‘Ababa ne Mitima Iisuma’ Bakakutika

1. Finshi abantu bacita nga twabila imbila nsuma kuli bena? (Imilimo 13:​47, 48; 16:​14, 15)

MU NSHITA ya batumwa, abantu abengi balitemenwe icine ilyo babashimikile fye imbila nsuma. (Belengeni Imilimo 13:​47, 48; 16:​14, 15.) Na muno nshiku mwine, abantu bamo balatemwa nga baumfwa imbila nsuma pa muku wa kubalilapo. Na bantu aba kuti tabatemenwe imbila nsuma pa muku wa kubalilapo, pa numa balafwaya ukusambilila pali Yehova. Finshi tufwile ukucita nga twasanga abantu ‘ababa ne mitima iisuma’ ilyo tulebila imbila nsuma?

2. Bushe umulimo wesu uwa kulenga abantu baba abasambi wapalana shani no mulimo uo umulimi abomba?

² Umulimo wesu uwa kulenga abantu baba abasambi kuti twaulinganya ku mulimo uo umulimi abomba. Nga asanga icisabo cimo nacipya, ilyo line alaciswa nangu ca kuti acili alelima nangu acili alebyala imbuto shimbi. Ifi fine e fyo na ifwe tucita nga ca kuti twasanga umuntu uwatemwa ukusambilila, tulangufyanya ukumwafwa pa kuti abe umusambi wa kwa Kristu. Nomba aba kuti tabalefwaya ukusambilila ilyo line twalanda nabo, tulatwalilila ukubafwa pa kuti bamone ubusuma bwa kusambilila pali Lesa. (Yoh. 4:​35, 36) Nga tuleiluka, tukalaishiba inshila iisuma iya kwafwilamo abantu pa kuti basambilile icine. Nomba natumone ifyo tufwile ukucita nga twasanga umuntu uulefwaya ukukutika pa muku wa kubalilapo twalanda nankwe. Twalasambilila na pa fyo tufwile ukucita pa kumwafwa pa kuti atwalilile ukulunduluka.

IFYO TWINGACITA NGA CA KUTI ABANTU BALEFWAYA UKUKUTIKA

3. Finshi tufwile ukucita nga twasanga abantu abalefwaya ukukutika ilyo tulebila imbila nsuma? (1 Abena Korinti 9:26)

³ Nga twasanga abantu abalefwaya ukukutika ilyo tulebila imbila nsuma, tufwile ukubafwa ilyo line fye pa kuti bengatendeka ukulaenda mu musebo uwaya ku bumi. Umuntu nga alefwaya ukukutika pa muku wa kubalilapo twalanda nankwe, ilyo line fye tufwile ukumwipusha nga kuti atemwa ukusambilila Baibo kabili tufwile ukumwita ku kulongana.—Belengeni 1 Abena Korinti 9:26.

4. Landeni pa mukashana uwalefwaya ukusambilila Baibo ilyo amonene fye ne Nte sha kwa Yehova.

⁴ Bepusheni nga kuti batemwa ukusambilila Baibo. Abantu bamo abo tubilako imbila nsuma balafwaya ukutendeka ukusambilila Baibo ilyo line fye. Ku ca kumwenako, bushiku bumo pali Cine, umukashana umo mu Canada aile apo aba bwananyina balebila imbila nsuma pali kastandi ka mpapulo kabili alibuulilepo broshuwa itila Kuti Mwaba ne Nsansa Umuyayaya! Nkashi uwalebila imbila nsuma pali aka kastandi amwebele ukutila nga kuti atemwa kuti atendeka ukusambilila Baibo muli ilya ine broshuwa. Ulya mukashana alitemenwe kabili balipeleshenye amanamba ya mafoni. Bulya bwine bushiku, ulya mukashana alitumiine nkashi meseji kabili alimwipwishe ilyo bali no kutendeka ukusambilila Baibo. Ilyo nkashi amwebele ukuti bali no kutendeka pa mpela ya mulungu, umukashana amwipwishe ati: “Bushe te kuti tutendeke fye mailo? Nkakwata inshita.” Ubushiku bwakonkelepo balitampile ukusambilila. Ulya mukashana alile mu kulongana pa muku wa kubalilapo ulya wine mulungu kabili alelunduluka bwangu.

