Kasambilisha Wesu Uwapulamo Alitusambilisha Ifintu Ifingi

ABAFYASHI BANDI BALI-IPEELESHE PA KUTI BALEBOMBELA YEHOVA

Ku kupwa kwa mwaka wa 1950, abafyashi bandi balikuukile ukufuma ku Italy no kuya kwi tauni lya Kindersley, mu citungu ca Saskatchewan, ku Canada. Tapakokwele, balisambilile icine kabili bonse mu lupwa, twabikile sana amano ku kubombela Yehova. Ndebukisha ilyo nali umwaice, twalebila sana imbila nsuma. E ico inshita shimo nga ndesekesha nanda nati, nalibombeleko bupainiya bwa kwafwilisha ilyo nali ne myaka 8!

Abafyashi bandi bali bapiina, lelo baleipeelesha pa kuti balebombela Yehova. Ku ca kumwenako, mu 1963 balishitishe ifipe ifingi pa kuti bakwate indalama sha kwendela pa kuya mu kulongana kwa citungu ukwa abantu abafumine mu fyalo ifingi. Uku kulongana kwabelele ku Pasadena, mu California, ku U.S.A. Mu 1972 twakuukile ku Trail, mu British Columbia, mu Canada mwine. Ukufuma uko twaleikala ukufika uko twakuukile, palepa amakilomita nalimo 1,000. Icalengele tukuukile kulya, ni co twalefwaya ukulabila imbila nsuma ku bantu abalelanda iciItalian abaleikala muli ilya ncende. Batata balebomba umulimo wa kuwamya mu fikuulwa. Pa mulandu wa kuti balefwaya sana ukulabika amano ku kubombela Yehova, balekaana nga babapeela icifulo ca pa muulu.

Ndatasha sana pa fyo abafyashi bandi balecita pa kuti ine na bana banandi batatu tulebika sana amano ku kubombela Yehova. Ku bafyashi bandi eko nabalilepo ukusambilila ifya kubombela Yehova. Balinsambilishe icintu icacindama ico nshalaba ukufika na lelo, ica kuti nga nabika Ubufumu pa ntanshi, Yehova akulansakamana.—Mat. 6:33.

NATENDEKA UMULIMO WA NSHITA YONSE

Mu 1980 nalyupile Debbie, nkashi umusuma uwabikile sana amano ku kubombela Yehova. Apo twalefwaya ukutendeka ukulabomba umulimo wa nshita yonse, umwina mwandi alitendeke bupainiya bwa nshita yonse ilyo papitile imyeshi itatu ukutula apo twaupanine. Ilyo papitile umwaka umo ukutula apo twaupanine, twakuukile mu cilonganino umwali fye bakasabankanya abanono. Na ine nalitampile bupainiya.

Ilyo papitile inshita, twalifuupwike kabili twalefwaya ukufuma muli ici cilonganino. Nomba ilyo tushilafumamo, twalyebeleko kangalila wa muputule. Atwebele ati: “Na imwe bene ifyo mulecita filelenga ifintu fyabipilako. Mulebika fye amano ku mafya ayo mulekwata. Nomba nga mwabika amano ku fisuma ifyo aba bwananyina bacita, mukaba ne nsansa.” Ali ne cikuuku pa kutufunda, lelo tatupitile mu mbali. Ifi atwebele e fyo twalingile ukucita. (Amalu. 141:5) Ilyo line twalikonkele ifyo atufundile kabili tapakokwele twalimwene ukuti kwali ifintu ifisuma ifingi ifyo aba bwananyina balecita ifyo twalingile ukulabikako amano. Aba bwananyina abengi balefwaya ukulabombesha mu mulimo wa kwa Yehova. Pali aba pali na baice na bakwete abena mwaba abashali Inte. Kuli ifi twalisambilileko icintu icacindama. Twasambilileko ukuti twalingile ukulabika amano ku fisuma, no kuti twalingile ukulolela Yehova ukuti apwishe ubwafya ubo twakwete pa nshita yakwe umwine. (Mika 7:7) Twalishileba ne nsansa na kabili, kabili ifintu fyalishilebako bwino.

