Konse uko Yehova Aletutuma, Aletwafwa pa Kuti Tubelele Kabili Tutwalilile Ukuba ne Nsansa

Ba Kassholm na bena mwabo baile kwi Sukulu lya Gileadi mu 1979, kabili balibatumapo ukuya mu kubombela ku Iran, ku Mauritius, ku Myanmar, ku Tanzania, ku Uganda e lyo na ku Zaire. Abalebasambilisha mwi Sukulu lya Gileadi ba Jack Redford e babapandileko amano ayalelenga balebelela kabili baletwalilila ukuba ne nsansa konse uko balebatuma ukuya mu kubombela. Nomba natumfwe ifyo balatushimikilako.

Mukwai tushimikileniko ifyo mwasambilile icine.

Ba Mats: Ilyo kwali Inkondo ya Calo iya Bubili, batata baleikala mu Poland kabili balemona ukuti abantu abengi abali mwi ceici lya Katolika bali no bumbimunda. Lelo ilingi line balelanda abati, “Kufwile kwaliba imipepele ya cine.” Mu kupita kwa nshita, nalishininkishe ukuti ifyo balelanda fyali fya cine. Nalishitile ifitabo ifingi. Cimo pali ifyo fitabo cali ca bluu icakwata umutwe uutila, Icine Icitungulula ku Bumi bwa Ciyayaya. Uyu mutwe walengele nalafwaisha ukubelenga ici citabo, kabili nalicibelengele ubushiku bonse mpaka napwisha. Ilyo napwishishe ukucibelenga, nalilwike ukuti nalisangile imipepele ya cine!

Ukutendekela mu April mu 1972, nalibelengele impapulo sha Nte sha kwa Yehova ishingi, kabili mu Baibo nalisangile amasuko ya mepusho ayengi ayo nakwete. Ici calengele nalaumfwa nge fyaumfwile uwa makwebo uo Yesu alandilepo mu cilangililo, uwaileshitisha fyonse ifyo akwete pa kuti ashitemo margariti imo iya mutengo sana. Ifi fine e fyo na ine nacitile. Nasalilepo ukukanaya ku universiti mu kusambilila ifya budokota pa kuti ningatendeka ukulabombela Yehova. (Mat. 13:​45, 46) Pa 10 December mu 1972 nalibatishiwe.

No mwaka tawapwile, abafyashi bandi no mwaice wandi umwaume nabo balitendeke ukusambilila Baibo kabili balibatishiwe. Mu July mu 1973 nalitampile bupainiya bwa nshita yonse. Pali bapainiya abali abacincila sana mu cilonganino cesu, pali na nkashi Ann-Catrin uwali umusuma sana, kabili uwatemenwe sana Yehova. Twalitemwanene kabili mu 1975 twalyupene. Pa myaka 4 twaikele mwi tauni lya Strömsund. Ili itauni lya mu Sweden lisuma sana kabili abantu abengi abaleikalamo balefwaya ukusambilila Baibo.

Ba Ann-Catrin: Batata basambilile icine ninshi bali mu kupwisha amasambililo yabo aya pa universiti mu musumba uukalamba uwa Stockholm. Pali iyo nshita nali fye ne myeshi itatu, lelo balensenda mu kulongana na mu kubila imbila nsuma. Bamayo tabatemenwe filya batata basambilile icine, kabili ifyo balecita fyalelanga ukuti balefwaya cimoneke ukuti ba Nte tabaishibe icine. Nomba ifyo balefwaya tafyacitike. E ico mu kupita kwa nshita, nabo bene balibatishiwe. Ilyo nali ne myaka 13 nalibatishiwe, kabili ilyo nafishishe imyaka 16 nalitendeke bupainiya bwa nshita yonse. Pa numa ya kubombela mu musumba wa Umeå umwali bakasabankanya abanono, balinsontele ukuba painiya waibela.

Ilyo ine na ba Mats twaupene, twalisambilishe abantu abengi icine. Umo pa bo twasambilishe ali ni Maivor, umukashana uwaishileleka ukuteya ifyangalo pa kuti alebombela sana Yehova. Maivor aishiletendeka bupainiya pamo no mwaice wandi umwanakashi. Mu 1984 bonse babili baile kwi Sukulu lya Gileadi kabili babomba umulimo wa bumishonari ku Ecuador.

Mu fyalo fyonse ifyo bamutumapo ukuya mu kubomba bumishonari, finshi mwalecita pa kuti mubelele, kabili mutwalilile ukuba ne nsansa?