5. Finshi tufwile ukucita pa kuti twishibe ilyo twingatendeka ukusambilisha umuntu Baibo? (Moneni ne fikope.)

⁵ Kwena tatwenekela ukuti bonse abo twakulabilako imbila nsuma bakulafwaya ukusambilila Baibo ilyo line twalanda nabo nga filya ulya mukashana acitile. Abantu bamo palapita inshita pa kuti bafwaye ukusambilila Baibo. Nalimo kuti twatendekelapo ukulanshanya no muntu pa lyashi ilyo atemwa. Lelo nga twatwalilila ukwenekela ukuti bushiku bumo akafwaya ukusambilila Baibo kabili twatwalilila ukumubikako amano, nalimo kuti twatendeka ukumusambilisha Baibo mu nshita fye iinono. Finshi twingalanda pa kumwipusha nga kuti atemwa ukusambilila Baibo? Ici e cipusho baipwishe bamunyinefwe na bankashi abaishiba bwino ifya kutendeka ukusambilisha abantu Baibo.

6. Finshi twingalanda pa kuti tutwalilile ukulanshanya no muntu ifya mu Baibo?

⁶ Bamunyinefwe na bankashi abo baipwishe pa fyo bacita pa kutendeka ukusambilisha abantu Baibo balondolwele ukuti mu fyalo fimo, nga mulelanda pa kutendeka ukusambilisha abantu Baibo, abantu tabafwaya ukulabeba ukuti, “Ndefwaya ukutendeka ukulamusambilisha Baibo.” Lelo balatemwa nga mwabeba ukuti, “Ndefwaya tulelanshanya ifya mu Baibo,” nelyo “Ndefwaya tulesambilila ifya mu Baibo.” Pa kuti mutwalilile ukulanshanya no muntu, nalimo kuti mwamweba amuti, “Tulapapa sana ifyo Baibo yasuka amepusho yamo ayacindama sana ayo fwe bantu twakwata.” Nelyo kuti mwatila, “Baibo tailanda fye pali Lesa lelo ilatwafwa na mu fintu ifingi.” Kuti mwalanda no kuti: “Mu mamineti 10 nelyo 15 kuti mwasambilila ifintu ifyacindama.” Tamufwile ukulanda amashiwi pamo nga “tupangane” nelyo “tulesambilila cila mulungu,” pantu amashiwi ya musango uyu kuti yalenga umuntu amona kwati takakumemo ukulasambilila cila mulungu.

7. Ni lilali bamo beshiba ukuti balesambilila icine ca mu Baibo? (1 Abena Korinti 14:​23-25)

⁷ Mulebeta mu kulongana. Cimoneka kwati ilyo umutumwa Paulo ali pano isonde, abantu bamo balilwike ukuti ifyo basambilile ilyo baile mu kulongana pa muku wa kubalilapo, fyali e cine. (Belengeni 1 Abena Korinti 14:​23-25.) Ifi fine e fyo ciba na ku bantu bamo muno nshiku. Abengi balalunduluka bwangu nga batendeka ukulongana. Ni lilali mufwile ukubeta mu kulongana? Mwi sambililo 10 mu citabo citila Kuti Mwaba ne Nsansa Umuyayaya! mwaliba amashiwi ya kwita umuntu mu kulongana. Lelo tamulingile ukulolela mpaka mwafika muli ili sambililo pa kuti mwite umuntu mu kulongana. Pa muku wa kubalilapo fye mwalanshanya no muntu, kuti mwamwita mu kulongana kwa pa mpela ya Mulungu. Nalimo kuti mwamwebako no mutwe wa lyashi lya ku cintubwingi, nelyo icishinka cimo icili mwi Sambililo lya Ulupungu lwa kwa Kalinda ilyo mukasambilila.

