilila Baibo? (2 Timote 3:12)

¹⁴ Nga filya fine Yesu acitile, na ifwe bene kuti twalondolwela umusambi ifyo abo abomba nabo, ifibusa fyakwe na balupwa lwakwe bengamweba nelyo ifyo bengamucita pa mulandu wa kuti alesambilila Baibo. (Belengeni 2 Timote 3:12.) Bamo abo abomba nabo, kuti balamuseka pa mulandu wa kuti nomba alekonka ifyo alesambilila mu Baibo. Na kabili, abantu bambi, kumo fye na balupwa lwakwe kuti balemusuusha pa mulandu ne fyo asuminamo. Nga twa-afwa bwangu abasambi pa fyo bengacita pa mafya ayo bengakwata pa mulandu wa kuti balesambilila Baibo, bakeshiba bwangu ifya kucita pa kucimfya ayo amafya.

15. Finshi umusambi wa Baibo afwile ukucita nga ca kuti balupwa lwakwe balemukaanya ukusambilila Baibo?

¹⁵ Nga ca kuti abalekaanya umusambi ukusambilila Baibo ni balupwa lwakwe, kuti mwamweba ukuti atontonkanye pa filengele balemukaanya. Nalimo icilengele balemukaanya ni co balemona ukuti ba Nte balemusambilisha ifya bufi. Nelyo ni co bamona Inte sha kwa Yehova ukuti bantu ababi. Nangu fye ni balupwa lwa kwa Yesu bamo tabatemenwe ifyo alecita. (Marko 3:21; Yoh. 7:5) Mufwile ukusambilisha umusambi wenu ukuti alingile ukuba uwatekanya kabili uwa cikuuku ilyo alelanda na balupwa lwakwe na lintu alelanda na bantu bambi.

16. Kuti twacita shani pa kuti umusambi eshibe ifya kulanshanya bwino na balupwa lwakwe pa fyo asuminamo?

¹⁶ Nga ca kuti balupwa lwa musambi balefwaya ukwishibilapo na fimbi pa fyaba mu Baibo, tafwile ukubalondolwela ifintu ifingi pa muku umo. Pantu nga abalondolwela ifintu ifingi pa muku umo, ifyebo kuti fyabafulila ica kuti te kuti bafwaye ukulanshanyapo nankwe na kabili. E ico mufwile ukweba umusambi ukuti alingile ukulanshanya fye nabo ifintu ifinono, pa kuti ne nshita imbi bakafwaye ukwishibilapo na fimbi. (Kol. 4:6) Nalimo cimo ico engacita kweba balupwa lwakwe ukuya pa webusaiti yesu iya jw.org. Nga baya pali iyi webusaiti, kuti baishibilapo ifingi pa Nte sha kwa Yehova, kabili kuti babelenga ifyebo mu mutima nteka.

17. Kuti mwacita shani pa kusambilisha umusambi wenu ifya kwasuka abantu aba kuti nalimo tabaishiba icine pa Nte sha kwa Yehova? (Moneni ne cikope.)

¹⁷ Nalimo kuti mwalanshanya no musambi ifyaba mu cipande citila “Amepusho Abantu Bepusha Sana pa Nte sha kwa Yehova” icaba pa webusaiti yesu iya jw.org pa kuti eshibe ifyo engasuka amepusho ayo balupwa nelyo abo abomba nabo bengamwipusha. (2 Tim. 2:​24, 25) Pa mpela ye sambililo limo na limo mu citabo citila Kuti Mwaba ne Nsansa Umuyayaya!, mulepituluka mu cipande citila “Abantu Bamo Batila.” Mulekoselesha umusambi ukuti alepituluka mu fyo engasuka mu mashiwi yakwe. Mwilashingashinga ukumwebako ifyo engalondolola bwino ifyo asuminamo. Nga mulepitulukamo nankwe ifyo engasuka, akaba uwashipa ilyo akalalondolwela abantu ifyo asuminamo.