Ba Mats: Ilingi line twalekuukakuuka pa mulandu ne milimo iyo baletupeela. Cimo ico twalecita pa kuti tulebelela bwangu, kwesha na maka yesu yonse ukupashanya Yesu, maka maka mu fyo ali uwaicefya. (Kol. 2:​6, 7) Ku ca kumwenako, mu cifulo ca kulaenekela aba bwananyina ukulacita ifintu mu nshila iyo ifwe twingaficitilamo, twale-esha na maka yesu yonse ukwishiba icalelenga balecita ifintu mu nshila baleficitilamo. Twalefwaya ukwishiba bwino ifyo balemona ifintu no kwishiba intambi shabo. Filya twalepashanya Yesu, caletwangukila ukubelela bwangu no kutwalilila ukuba ne nsansa ilyo twalebomba imilimo iyo baletupeela.—Amalu. 1:​2, 3.

Ba Ann-Catrin: Lyonse nga batutuma ukuya mu kubombela kumbi, twaleba kwati cimuti ico balimba icikabila ulubuuto lwa kasuba pa kuti cikule. Lyonse Yehova aleba kwati “kasuba” kuli ifwe. (Amalu. 84:11) Aletupeela aba bwananyina abengi abatutemwa. Ku ca kumwenako, ilyo twalebombela mu cilonganino icinono mu musumba wa Tehran ku Iran, aba bwananyina baletulanga icileela kabili bali ni bakapekape sana. Ifi bali fyalelenga tuleibukisha ifyo abantu bamo abo tubelengapo mu Baibo bali bakapekape. Kwena twalefwaya ukutwalilila ukubombela mu Iran. Nomba mu July mu 1980, ubuteko bwa cilya calo bwalibindile Inte sha kwa Yehova, kabili batwebele ukuti twalingile ukufuma mu calo mu nshiku fye shibili. Ilyo twafumine ku Iran, batutumine ukuya mu kubombela ku Africa mu calo ca Zaire, ico beta pali ino nshita ukuti Congo.

Ilyo batwebele fye ukuti twali no kuya mu kubombela ku Africa, nalililile. Icalengele ndile fintu naumfwile ukuti mu Africa mwaliba sana insoka na malwele. Nomba ifibusa fyesu ababombeelepo mu Africa pa myaka iingi batwebele abati: “Mwitiina, tamwayako ku Africa. Natwishiba ukuti mukaya kutemwa!” Filya fine balandile, e fyacitike. Bamunyinefwe na bankashi mu Africa baliba no kutemwa kabili baliba bwino. Na kuba, ilyo twalefuma mu calo ca Zaire pa numa ya kubombelamo pa myaka 6 pa mulandu wa kuti ubuteko bwalibindile umulimo wesu, nalemwentula fye pantu nomba nalitemenwe ukubombela mu Africa. E ico napepele kuli Yehova nati, “Mwe Yehova, lekeni fye tutwalilile ukubombela mu Africa.”

Bushe Yehova amupaala shani mu myaka yonse iyi iyo mwamubombela?

Ba Mats: Pa mulandu ne milimo tubomba, twalikwata ifibusa bamishonari banensu abafuma ku fyalo ifyalekanalekana. Na kabili, mu ncende ishingi umo twalebombela, twaleba ne nsansa sana pantu twalesambilisha abantu abengi Baibo. Inshita shimo twalesambilisha abantu nalimo 20 cila muntu! Na cimbi, nshakalabe ifyo aba bwananyina mu Africa baba no kutemwa na bukapekape. Ilyo twalebombela ifilonganino mu Tanzania, twalelaala muli motoka yesu, kabili aba bwananyina baletupeela ifyo twalekabila. Limo ifyo baletupeela ‘fyalecila na pa fyo balekwata.’ (2 Kor. 8:3) Cimbi ico twatemenwe sana, fintu twalecita cila bushiku icungulo bushiku. Twaleikala e lyo twalashimika ifyacicitika muli ubo bushiku, kabili twaletasha Yehova pa fyo acitwafwa.

Ba Ann-Catrin: Ine ico natemwa sana, kwishibana na bamunyinefwe na bankashi aba mu fyalo ifyalekanalekana. Twalisambilila indimi ishalekanalekana pamo nga iciFarsi, iciFrench, iciLuganda ne ciSwahili, kabili twalisambilila ne ntambi ishapusanapusana. Twalisambilisheko aba bwananyina imilimo, twalikwete ifibusa ifisuma sana kabili twalesekelela ilyo ‘twalebombela Yehova pamo’ nabo.—Sefa. 3:9.