8. Finshi twingebako umuntu nga twamwita mu kulongana? (Esaya 54:13)

⁸ Ilyo muleita umuntu mu kulongana, mufwile ukumulondolwela ubupusano bwaba pa fyo tulongana na pa fyo amaceici yambi ayo nalimo ayako yalongana. Ilyo umusambi umo aile ku kulongana kwi Sambililo lya Ulupungu lwa kwa Kalinda, aipwishe uwalemusambilisha Baibo ati: “Bushe abaletungulula balishiba amashina ya bantu bonse abalongene?” Nkashi uwalemusambilisha Baibo amulondolwelele ukuti tulesha na maka yesu yonse ukwishiba aba mu cilonganino bonse nga filya fine twishiba amashina ya bantu bonse mu lupwa. Umusambi alondolwele ukuti ku ceici ku mwabo abantu tabaishibana. Na kabili kuti twamulondolwela ico tulonganina. (Belengeni Esaya 54:13.) Kuti mwamulondolwela ukuti ico tulonganina kupepa Yehova, ni pa kuti aletusambilisha na pa kuti tulekoseleshanya na ba bwananyina. (Heb. 2:12; 10:​24, 25) E co kushibela icimfulumfulu nelyo ukukonka intambi nga tulelongana. (1 Kor. 14:40) Umo tulonganina mulaba ulubuuto pa kuti tulesambilila bwino. Ilyo tulelongana tatulanda pa fikansa fya calo pantu tatuitumpamo, kabili tatuumanina pa malyashi ya muli cino calo nelyo pa fyo abantu balanda. Kuti cawama ilyo umusambi ashilaisa mu kulongana ku Ng’anda ya Bufumu, mwamutambishako vidio itila, Finshi Ficitika pa Ng’anda ya Bufumu? Nga mwacita ifi, umusambi akeshibako fimo pa fyo tulongana ilyo ashilaisa mu kulongana.

9-10. Ilyo tuleita umuntu mu kulongana, finshi twingacita pa kuti ashininkishe ukuti tatwakamupatikishe ukuba Inte ya kwa Yehova nelyo ukulandapo ilyo tulelongana? (Moneni ne cikope.)

⁹ Bamo balashingashinga ukwisa mu kulongana pantu bamona ukuti tukabeba ukuti babe Inte sha kwa Yehova. Tufwile ukweba umuntu ukuti tulatemwa abantu nga baisa mu kulongana na ifwe, lelo tatubapatikisha ukuba Inte sha kwa Yehova nelyo ukubapatikisha ukulandapo nga tabalefwaya. Bonse fye kuti baisa mu kulongana kumo ne ndupwa umwaba abana abanono. Nga tulelongana, abana tababasambilisha beka lelo bekala pamo na bafyashi babo kabili basambilila pamo. Ici cilenga abafyashi baleishiba ukuti abana bali abacingililwa kabili baleishiba ne fyo abana balesambilila. (Amala. 31:12) Nga tulelongana tatupishamo imbale sha mutuulo. Lelo tukonka ifyo Yesu alandile. Alandile ati: “Mwapeelwe fye ubupe, na imwe mulepeela fye.” (Mat. 10:8) Nalimo kuti mwalondolwela no muntu ukuti tafwile ukukwata ifya kufwala fya mutengo pa kuti ese mu kulongana pantu Lesa abika amano ku fili mu mutima wa muntu te ku fyo amoneka.—1 Sam. 16:7.

¹⁰ Umuntu nga aisa mu kulongana, mulecita ifingalenga aumfwa ukuti namumupokelela bwino. Mufwile ukumulondolola kuli baeluda na ku ba bwananyina bambi. Nga aumfwa ukuti namumupokelela, kuti afwaya ukwisalongana na kabili. Nga takwete Baibo, kuti mwalabomfya nankwe Baibo yenu, kabili kuti mwamwafwa pa kuti omfwikishe ifyo kalanda alelandapo mu lyashi, ne fyo tusambilila amasambililo yambi.