Abaletusambilisha mwi sukulu lya bapainiya ilyo twabalilepo ukuyako, balibombeelepo mu fyalo fimbi. Ilyo baletulanga ifikope balekopwa ilyo balebombela ku fyalo fimbi, ilyo baletulondolwela amafya ayo balekwata ne fyo Yehova alebapaala, na ifwe twatendeke ukufwaisha ukubomba umulimo wa bumishonari. E ico twalipangile ukuti tukabombeko umulimo wa bumishonari.

Pa kuti twingafikilisha ifi twapangile ukucita, mu 1984 twakuukile ku citungu ca Quebec uko abantu balelanda iciFrench. Ukufuma ku British Columbia ukufika ku Quebec paba amakilomita ukucila pali 4,000. Ifi twakuukile uku, twalingile ukusambilila ifyo abantu baleikala no lulimi balelanda. Ubwafya bumbi twalekwata bwa kuti, ilingi line twalekwata fye indalama ishinono. Inshita shimo twalelya fye amapoteto ayo umwine we farmu atusuminishe ukulatolelesha mwi farmu lyakwe. Umwina mwandi Debbie alisambilile ifya kwipika amapoteto mu nshila ishalekanalekana, kabili yalewama nga nshi! Nangu ca kuti twalekwata amafya, twaleshipikisha kabili twaleba ne nsansa. Na kabili, twalishininkishe ukuti Yehova aletusakamana.—Amalu. 64:10.

Bushiku bumo, ukwabula no kwenekela, balitutumine foni. Batwebele ukuti baletwita ukuya mu kubombela pa Bethel ya mu Canada. Ilyo bashilatwita, twalilembele formu ya kwipushishapo ukuya kwi Sukulu lya Gileadi. Kwena nangu ca kuti twalitemenwe ilyo batwitile ku Bethel, twalyumfwileko ububi pantu te mulimo twale-enekela. Na lyo line, twalile mu kubombela ku Bethel. Ilyo twafikile ku Bethel, twaipwishe munyinefwe Kenneth Little umo pa bali muli Komiti ya Musambo wa mu Canada atuti, “Tukacita shani nga ca kuti batwita kwi Sukulu lya Gileadi?” Atwaswike ati, “Tukeshiba ifya kucita nga bamwita.”

Ilyo papitile umulungu umo, ine no mwina mwandi Debbie balitwitile kwi Sukulu lya Gileadi. Kanshi twalingile ukusalapo ica kucita, nampo nga kuya kwi Sukulu lya Gileadi nelyo nga kutwalilila ukubombela pa Bethel. Munyinefwe Little atwebele ati: “Nampo nga mwasalapo ukuya kwi Sukulu lya Gileadi nangu mwasalapo ukutwalilila ukubombela pa Bethel, bushiku bumo nalimo mukatontonkanya ukuti kanshi nga twasalilepo cimbi ukucila ici twasalile. Conse ico mwasalapo ukucita, Yehova kuti amupaalilapo.” E ico twasalilepo ukuya kwi Sukulu lya Gileadi, kabili pa myaka yonse iyi iyapitapo, twalishininkisha ukuti ifyo munyinefwe Little atwebele fya cine. Ifyo munyinefwe Little atwebele ilingi line e fyo tweba aba bwananyina aba kuti balingile ukusalapo umulimo umo pa milimo babapeele.

IFYO TWALEBOMBA UMULIMO WA BUMISHONARI

Twalitemenwe sana pantu twali pa bana be sukulu abali 24 abo baitile kwi Sukulu lya Gileadi mwi klasi lyalenga 83. Ili isukulu lyabelele ku Brooklyn, mu New York, mu April 1987. Abaletusambilisha maka maka bali ni munyinefwe Ulysses Glass na munyinefwe Jack Redford. Imyeshi 5 yalipwile bwangu kabili twapwishishe isukulu pa 6 September, 1987. Ifwe batutumine ku Haiti pamo na ba John Goode na bena mwabo ba Marie.