Na kabili twaletamba ifyalekanalekana ifisuma ifyo Yehova abumba. Lyonse nga batupeela umulimo umbi, twaleumfwa kwati Yehova natusenda, e lyo aletutandasha. Alitusambilisha ifintu ifingi ifyo tushali no kusambilila pa lwesu.

Mafya nshi mwakwatapo, kabili mwayashipikisha shani?

Ba Mats: Twalilwalapo amalwele pamo nga maleria. Na kabili, kwali inshita shimo ilyo umwina mwandi bamulepwilepo pa kumundapa. Twalesakamana na pa abafyashi besu pantu balikotele. E ico tulatasha sana abana banensu pa fyo balebasakamana. Ilyo balebasakamana baleba abatekanya, balesekelela kabili baleba no kutemwa. (1 Tim. 5:4) Na lyo line, inshita shimo twaleumfwa ububi pantu twalefwaya ukulaba nabo mupepi ukucila ukulabafwilisha fye ninshi tuli ukutali.

Ba Ann-Catrin: Mu 1983 ilyo twalebombela mu Zaire, nalilwele kolela iyabipa sana. Dokota aebele ba Mats ati: “Twala umwina mobe ku calo cimbi lelo line fye.” Ubushiku bwakonkelepo twalininine indeke iyalesenda ifipe, kabili iyi, e ndeke fye yalipo iyaleya ku Sweden.

Ba Mats: Twalemona kwati tatwali no kutwalilila ukubomba bumishonari. E ico twalililile icine cine. Nomba nangu ca kuti dokota alemona kwati umwina mwandi tali no kupola, alipolele. Pa numa ya mwaka umo, twalibwelelemo ku Zaire. Ilyo twabwelelemo, twaile mu kubombela mu cilonganino ca ciSwahili icali fye icinono mu musumba wa Lubumbashi.

Ba Ann-Catrin: Ilyo twalebombela mu Lubumbashi nalimite, lelo ifumo lyalyonaike. Kwena nangu ca kuti tatwaletontonkanya pa kukwata abana, ilyo umwana afwile nali no bulanda sana. Nomba pali ilya nshita nali no bulanda sana, Yehova alitupaalile mu nshila iyo tushale-enekela. Twatampile ukusambilisha abantu abengi Baibo, kabili tatwatalile atusambilishapo abantu abafulile filya. No mwaka tawakumene, bakasabankanya balifulileko ukufuma pali 35 ukufika kuli 70, kabili abaleisa mu kulongana nabo balifulileko ukufuma pali 40 ukufika kuli 220. Twalebomba sana umulimo wa kubila imbila nsuma, kabili Yehova aletupaala pa fyo twalebombesha. Ifi fyalengele ndesansamuka sana. Na lyo line, na pali ino ine nshita tucili tulatontonkanyapo pa mwana wesu kabili tulamulandapo sana. Tulatemwa sana nga twatontonkanya pa fyo Yehova akalenga tukaleke ukuba no bulanda mu Paradaise.

Ba Mats: Pa nshita imo umwina mwandi alifunshike sana. Pa nshita imo ine balinsangile na kansa ya ku bula, kabili balindepwile pa kung’undapa. Lelo pali ino nshita naliba fye bwino, kabili umwina mwandi na o alabombela Yehova na maka yakwe yonse.

Pali ino nshita twalishiba ukuti te ifwe fweka tukwata amafya. Pa numa ya nkondo ya bana calo iyaliko mu Rwanda mu 1994, twalitandalile aba bwananyina abengi abali mu nkambi sha mbutushi. Ilyo twamwene ifyo bali ne citetekelo icakosa, ifyo baleshipikisha amafya ne fyo bali bakapekape nangu ca kuti balikwete amafya ayengi, twalisambilileko ukuti Yehova alikwata amaka ya kwafwa abantu bakwe nangu bengakwata amafya ya musango shani.—Amalu. 55:22.

