ICIPANDE CA KUSAMBILILAMO 40
ULWIMBO 111 Ifilenga Tulesekelela
Yehova E ‘Ulenga Tulesekelela Nga Nshi’
“ Nkaya . . . kuli Lesa uulenga ndesekelela nga nshi.”—AMALU. 43:4.
IFYO TWALASAMBILILAPO
Twalasambilila pa fingalenga twaleka ukuba ne nsansa e lyo na pa fyo twingacita pa kuti tube ne nsansa na kabili.
1-2. (a) Bushe abantu abengi muno nshiku bomfwa shani? (b) Finshi twalasambililapo muli cino cipande?
ABANTU abengi muno nshiku balacita ifyalekanalekana pa kuti fye babe ne nsansa. Na lyo line tababa ne nsansa. Na kuba abantu abengi baliba no bulanda sana kabili bamona ukuti ifintu tafyakatale afibawaminapo. Na bantu ba kwa Yehova bamo ifi fine e fyo bomfwa. Apo twikala “mu nshiku sha kulekelesha,” tulenekela ukutila kuti twaba na mafya ‘aya-afya nga nshi’ ayengalenga twalasakamana sana nelyo twaba no bulanda.—2 Tim. 3:1.
2 Muli cino cipande, twalalanda pa fingalenga twaleka ukuba ne nsansa e lyo na pa fyo twingacita pa kuti tube ne nsansa na kabili. Nomba natubalilepo ukulanda pa wingalenga twaba ne nsansa isha cine cine kabili twalasekelela.
UWINGALENGA TWABA NE NSANSA SHA CINE CINE KABILI TWALASEKELELA
3. Finshi tusambilila pali Yehova nga twamona ifyo abumba? (Moneni ne fikope.)
3 Yehova lyonse alasekelela, kabili afwaya na ifwe tuleba ne nsansa kabili tulesekelela. E mulandu wine abumbila ifintu ifingi ifilenga tuleba ne nsansa. Ku ca kumwenako, tulaba ne nsansa nga twamona isonde ilisuma ilyo atupeela umwaba ifintu ifingi ifyakwata amalangi ayalekanalekana, tulatemwa nga twamona inama shileangala, kabili tulomfwa bwino nga tulelya ifya kulya ifyo twatemwisha. Cine cine Lesa alitutemwa kabili afwaya ukuti tuleba ne nsansa!
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Nga twamona ifyo Yehova abumba fileangala, tulebukisha ukuti alasekelela (Moneni paragrafu 3)
4. (a) Finshi fyalenga Yehova atwalilile ukusekelela nangu ca kuti alamona abantu balecula? (b) Cinshi cimo ico Yehova acita pa kutwafwa? (Amalumbo 16:11)
4 Nangu ca kuti Yehova ni “Lesa wa nsansa,” aleshiba amafya ayo abantu bakwata kabili alomfwa ububi nga amona balecula. (1 Tim. 1:11) Nomba taleka amafya ayo abantu bakwata yalenga aleka ukuba ne nsansa. Alishiba ukuti amafya yonse ayo abantu bakwata yakapwa, kabili alibika no bushiku ubo akayapwishishapo. Yehova alitekanya kabili alashipikisha mpaka ubushiku bukafike ubo akafumyapo ifilenga abantu balecula kabili baleba no bulanda. Nomba ilyo talacita ifi, Yehova aleshiba amafya yonse ayo tukwata kabili alatwafwa. Bushe atwafwa shani? Cimo ico acita pa kutwafwa, alalenga tulesekelela. (Belengeni Amalumbo 16:11.) Natumone ifyo alelenga Umwana wakwe Yesu alesekelela.
5-6. Finshi fyalenga Yesu aleba ne nsansa sana?
5 Pa fibumbwa fyonse ifyo Yehova abumba, Yesu e waba ne nsansa sana. Finshi fyalenga abe ne nsansa sana? Natulande pa fintu fibili ifyalenga abe ne nsansa sana. (1) Yesu “e cipasho ca kwa Lesa uushimoneka” kabili alapashanya sana Wishi. (Kol. 1:15) (2) Yesu e waikala sana na Wishi pa myaka iingi kabili uyu Wishi e Ntulo ya nsansa.
6 Yesu alasekelela pantu lyonse alacita ifyo Wishi amweba. (Amapi. 8:30, 31; Yoh. 8:29) Pa mulandu wa kuti wa cishinka, Yehova alimutemwa sana.—Mat. 3:17.