Mu calo ca Haiti tabatalile abatumamo bamishonari ukutula mu 1962 ilyo batamfishe bamishonari abalekelesheko. Ilyo papitile imilungu itatu ukutula apo twapwishishe isukulu, twalifikile mu Haiti kabili twatendeke ukubombela mu cilonganino icinono umwali fye bakasabankanya 35. Ici cilonganino cabelele ukutali sana mu mpili. Pali iyi nshita twali abaice, tatwaishibe ifingi kabili twaleikala fye fweka pa ng’anda ya bamishonari. Abaleikala muli iyi ncende bali bapiina sana kabili tabaishibe ukubelenga. Ilyo twatampile fye ukubombela muli iyi ncende, mu calo mwali amafya. Mwali ifimfulunganya, abantu balefwaya ukwalula ubuteko, baleoca ifyo balecilikilako imisebo, kabili mwaleba ne fikuuku fya mwela ifyaleonaula ifintu.

Twalisambilile ifintu ifingi ku ba bwananyina ba mu Haiti abalesekelela nangu ca kuti balekwata amafya. Abengi balekwata amafya ayengi, lelo balitwalilile ukutemwa Yehova no mulimo wa kubila imbila nsuma. Nkashi umo umukalamba taishibe ukubelenga, lelo alisungile amalembo nalimo 150. Ifyalecitika cila bushiku fyalelenga twashininkisha ukuti twalingile ukutwalilila ukubila imbila nsuma ya Bufumu, pantu e bukalenga amafya ayo abantu bakwata yakapwe. Twalitemwa sana pantu bamo pa bo twabalilepo ukusambilisha Baibo baishileba bapainiya ba nshita yonse, bapainiya baibela e lyo bambi baishileba baeluda.

Ilyo twalebombela mu Haiti mwine, nalikumene no mulumendo Trevor uwali mishonari wa mipepele ya baMormon, kabili twalilanshenyeko nankwe ifya mu Baibo. Ilyo papitile imyaka imo, alinembeele kalata. Nshale-enekela ukutila kuti anembela kalata. Anembele ati: “Ndi no kubatishiwa pa kulongana kwa muputule uko tuli no kukwata! Ndefwaya ukubwelela ku Haiti nkaye mu kubomba bupainiya bwaibela mu ncende ilya ine nalebombelamo ilyo nali mishonari wa baMormon.” Ifi fine e fyo acitile. Alibombele bupainiya bwaibela pamo no mwina mwakwe pa myaka iingi.

BATUTUMA KU EUROPE, LYENA KU AFRICA

Batutumine ukuya mu kubombela ku Europe uko amabuteko yatampile ukusuminisha aba bwananyina ukulabila imbila nsuma. Mu 1992 twalifikile mu musumba uukalamba uwa calo ca Slovenia mupepi no ko abafyashi bandi bakulile ilyo bashilakuukila ku Italy. Pali ilya nshita mu calo ico baleita kale ukuti Yugoslavia ninshi mucili inkondo. Umusambo wa mu calo ca Austria, uwa mu calo ca Croatia no wa mu calo ca Serbia e misambo yaleangalila umulimo wa kubila imbila nsuma mu fyalo fya ku Eastern Europe. Nomba cila calo cali no kuikwatila iofesi lya musambo.

Ifi twaile mu kubombela ku Eastern Europe, twalingile ukusambilila ululimi lumbi ne ntambi shimbi. Abantu ba kuli ilya ncende balelanda abati, “Jezik je težek” kabili aya mashiwi yapilibula ukuti “Ulu lulimi lwalikosa.” Na cine lwalikosa! Twaletemwa sana ifyo aba bwananyina baleitemenwa ukukonka ifyo icilonganino ca kwa Yehova calealula, kabili twaleimwena ifyo Yehova alebapaala. Na kabili twalimwene ifyo Yehova aba no kutemwa ilyo alelungika ifintu pa nshita iyalinga. Ilyo twali mu Slovenia twalisambilile ifintu ifingi, kabili ifyo twasambilile kale, fyalengele tuleshipikisha amafya ayo twalekwata.