IFYO TUFWILE UKUCITA NGA TWATAMPA UKUSAMBILISHA UMUNTU BAIBO

11. Kuti mwacita shani pa kuti mulange ukuti mulakonka ifyo mwapangana no muntu mulesambilisha Baibo?

¹¹ Finshi tufwile ukulaibukisha ilyo tulesambilisha umuntu Baibo? Mulelanga ukutila namwishiba ukuti uo mulesambilisha alikwata ifya kucita ifingi kabili kuti asambilila fye pa nshita iyo ine amwebele. Ku ca kumwenako, nga ca kuti amweba ukuti muyemusambilisha pa nshita imo, mufwile ukuya pali iyo ine nshita nangu ca kuti abantu abengi uko mwikala tabakonka inshita. Na kabili, nga ca kuti e lyo mwatendeka fye ukusambilisha umuntu, kuti cawama tamukokwele. Bamunyinefwe na bankashi bamo abasambilishapo abantu abengi Baibo balanda ukuti, tatufwile ukukokola nangu ca kuti uo tulesambilisha acili alefwaya ukusambilila. Kabili tatufwile ukulalandapo sana, lelo tuleleka uo tulesambilisha e o alelandapo sana.—Amapi. 10:19.

12. Cinshi tufwile ukubikako sana amano ilyo twatendeka fye ukusambilisha umuntu Baibo?

¹² Ilyo mwatendeka fye ukusambilisha umuntu Baibo, mulingile ukumwafwa pa kuti eshibe Yehova na Yesu no kubatemwa. Kuti mwacita ifi nga ca kuti lyonse ilyo mulemusambilisha mulemulanga ifyo Baibo ilanda ukucila ukulamweba ifyo imwe mwaishiba. (Imil. 10:​25, 26) Ilingi line ilyo umutumwa Paulo alesambilisha abantu, alebasambilisha pali Yesu Kristu uo Yehova atumine ukwisa mu kutusambilisha pali ena pa kuti tumwishibe kabili tumutemwe. (1 Kor. 2:​1, 2) Na kabili Paulo alilandile pa busuma bwaba mu kusambilisha abasambi imibele iisuma iyo balingile ukukwata. Iyi imibele kuti twailinganya kuli golde, silfere, na mabwe yambi aya mutengo. (1 Kor. 3:​11-15) Pali iyi mibele iisuma paba icitetekelo, amano, ukwiluka no kutiina Yehova. (Amalu. 19:​9, 10; Amapi. 3:​13-15; 1 Pet. 1:7) Na imwe ilyo mulesambilisha abantu mulepashanya Paulo. Mulebafwa pa kuti bakwate icitetekelo icakosa kabili bakwate bucibusa ubwakosa na Shibo wa ku muulu uwatutemwa.—2 Kor. 1:24.

13. Finshi tufwile ukucita pa kuti tulelanga ukuti twalitekanya kabili tulalangulukilako abo tusambilisha Baibo? (2 Abena Korinti 10:​4, 5) (Moneni ne cikope.)

¹³ Ilyo mulesambilisha umuntu, muleba abatekanya kabili mulemulangulukilako nga filya Yesu alecita. Mwilamwipusha amepusho ayengalenga aumfwa insoni. Nga pali ifyamukosela ukumfwa, kuti mwaficiluka mwakonkanyapo isambililo e lyo mwaisafilandapo pa numa. Tamulingile ukupatikisha umuntu ukusumina ifyo mulemusambilisha, lelo mulingile ukumupeela inshita iya kutontonkanya pa fyo mulemusambilisha pa kuti afyumfwikishe. (Yoh. 16:12; Kol. 2:​6, 7) Baibo ilinganya ifisambilisho fya bufi ifyo abantu baishiba ku “malinga ayakosa” ayo tufwile ukuwisha. (Belengeni 2 Abena Korinti 10:​4, 5.) Umusambi nalimo kuti camukosela ukuleka ukucetekela ifintu ifyo acetekela pa myaka iingi. Kanshi ico ifwe tufwile ukucita, kumwafwa pa kuti acetekele Yehova. Nga acetekela Yehova cikamwangukila ukuleka ukucetekela ifyo asuminamo.—Amalu. 91:9.