7. Kuti twacita shani pa kuti tulesekelela sana?
7 Na ifwe bene kuti twalasekelela nga twaba sana ifibusa na Yehova, Intulo ya nsansa. Nga tulekwata inshita iikalamba iya kusambilila pali Yehova kabili nga tulemupashanya, tukalaba ne nsansa sana. Na kabili nga tulecita ifyo Lesa afwaya, kabili nga twaishiba no kuti ifyo tulecita filelenga alesekelela, tukalasekelela.a (Amalu. 33:12) Nomba bushe nga twaleka ukusekelela pa nshita imo nangu pa nshita iitali, ninshi Yehova naleka ukututemwa? Awe. Pa mulandu wa kuti tatwapwililika, inshita shimo tulakalipwa, tulaba no bulanda kabili tulasakamikwa sana. Yehova aleshiba nga tuleumfwa ifi. (Amalu. 103:14) Nomba natulande pa fingalenga twaleka ukusekelela na pa fyo tulingile ukucita pa kuti tutampe ukusekelela na kabili.
TEKWESHA UKULEKA ICINTU NANGU CIMO CALENGA MWALEKA UKUSEKELELA
8. Kuti twaba shani nga twakwata amafya?
8 Ica kubalilapo: Amafya tukwata. Bushe balamucusha pa mulandu wa kuti muli Nte ya kwa Yehova? Bushe mulacula pa mulandu wa busanso ubukalamba ubwacitike, pa mulandu wa kuti muli bapiina, pa mulandu wa kuti mulalwalilila, nelyo pa mulandu wa kuti namukota? Kuti twaleka ukusekelela nga twakwata amafya ya musango uyu, maka maka nga tatukwetepo sana amaka nelyo nga tapali ico twingacitapo. Baibo ilanda ukuti “umuntu alaba no bulanda pa mulandu wa kukalipwa umutima.” (Amapi. 15:13) Ba Babis, baeluda abafwililwe bandume nabo e lyo na bafyashi babo bonse babili mu myaka fye 4, balandile abati: “Naletalalilwa sana kabili nshakwete nangu umo uwa kungafwa. Inshita shimo nalesakamikwa sana pantu nangu ca kuti nalefwaya ukulaba pamo na bafyashi bandi na ndume nandi pa nshita iitali, nshaleba nabo.” Cine cine amafya tukwata kuti yalenga twanaka kabili twafuupuka.
9. Finshi twingacita pa kuti tutampe ukusekelela na kabili? (Yeremia 29:4-7, 10)
9 Finshi twingacita pa kuti tutampe ukusekelela na kabili? Kuti twatampa ukusekelela na kabili nga ca kuti twaleka ukusakamikwa pa fintu ifyo tushakwatapo amaka, kabili nga tuletasha pa fyo twakwata. Muli cino calo abantu abengi balanda abati, pa kuti umuntu abe ne nsansa, ifintu fyonse fifwile ukulamwendela bwino. Lelo ifi te fyo caba. Ku ca kumwenako, Yehova aebele abaYuda abaileba bankole mu Babiloni ukuti balecita ifyali no kulenga balaikala bwino uko kwine ku Babiloni. (Belengeni Yeremia 29:4-7, 10.) Finshi tulesambililako? Mule-esha na maka yenu yonse ukubika amano ku fisuma kabili muletasha pali ifyo fine ifisuma. Muleibukisha ukuti Yehova takamulekeleshe, akulamwafwa. (Amalu. 63:7; 146:5) Nkashi Effie uwali mu busanso ubwalenga alefilwa ukwenda, alandile ati: “Yehova alingafwile sana. Ulupwa lwandi na ba bwananyina mu cilonganino nabo balingafwile sana. E ico naletontonkanya ukuti nga naleka ukuba ne nsansa ninshi nshiletasha pa fyo bancitiile. Ndafwaya ukulanga ukuti ndatasha Yehova, balupwa na ba bwananyina pa fyo bancitila.”
10. Cinshi twingalandila ukuti kuti twatwalilila ukusekelela na lintu tukwete amafya?
10 Na lintu tuli na mafya nangu ifyabipa fyatucitikila nelyo fyacitikila balupwa lwesu, kuti twalasekelela.b (Amalu. 126:5) Cinshi twalandila ifi? Ni co ifyo ifintu fili te filenga tulesekelela. Ba Maria, bapainiya balandile abati: “Nga watwalilila ukusekelela na lintu ukwete amafya tacipilibula ukuti tauleumfwa ububi pa mafya ukwete. Lelo cipilibula ukuti ulebukisha ifyo Yehova atulaya. Yehova kuti atwafwa pa kuti tutwalilile ukusekelela.” Muleibukisha ukuti nangu mwingakwata amafya ayakalamba shani pali ino nshita, tayakatwalilile. Nomba line Yehova ali no kufumyapo fyonse ifilenga tulecula kabili ifilenga tuleba no bulanda.