Ba Ann-Catrin: Ubwafya bumbi twabukwete ilyo twaile mu kupeela Yehova amaofesi ya musambo mu calo ca Uganda mu 2007. Ilyo programu yapwile, twatendeke ukuya ku musumba wa Nairobi, ku Kenya. Bonse pamo twali nalimo 25. Bamo bali ni bamishonari e lyo bambi balebombela pa Bethel. Ilyo tushilafika na pa mupaka wa calo ca Kenya, icimbayambaya icalefumina uko twaleya, caishile ku lubali lwesu, e lyo capunkana na motoka twalimo. Namutekenya wa motoka twalimo na ba bwananyina 5 bafwilile apo pene; e lyo nkashi umo ailefwila ku cipatala. Ala tulafwaisha ukwisamona aba ba bwananyina na kabili!—Yobo 14:​13-15.

Mu kupita kwa nshita, nalipolele ifilonda ifyo naicenene. Nomba bulya ubusanso bwalengele ine, ba Mats na ba bwananyina bambi abo twali nabo muli motoka twalatulumuka sana. Ine naletulumuka sana mu nshita ya bushiku ica kuti naleumfwa fye kwati umutima nauleka ukubomba. Ala naletiina icine cine. Nomba pa mulandu wa kuti twalepepa sana kuli Yehova kabili twalebelenga amalembo yamo ayo twatemwa sana, twaleshipikisha. Na kabili badokota abondapa abantu abakwata amasakamika sana balitwafwile icine cine, kabili ifi batwafwile na fyo fyalengele twatwalilila ukushipikisha. Pali ino nshita tatutulumuka sana kabili tulalomba Yehova ukuti aletwafwa pa kuti tulesansamusha abakwata amafya ayaba ngo bu ubwafya twakwata.

Ilyo mwalelondolola ifyo mwashipikisha amafya ayo mwakwatapo, mwatile Yehova alemusenda nga mani. Bushe mwaloseshe mwi?

Ba Mats: Yehova aletusenda nga mani. Filya fine umuntu asenda bwino amani pa kuti yetobeka, e fyo na Yehova atutungilila mu milimo yonse iyo tumubombela. Lyonse twalekwata ifyo twalekabila. Limo fyalecila fye na pa fyo twalekabila. Inshila imo iyo Yehova atulangilamo ukuti alitutemwa kabili alatusakamana, fintu Ibumba Litungulula litusakamana.

Ba Ann-Catrin: Kanandeko pali cimo icacitike icilangilila ukuti Yehova aletwafwa. Bushiku bumo kwali abantumine foni kabili banjebele ukuti batata ku Sweden balilwele sana kabili baali mu cipatala. Ba Mats e lyo bapolele fye maleria. Tatwakwete indalama sha kuninina indeke ukuya ku Sweden. E ico twatontonkenye ukuti tushitishe fye motoka. Lyena kwali abatutumine amafoni. Abaupana bamo abaishibe ubwafya twakwete, batwebele ukutila kuti balipililako umuntu umo. Umbi na o ali ni nkashi uwalesunga indalama mu kabokoshi ako alembelepo ati, “Indalama sha kwafwilisha umuntu uulekabila ubwafwilisho.” Mu nshita fye iinono, Yehova alitwafwile. Twalikwete indalama sha kuninina indeke!—Heb. 13:6.

Nga mwatontonkanya pa myaka yonse 50 iyo mwabomba umulimo wa nshita yonse, finshi mwasambililako?

Ba Ann-Catrin: Nalisambililako ukuti amaka yesu yaba ‘mu kuteka umutima na mu kucetekela.’ Nga twacetekela Yehova, alatulwilako inkondo. (Esa. 30:15; 2 Imila. 20:​15, 17) Pa mulandu wa kuti tubombela Yehova ne mitima yonse ilyo tulebomba imilimo yonse iyo batupeela, ifyo atupaala fyalicila pa fyo aali no kutupaala atulabomba imilimo imbi.

Ba Mats: Icikalamba ico nasambililako, kushintilila pali Yehova muli fyonse no kumona ifyo engangafwa. (Amalu. 37:5) Lyonse alangafwa nga filya fine alaya. Na kabili, na nomba line Yehova acili alatwafwa mu milimo yonse iyo tubomba pano pa Bethel ya mu Myanmar.

Tule-enekela ukuti abacaice abengi abafwaya ukubombela sana Yehova, nabo bene akabalanga ukutemwa ukushipwa nga fintu atulanga. Natucetekela ukuti akabalanga ukutemwa ukushipwa nga ca kuti bamulomba ukuti abafwe pa kuti babelele kabili batwalilile ukuba ne nsansa konse uko engabatuma ukuya mu kumubombela.