IFYO TWINGALACITA PA KWAFWA ABANTU ABA KUTI BAISA MU KULONGANA

14. Bushe tufwile ukulamona shani abantu abesa mu kulongana?

¹⁴ Yehova afwaya tuleba ne cikuuku kuli bonse abesa mu kulongana te mulandu no ko bafuma, intambi bakonka, nampo nga bakankaala nelyo nga bapiina. (Yako. 2:​1-4, 9) E ico kuti twalanga shani ukuti twalitemwa abesa mu kulongana?

15-16. Finshi tufwile ukulacita pa kuti abesa mu kulongana baleumfwa ukuti natubapokelela bwino?

¹⁵ Abantu bamo besa mu kulongana pa kuti bamone ifyo tulongana, bambi balesa mu kulongana pa mulandu wa kuti uwa bwananyina uwikala ku ncende imbi alibakoseleshe ukuti bakaye mu kulongana. Kanshi aba musango uyu nga baisa mu kulongana mulelanda nabo, mulebapokelela bwino. Lelo tamufwile ukusansamuka sana ica kuti baumfwa ne nsoni. Kuti mwabeba ukuti mwikale nabo, kuti mwabomfya nabo Baibo yenu nelyo impapulo isho mulesambililamo. Nangu kuti mwabapeelako Baibo ne mpapulo isho mulesambililamo. Na kabili kuti mwacitako na fimbi ifingalenga baumfwa ukuti namubapokelela. Umwaume umo uwaile mu kulongana pa Ng’anda ya Bufumu aebele munyinefwe uwamupokelele ukuti aleumfwa insoni pa mulandu wa kuti tafwele nge fyo bonse abali pa Ng’anda ya Bufumu bafwele. Munyinefwe amulondolwelele ukuti nangu ca kuti fwe Nte sha kwa Yehova tulafwala bwino nga tulelongana, twaba fye nga bantu bambi. Uyu mwaume alilundulwike mpaka abatishiwa no kubatishiwa, lelo talabile ifyo munyinefwe amwebele. Nomba ilyo tulelanshanya na beshile mu kulongana ilyo tushilatendeka ukulongana nelyo pa numa ya kulongana, tatulingile ukulabepusha amepusho ayengalenga baumfwa insoni nelyo ukulabepusha pa fintu ifishitukumine.—1 Pet. 4:15.

¹⁶ Inshila na imbi iyo twingalangilamo abeshile mu kulongana ukuti natubapokelela, kuba no mucinshi ilyo tulelanshanya, ilyo tuleasukapo na lintu tulelanda amalyashi ayakumine abashili ba Nte nelyo ayakumine ifyo basuminamo. Tatufwile ukulalanda amashiwi ayengalenga bakalipa nelyo ayengalenga balaumfwa ukuti tulebasaalula. (Tito 2:8; 3:2) Ku ca kumwenako, tatufwile ukulalanda mu nshila iingalenga balaumfwa ukuti tatwacindika ifyo basuminamo. (2 Kor. 6:3) Kanshi bamunyinefwe abalanda amalyashi ya ku cintubwingi bafwile ukuba abacenjela sana. Na kabili ilyo balelanda amalyashi, bafwile ukulalangulukilako abashili ba Nte abeshile mu kulongana. E ico bafwile ukulalondolola amashiwi ayengakosela abashili ba Nte.

17. Finshi tufwile ukucita nga twasanga abantu ‘ababa ne mitima iisuma’ ilyo tulebila imbila nsuma?

¹⁷ Ilyo impela ya cino calo ileya ilepalama, tufwile ukubomba bwangu bwangu umulimo wesu uwa kubila imbila nsuma, kabili tucili tulasanga abantu ‘ababa ne mitima iisuma iifwaya umweo wa muyayaya.’ (Imil. 13:48) Nga twasanga abantu ba musango uyu, tatufwile ukushingashinga ukutendeka ukubasambilisha Baibo nelyo ukubeta mu kulongana. Nga twacita ifi, ninshi twabafwa pa kuti batampe ukwenda mu “musebo uwaya ku bumi.”—Mat. 7:14.