11. Bushe ifyo twalanda pa mutumwa Paulo kuti fyamukoselesha shani?
11 Inshita shimo kuti twalamona kwati ico tukwatile amafya ni co Yehova naleka ukututemwa. Nga twalaumfwa ifi kuti cawama twatontonkanya pa babomfi ba kwa Yehova abali ne cishinka na lintu bakwete amafya ayakalamba sana. Natulandeko pa mutumwa Paulo. Yesu e wasalile Paulo pa kuti alesambilisha abena fyalo, ishamfumu na bana ba kwa Israele icine. (Imil. 9:15) Uyu umulimo Yesu apeele Paulo wali uwacindama nga nshi. Na lyo line Paulo alekwata amafya ayengi. (2 Kor. 11:23-27) Bushe filya Paulo alekwata amafya ayengi fyalepilibula ukuti Yehova alilekele ukumutemwa? Awe nakalya! Filya aleshipikisha fyalelanga fye ukuti Yehova alemwafwa. (Rom. 5:3-5) Nomba tontonkanyeni pa mafya ayo mwakwata. Mwalitwalilila ukubombela Yehova ne cishinka nangu ca kuti mwalikwata amafya. Kanshi na imwe bene kuti mwashininkisha ukuti ifi mushipikisha amafya Yehova alimutemwa.
12. Kuti twaumfwa shani nga ca kuti twafilwa ukubomba imilimo ya kwa Yehova imo iyo tufwaya ukubomba?
12 Icalenga bubili: Nga ca kuti ifyo twale-enekela taficitike. (Amapi. 13:12) Pa mulandu wa kuti twalitemwa Yehova kabili tulatasha pa fyo atucitila, tulafwaisha ukubombesha mu mulimo wakwe. Lelo nga ca kuti twafilwa ukucita ifyo twapanga mu mulimo wa kwa Lesa pa mulandu ne fyo ifintu fili, kuti twafuupuka. (Amapi. 17:22) Nkashi Holly painiya alandile ati: “Nalefwaya ukuya kwi Isukulu lya Bakabila ba Bufumu, ukuya mu kubombela ku calo cimbi, nelyo ukubombako pa makuule ya ku Ramapo. Lelo ifintu fyalyalwike, e ico nshali no kukumanisha ukucita ifyo napangile. Nalyumfwile sana ububi. Tulomfwa ububi sana nga ca kuti tulefwaya ukubomba imilimo imo nomba te kuti tuibombe.” Ifi fine e fyo ababomfi ba kwa Yehova abengi bomfwa.
13. Nga ca kuti te kuti tukumanishe ukubomba imilimo imo pa mulandu ne fyo ifintu fyaba, milimo nshi twingabombako?
13 Finshi twingacita pa kuti tutampe ukusekelela na kabili? Muleibukisha ukuti Yehova te kuti amwenekele ukucita ifyo mushingakumanisha ukucita. Na kabili muleibukisha ukuti imilimo iyo tumubombela te ilenga aletumona ukuti twalicindama. Yehova afwaya twaba abafuuka kabili aba cishinka kuli ena. (Mika 6:8; 1 Kor. 4:2) Yehova abika sana amano ku fyo twaba ukucila ku milimo iyo tumubombela. Apo Yehova tatwenekela ukucita ifyo tushingakumanisha ukucita, bushe kuti caba fye bwino twalafwaisha ukucita ifyo tushingakumanisha ukucita?c Awe! Kanshi nga ca kuti te kuti mukumanishe ukubomba imilimo imo pa mulandu ne fyo ifintu fyaba, mufwile ukubika amano ku milimo iyo mwingakumanisha ukubomba. Ku ca kumwenako, kuti mwalasambilishako abaice imilimo nelyo mwalakoselesha bamunyinefwe na bankashi abakalamba. Bushe kuti mwayatandalilako uwa bwananyina pa kuti mumukoseleshe, nelyo bushe kuti mwamutuminako foni, nangu mwamulembelako meseji? Yehova akalalenga mukalesekelela ilyo mukalabomba iyi milimo iisuma kabili iyo mwingakumanisha ukubomba! Kabili muleibukisha no kuti mu calo cipya tukalabombela Yehova imilimo iingi ukucila na pa yo twingelenganya. Nkashi Holly uo tulandilepo kale alandile ati: “Nga nafuupuka ntontonkanya nati mu calo cipya nkekala umuyayaya kabili Yehova akangafwa pa kuti nkamubombele imilimo yonse iyo mfwaya ukumubombela.”
14. Finshi fimbi ifingalenga twaleka ukusekelela?
14 Icalenga butatu: Ukufwaya ukulaisekesha. Pa Intaneti kuti twamona abantu abamoneka ukuti baliba ne nsansa sana pantu cila nshita balacita ifya kuisekesha. Nalimo kuti twatendeka ukumona ukuti nga tulecita ifyo twatemwa, tuleshita ifyo tulefwaya kabili tuletandalila incende ishalekanalekana, kuti twaba ne nsansa sana. Kwena caliba fye bwino ukucita ifyo twatemwa. Yehova afwaya tuleba ne nsansa nga twamona ifintu ifisuma ifyo abumba. Na lyo line abengi basanga ukuti ifyo baletontonkanya ukutila kuti fyalenga baleba ne nsansa, e filenga belasekelela. Nkashi Eva painiya, alandile ati: “Nga twabika fye amano ku kucita ifya kuisekesha, lyonse e fyo tukalafwaya fye ukucita.” Nga ca kuti lyonse tulecita fye ifya kuisekesha, tukalaba no bulanda kabili tukalaumfwa ububi.