Nomba kwali na fimbi ifyali no kwaluka. Mu 2000 batutumine ukuya mu kubombela ku calo ca Côte d’Ivoire, ku West Africa. Lyena mu November 2002 batutwele ku calo ca Sierra Leone pa mulandu wa kuti mu Côte d’Ivoire mwali inkondo. Pali ilya nshita e lyo inkondo ayali mu Sierra Leone yapwile fye. Calitukosele ukufuma mu calo ca Côte d’Ivoire mu kupumikisha fye. Nomba ifyo twasambilile fyalengele twatwalilila ukusekelela.

Twabikile sana amano ku bantu abengi abalefwaya ukusambilila icine, e lyo na kuli bamunyinefwe na bankashi abashipikishe pa myaka iingi ilyo mu calo mwali inkondo. Bali bapiina, lelo baleitemenwa ukupeelako abantu ifyo bakwete. Nkashi umo alipeeleko umwina mwandi ifya kufwala. Ilyo umwina mwandi alefwaya ukukaana, uyo nkashi alimupatikishe, kabili amwebele ati: “Ilyo kwali inkondo aba bwananyina mu fyalo fimbi baletwafwa. Nomba ni nshita yesu iya kwafwako aba bwananyina.” Ici calengele na ifwe tupange ukuti twalingile ukulabapashanya.

Mu kupita kwa nshita, twalibwelele ku Côte d’Ivoire. Lelo pa mulandu wa kuti aba mu fikansa fya calo balelwishanya, abekala calo batendeke ukulwa na kabili. E ico mu November 2004 balitufumishe mu calo ne ndeke, kabili cila muntu asendele fye icola cimo. Twaleele panshi, pa fikuulwa fya bashilika aba ku calo ca France, kabili ubushiku bwakonkelepo batutwele ku calo ca Switzerland ne ndeke. Ilyo twafikile pa musambo wa ku Switzerland nalimo pa kati ka bushiku, abali muli Komiti ya Musambo e lyo na bamunyinefwe abalesambilisha mwi Sukulu lya Kukansha Ilya Butumikishi pamo na bena mwabo, balitupokelele bwino, balitukumbatile, balitupeele ifya kulya kabili balitupeele na chokoleti iingi iya muli ici calo. Ifi bacitile fyalengele twalaumfwa ukuti balitutemenwe icine cine.

Batutumine ukuya mu kubombela ku calo ca Ghana pa nshita iinono. Lyena twalibwelelemo ku Côte d’Ivoire ilyo ifimfulunganya fyacepeleko. Ifyo aba bwananyina bali ne cikuuku, fyalengele twalashipikisha ilyo twalefulumuka mu calo, na lintu baletupeela imilimo iya kubomba fye pa nshita iinono. Nangu ca kuti bonse fwe baba mu cilonganino ca kwa Yehova twalitemwana, ine no mwina mwandi Debbie twapangene ukuti tufwile ukulatasha pali ifi twatemwana. Na kuba, twalisambilileko ifintu ifyacindama sana na ku mafya ayo twakwetepo.

BATUTUMA KU MIDDLE EAST

Mu 2006 aba ku maofesi yakalamba balitutumine kalata, kabili batwebele ukuti tuye mu kubombela ku Middle East. Ilyo twaile mu kubombela kulya, twaileishiba incende shimbi, twailekwata amafya ayo tushatalile atukwatapo, twalisambilile indimi shimbi kabili twalisambilile intambi shimbi. Ku Middle East kwali amafya ayengi pa mulandu wa fikansa fya calo ne mipepele, lelo fingi twasambilileko. Twalitemenwe pantu mu cilonganino mwali abalelanda indimi ishalekanalekana, kabili twalimwene ifyo twali abaikatana pa mulandu wa kuti twalekonka ifyo icilonganino ca kwa Yehova caletweba. Twalitemenwe aba bwananyina pantu abengi baleshipikisha ilyo balupwa lwabo, abo balesambilila nabo, abo balebomba nabo na bena mupalamano balebacusha.

Mu 2012 twalile mu kulongana kwa citungu ukwaibela ukwabelele mu musumba uukalamba uwa Tel Aviv, mu calo ca Israel. Uyu e wali umuku wa kubalilapo ilyo abantu ba kwa Yehova balongene abengi sana mu Israel ukutula pa Pentekoste mu mwaka wa 33 ninshi Yesu alibwelelamo ku muulu. Ala tatwakalabe kulya kulongana!

