“ Mutwalilile Ukuba Abaikatana nga Fintu Umupashi Walenga Mwaba Abaikatana”
UMUTUMWA Paulo aebele Abena Kristu abali mu Efese ukuti “muleshipikishanya pa mulandu wa kutemwa. Muleibikilishako pa kuti mutwalilile ukuba abaikatana nga fintu umupashi walenga mwaba abaikatana mu mutende uwikatanya.”—Efes. 4:2, 3.
Umupashi wa kwa Lesa e walenga ukuti tube “abaikatana.” Nomba nga fintu Paulo alondolwele, tulingile ukulaibikilishako pa kuti tutwalilile ukuba abaikatana. Kanshi Umwina Kristu onse afwile ukulaibikilishako pa kuti tutwalilile ukuba abaikatana ‘nga fintu umupashi walenga twaba abaikatana.’
Natulangilile, tutile umuntu amupeela motoka iipya. Bushe ni nani afwile ukulaisakamana? Cine cayeba. Nomba bushe motoka nga yaonaika kuti calolamo ukupeela uwamupeele motoka umulandu e lyo ninshi tamwaleisakamana?
Ifi fine e fyo caba na ku kuba abaikatana. Nangu ca kuti ni Lesa e walenga tube abaikatana, cila muntu afwile ukulaesha na maka yakwe yonse pa kuti twingatwalilila ukuba abaikatana. Nga ca kuti tatumfwana na munyinefwe nelyo nkashi, tufwile ukuyipusha atuti, ‘Bushe ndesha na maka yandi yonse ukucitapo cimo pa kuti tutwalilile ukuba abaikatana?’
“MULEIBIKILISHAKO PA KUTI MUTWALILILE UKUBA ABAIKATANA”
Nga fintu Paulo alembele, twamona ukuti te lyonse canguka ukutwalilila ukuba abaikatana na bamunyinefwe na bankashi, maka maka nga ca kuti uwa bwananyina natukalifya. Nomba bushe ni lyonse fye tufwile ukuyaeba uwa bwananyina ukuti alitukalifya? Awe. Muleyipusha amuti, ‘Bushe nga nayaeba uwa bwananyina ukuti alinkalifya, ifintu fyalawaminako nelyo fyalabipilako fye?’ Inshita shimo icingawama ukucita kusuulako fye nelyo ukumubelela uluse.—Amapi. 19:11; Marko 11:25.
Muleyipusha amuti, ‘Bushe nga nayaeba uwa bwananyina ukuti alinkalifya, ifintu fyalawaminako nelyo fyalabipilako fye?’
Nga fintu umutumwa Paulo alembele, ‘natuleshipikishanya pa mulandu wa kutemwa.’ (Efes. 4:2) Icitabo cimo citila, aya mashiwi kuti yapilibula no kuti “ukubapokelela ukulingana ne fyo baba.” Ici cilolele mu kuti tufwile ukusumina ukuti Abena Kristu banensu babembu, nge fi fine na ifwe twaba. Kwena bonse tulesha na maka yesu yonse pa kuti twingafwala “ubuntu bupya.” (Efes. 4:23, 24) Nomba nangu tweshe na maka shani, tulalufyanya. (Rom. 3:23) Nga tuleibukisha ici cishinka, tukalashipikishanya, tukalabelelana uluse, kabili ifi fikalenga ‘tukatwalilile ukuba abaikatana nga fintu umupashi walenga twaba abaikatana.’
Nga tule-elela aba bwananyina pa fyo batulufyanya, kabili nga tulesuulako ku fyo batulufyanya, mu cilonganino mukatwalilila ukuba “umutende uwikatanya.” Ishiwi lya ciGriki ilyo bapilibula ukuti “umutende uwikatanya” pa Abena Efese 4:3, e lyo bapilibula ukuti “imishipa” pa Abena Kolose 2:19. Imishipa e ikatanya amafupa. Ifi fine e fyo caba na mu cilonganino, nga ca kuti tuli aba mutende na ba bwananyina kabili natubatemwa, tukatwalilila ukuba abaikatana nangu ca kuti limo tulapusana.
Kanshi nga ca kuti Umwina Kristu munenu amukalifya, kuti cawama mwaibukisha ukuti icilengele ni co tapwililika. Te kuti ciwame mwabika fye amano ku fyo amukalifye. (Kol. 3:12) Apo bonse tatwapwililika, na imwe mufwile mwalikalifyapo umuntu. Nga tuleibukisha ifi, twakulaesha na maka yesu yonse pa kuti twingatwalilila ukuba abaikatana ‘nga fintu umupashi walenga twaba abaikatana.’