15. Finshi twingasambililako ku Mfumu Solomone?
15 Ku Mfumu Solomone kuti twasambililako ifyabipa ififuma mu kucita fye ifya kuisekesha. Imfumu Solomone yalicitile ifintu ifingi ifyo yalemona ukutila kuti fyalenga yalasekelela. Ifintu pamo nga ukulya ifya kulya ifisuma, ukukutika inyimbo ishisuma, no kushita ifintu ifya mutengo ifyaliko pali ilya nshita. Lelo ifi fyonse tafyalengele yaba ne nsansa. Yalandile aiti: “Ilinso talitendwa ukumona; no kutwi takunaka ukumfwa.” (Luk. Mil. 1:8; 2:1-11) Ifyo abantu muli ici calo bamona ukuti e fingalenga balasekelela sana, fyaba nge ndalama sha bufi. Shimoneka kwati sha cine, lelo takuli nangu cimo ico wingashitamo.
16. Cinshi twingalandila ukuti nga tulecitila abantu ifisuma kuti twatampa ukusekelela na kabili? (Moneni ne fikope.)
16 Finshi twingacita pa kuti tutampe ukusekelela na kabili? Yesu atwebele ukuti: “Mwaliba insansa ishingi mu kupeela ukucila mu kupokelela.” (Imil. 20:35) Ba Alekos baeluda balandile abati: “Nalitemwa ukucitila abantu utuntu utunono pa kubafwa. Nga nabafwa nshibika fye amano ku fyo ndefwaya, kabili ifi ncita filenga ndesekelela.” Fintu nshi fimo ifyo mwingacitilako abantu? Nga mwamona umuntu ali no bulanda, kuti mwamusansamushako. Nalimo te kuti mupwishe amafya akwete lelo kuti mwamusansamusha nga mulekutika ilyo alelanda, nga mulemulangulukilako kabili nga mwamwibukishako ukuti alingile ukupoosa icisendo cakwe pali Yehova. (Amalu. 55:22; 68:19) Na kabili kuti mwamwibukishako ukuti Yehova acili alimutemwa. (Amalu. 37:28; Esa. 59:1) Nalimo kuti mwamucitilako ifintu fimo pamo nga ukumwipikilako ifya kulya nelyo ukwishako nankwe. Kuti mwaya nankwe mu kubila imbila nsuma, ifi kuti fyalenga asansamuka. Muleleka Yehova alemubomfya pa kusansamusha abantu. Nga tulebika sana amano ku bantu ukucila ukulabika fye amano ku kuisekesha, tukalasekelela nga nshi!—Amapi. 11:25.
Mu cifulo ca kulacita fye ifya kuisekesha, mulecitilako abantu ifisuma (Moneni paragrafu 16)d
17. Finshi tulingile ukucita nga tulefwaya ukuba ne nsansa sha cine cine? (Amalumbo 43:4)
17 Kuti twaba ne nsansa sha cine cine nga twatwalilila ukuba sana ifibusa na Shifwe wa ku muulu. Baibo itweba ukuti Yehova e ‘ulenga tulesekelela nga nshi.’ (Belengeni Amalumbo 43:4.) E ico nangu tukwate amafya ya musango shani, tatufwile ukusakamikwa sana nelyo ukutiina. Kanshi natutwalilile ukuba ifibusa sana na Yehova. Nga twacita ifi, akalenga tukabe ne nsansa umuyayaya!—Amalu. 144:15.
ULWIMBO 155 Yehova E Ulenga Tulesekelela
a Moneni akabokoshi akaleti “Ifyo Yehova Alenga Tulesekelela.”
b Ku ca kumwenako, tambeni ilyashi lya ba Dennis na ba Irina Christensen pa jw.org ilyali muli Lipoti Yalenga 5 iye Bumba Litungulula iya mu 2023.
c Nga mulefwaya ukwishibilapo na fimbi moneni icipande citila, “Mulecita fye Ifyo Mwingakwanisha pa Kuti Muleba ne Nsansa” mu Ulupungu lwa kwa Kalinda ulwa July 15, 2008.
d UBULONDOLOSHI BWA CIKOPE: Nkashi ashita ifintu ifingi, lelo ilyo ashitilako nkashi umukalamba amaluba pa kuti amusansamushe, asekelela sana.