Ilyo twalebombela ku Middle East, balitutumine ukuyabombela mu calo umo aba bwananyina bashakwete sana ubuntungwa bwa kubila imbila nsuma. Twalisendeleko impapulo shesu shimo, twalibilileko imbila nsuma pamo na ba bwananyina kabili twalilongeneko ukulongana kwa muputule ukwaleba fye abantu abanono. Abashilika abaleba ne fyanso baleba fye mpanga yonse kabili balecilika imisebo iingi. Lelo twaleumfwa ukuti twalicingililwe pantu twaleba abacenjela ilyo twale-endela pamo na ba bwananyina abanono fye.

BATUBWESESHA KU AFRICA

Mu 2013 balitupeele umulimo umbi. Batwebele ukuya mu kubombela pa maofesi ya musambo mu musumba uukalamba uwa Kinshasa, mu calo ca Congo. Ici calo cikalamba sana kabili cilamoneka bwino. Lelo abantu babamo, bapiina sana kabili ilingi line mulaba inkondo. Ilyo batutumine fye ukuya mu kubombela ku Congo twatile, “Twalikalapo mu Africa kabili twalishiba ifyo mwaba. Kanshi tatwakakwate amafya ayengi ilyo tukalabombela mu Congo.” Nomba twalingile ukusambilila ifintu ifingi, maka maka ifya kwenda mu ncende umushaba imisebo. Kwali ifisuma ifyo twamwene ifyo twabikileko amano, pamo nga ifyo aba bwananyina baleshipikisha, ifyo balesekelela nangu ca kuti balecula pa mulandu wa kuti bali bapiina, ifyo batemenwe umulimo wa kubila imbila nsuma e lyo ne fyo baleibikilishako pa kuti baleya mu kulongana kwa pa cilonganino no kwa muputule. Twali-imwenene ifyo umulimo wa kubila imbila nsuma waleilako fye pa ntanshi pa mulandu wa kuti Yehova alebafwa, kabili alebapaala. Ilyo twalebomba umulimo wa nshita yonse mu Congo, twalisambilileko ifintu ifyacindama kabili abaishileba ifibusa fyesu baba fye kwati lupwa lwesu.

Ku kupwa kwa mwaka wa 2017, balitutumine ukuya mu kubombela ku musambo wa ku South Africa. Uyu e musambo uwakulishapo pa misambo yonse iyo twabombelapo, kabili ne milimo batupeele nayo tatwatalile atuibombapo. Na kabili twalingile ukusambilila ifintu ifingi. Lelo ifyo twasambilile ku numa, fyaletwafwa. Twalitemwa bamunyinefwe na bankashi abashipikisha amafya pa myaka iingi. Na kabili, twalitemwa pantu bonse pa Bethel twalikatana nangu ca kuti twafuma mu nko ishalekanalekana, kabili tukonka intambi ishapusanapusana. Cali-ilanga fye apabuuta tuutu ukuti Yehova alilenga abantu bakwe baba aba mutende pantu balifwala ubuntu bupya kabili balakonka amashinte ya mafunde ya mu Baibo.

Pa myaka iingi ine no mwina mwandi Debbie balitupeelapo imilimo iyalekanalekana, twalikonkapo intambi ishalekanalekana kabili twalisambililapo indimi ishingi. Kwena inshita shimo caletukosela ukucita ifi. Lelo lyonse twalemona ifyo Yehova aletulanga ukuti alitutemwa ukupitila mu cilonganino cakwe e lyo na mu ba bwananyina. (Amalu. 144:2) Tatutwishika no kutwishika ukuti ifyo twasambilila mu mulimo wa nshita yonse fyalilenga twaba ababomfi ba kwa Yehova abasuma.

Ndatasha sana pa fyo abafyashi bandi bansambilishe ilyo nali umwaice, pa fyo umwina mwandi Debbie antungilila na pa fyo aba bwananyina mwi sonde lyonse babombela bwino Yehova. Ine no mwina mwandi nga twatontonkanya pa milimo iyo tukalabomba ku ntanshi, tulafwaisha ukulakonka fyonse ifyo Kasambilisha wesu Uwapulamo atusambilisha.