18. Finshi mwingacita pa kuti umusambi atendeke ukwebako abantu ifyo asambilila mu Baibo? (Mateo 10:27)

¹⁸ Yesu akoseleshe abasambi bakwe ukulabila imbila nsuma ku bantu. (Belengeni Mateo 10:27.) Umusambi nga atendeka bwangu ukwebako abantu ifyo asambilila mu Baibo, akeshiba bwangu ukuti alingile ukushintilila pali Yehova. Kuti mwacita shani pa kuti umusambi wenu atendeke bwangu ukwebako abantu ifyo asambilila? Nga babilisha mu cilonganino ukuti kuli no kuba kampeni ya kubila imbila nsuma, kuti mwaeba umusambi ukuti atontonkanye pa fyo engacita pa kuti afikepo ukuba kasabankanya. Mulondolweleni ico abengi bamwena ukuti calyanguka ukutendeka ukubila imbila nsuma nga ca kuti kuli amakampeni ya musango uyu. Na cimbi icingamwafwa, kutendeka ukulandako amalyashi mu kulongana kwa mu kati ka mulungu. Nga atampa ukulandako amalyashi, akasambilila ifya kulondolola ifyo asuminamo ukwabula umwenso.

MULELANGA UMUSAMBI WENU UKUTI MWALIMUCETEKELA

19. Bushe Yesu alangile shani ukuti alicetekele abasambi bakwe, kabili na ifwe kuti twacita shani pa kuti tulemupashanya?

¹⁹ Ilyo Yesu ashilabwelelamo ku muulu, aebele abasambi bakwe ukuti bushiku bumo bali no kuba nankwe na kabili. Nomba tabaishibe ukuti alepilibula ukuti bali no kuya ku muulu. Na lyo line, Yesu abikile amano ku fyo bali ne cishinka, te ku fyo baletwishika. (Yoh. 14:​1-5, 8) Alishibe ukuti palingile ukupita inshita pa kuti beshibe ifintu fimo, pamo nga isubilo lya kuya ku muulu. (Yoh. 16:12) Na ifwe bene kuti twalanga abasambi besu ukuti twalishiba ukutila balafwaya ukucita ifyalungama.

20. Bushe nkashi Chifundo alangile shani ukuti alicetekele umusambi wakwe uwa Baibo?

²⁰ Na ifwe bene kuti twatwalilila ukucetekela ukuti abasambi besu balafwaya ukucita ifyalungama. Natulandeko pali nkashi Chifundo uwa ku Malawi. Nkashi Chifundo atendeke ukusambilisha umukashana Alinafe mu citabo citila Kuti Mwaba ne Nsansa Umuyayaya! Uyu mukashana alepepa ku Katolika. Ilyo bapwishishe ukulanshanya ifyaba mwi sambililo 14, nkashi Chifundo aipwishe Alinafe ifyo aletontonkanya pa kubomfya ifimpashanya mu kupepa Lesa. Alinafe alikalipe kabili aebele nkashi Chifundo ati, “Nga ndefwaya kuti nabomfya ifimpashanya pa kupepa Lesa!” Nkashi Chifundo amwene ukuti nalimo Alinafe ali no kuleka ukusambilila Baibo. Lelo alitwalilile ukumusambilisha, alemutekanishisha pa kumusambilisha, kabili alesubila ukuti Alinafe ali no kwishiba icine pa kubomfya ifimpashanya mu kupepa Lesa. Ilyo papitile imyeshi iinono, nkashi Chifundo alipwishe Alinafe icipusho icaba mwi sambililo 34 icitila: “Ukutula apo mwatendekela ukusambilila, busuma nshi mwasanga mu kusambilila Baibo na mu kwishiba Lesa wa cine, Yehova?” Nkashi Chifundo alilandile ifyo Alinafe ayaswike. Atile: “Alinafe alilandile ifintu ifingi ifisuma. Cimo pa fyo alandile ca kuti Inte sha kwa Yehova tabacita ifintu ifyo Baibo yalanda ukuti fyalibipa.” Tapakokwele, Alinafe alilekele ukubomfya ifimpashanya mu kupepa Lesa, kabili alibatishiwe.

21. Kuti twacita shani pa kuti umusambi asalepo ukulabombela Yehova?

²¹ Nangu ca kuti Yehova e ulenga abasambi balelunduluka mu fya kwa Lesa, na ifwe bene twalikwata umulimo wa kubafwa pa kuti balelunduluka. (1 Kor. 3:7) Tatupelela fye pa kumusambilisha ifyo Lesa afwaya ukuti alecita. Lelo tulamwafwa pa kuti atemwe sana Yehova. Na kabili tulamukoselesha pa kuti eshibe ifyo alingile ukubikako sana amano pa kuti alelanga ukuti alitemwa sana Yehova. Tulamusambilisha ne fyo engacita pa kuti aleshintilila pali Yehova nga akwata amafya. Nga twalanga umusambi ukuti twalishiba ukutila kuti acita ifingalenga Yehova asekelela, kuti asalapo ukulamubombela.