Mwe Bakalamba—Mwalicindama Sana mu Cilonganino

Nalimo na imwe pali ino nshita tamubomba nge fyo mwalebomba ilyo mushilakota. Nangu ca kuti mwalibombela Yehova ne cishinka pa myaka iingi, nomba pali ino nshita kuti mwalaumfwa ububi pa mulandu wa kuti mulafilwa ukucita ifintu fimo. Ku ca kumwenako, nalimo kuti mwatendeka ukulinganya ifyo mulebomba pali ino nshita ku fyo mwalebomba kale. Nga ca kuti ifi e fyo mutontonkanya, finshi mwingacita pa kuti muleke ukutontonkanya ifi?

IFYO YEHOVA AFWAYA MULECITA

Yipusheni amuti, ‘Finshi Yehova afwaya ndecita?’ Kuti mwasansamuka nga mwabelenga amashiwi ayaba pa Amalango 6:​5, apatila: “Mulingile ukutemwa Yehova Lesa wenu no mutima wenu onse no mweo wenu onse na maka yenu yonse.”

Ukulingana ne fyo ici cikomo cilanda, Yehova afwaya mulemubombela no mutima wenu onse, no mweo wenu onse, na maka yenu yonse. Nga muletontonkanya pali ici cishinka, tamwakaleilinganya ku bantu bambi nelyo tamwakalelinganya ifyo mubomba pali ino nshita ku fyo mwalebomba kale.

Tontonkanyeni pali ici: Bushe mwalebombela shani Yehova ilyo mushilakota? Ababomfi ba kwa Yehova abengi kuti batila balemubombela na maka yabo yonse. Na imwe bene mwalemubombela na maka yenu yonse ilyo mushilakota. Nomba na pali ino ine nshita, mucili mulamubombela na maka yenu yonse. Nga ca kuti ifi fine e fyo muletontonkanya, kuti mwailuka ukuti tamwaleka ukubombela Yehova na maka yenu yonse. Ilyo mushilakota mwalemubombela na maka yenu yonse, na pali ino ine nshita mumubombela na maka yenu yonse.

ABA BWANANYINA KUTI BASAMBILILAKO IFINGI KULI IMWE

Na cimbi ico mufwile ukutontonkanyapo ni ci: Mu cifulo ca kulatontonkanya fye pa fyo mushingacita, kuti cawama mwalatontonkanya pa fyo mwingacita pa kwafwa aba bwananyina. Ca cine, apo nomba namukota kuli ifyo mwingacita ifyo mushalecita ilyo mushilakota. Ku ca kumwenako, kuti mwalacitako ifyakonkapo:

Mule-ebako aba bwananyina ifyo mwaishiba. Tontonkanyeni pa fyo Baibo ilanda muli ifi ifikomo fyakonkapo:

Imfumu Davidi: “Nali umulumendo nomba ninkota, lelo nshatalamonapo uwalungama bamulekelesha kuli Lesa, nelyo abana bakwe balalombelesha ifya kulya.”—Amalu. 37:25.

Yoshua: “Nomba umfweni! Ndi mu kufwa, kabili mwalishiba bwino bwino ukuti pa fisuma fyonse ifyo Yehova Lesa wenu amulaile, tapaba nangu cimo ico ashafikilisha. Alifikilisha fyonse, tapaba nangu cimo ico ashacita.”—Yosh. 23:14.

Nalimo na imwe ilyo mushilakota mwalyebelepo aba bwananyina amashiwi ayapala aya pa kubakoselesha. Ifyo Davidi na Yoshua balandile fintu baimwenene kabili fintu bayumfwilile pa myaka iingi. E ico ifyo balandile fyalicindeme sana.

Nga ca kuti mwalibombela Yehova pa myaka iingi, na imwe bene kuti mwashimikilako aba bwananyina ifisuma ifyo Yehova amucitila ne fyo acitila abantu bambi. Bushe kwaliba fimo ifyo mwatemwa sana ifyo mwibukisha ifyo Yehova acitiile abantu bakwe pa kubafwa? Nga e ko fyaba, kuti mwashimikilako aba bwananyina. Nga fintu nalimo mwaimwena, nga mwabashimikilako kuti mwabakoselesha. Nga mwashimikilako bamunyinefwe na bankashi ifyo mwabombela Yehova, kuti mwabakoselesha sana.—Rom. 1:​11, 12.

Inshila na imbi iyo mwingakoseleseshamo aba bwananyina kulaya mu kulongana ku Ng’anda ya Bufumu nga kuti mwakumanisha. Nga mwaya mu kulongana, kuti mwakoselesha bamunyinefwe na bankashi, kabili nabo bene kuti bamukoselesha. Ba Connie abo tulandilepo balandile abati: “Nga naya mu kulongana nshifuupuka. Nga naya mu kulongana pa Ng’anda ya Bufumu nshiba no bulanda pantu aba bwananyina balananga ukuti balintemwa. Na ine ndabapeelako utwa bupe pa kubalanga ukuti ndatasha pa fyo bananga ukuti balintemwa. Kabili ndafwaya ukutwalilila ukulongana no kubila imbila nsuma pa kuti ndekoseleshako aba bwananyina e lyo nabo balenkoselesha.”

YEHOVA ALATASHA PA FYO MUMUBOMBELA NE CISHINKA

Baibo yalilanda pa bantu abengi abo Yehova atemenwe nangu ca kuti tabalebomba nge fyo balefwaya ukubomba. Tontonkanyeni pali Simeone, umwina Israele uwali umukote ilyo Yesu afyelwe. Ilyo Simeone aleya pe tempele, afwile alemona abalumendo balebomba imilimo iyacindama pe tempele. Bushe Simeone aleumfwa shani? Nalimo aletontonkanya ukuti Yehova alemumona ukuti taali uwacindama pantu takwete amaka ya kubombako imilimo iyo abalumendo balebomba pe tempele. Nomba ifi te fyo Yehova alemumona. Yehova alemona Simeone ukuti ali “uwalungama kabili aletiina Lesa.” Na kabili Yehova alicindamike Simeone pantu alilengele amona Yesu ninshi ali akanya. Yehova alilengele Simeone asobela no kuti Yesu e wali no kuba Mesia. (Luka 2:​25-35) Cailanga fye apabuuta tuutu ukuti, Yehova talemona Simeone ukuti ali fye mukote, lelo alemumona ukuti ali mwaume uwa citetekelo icakosa kabili “umupashi wa mushilo walemutungulula.”

Na imwe bene kuti mwacetekela ukuti Yehova alatasha pa milimo mumubombela nangu ca kuti pali ino nshita te kuti mumubombele nge fyo mwalemubombela kale. Yehova ‘alapokelela ubupe bwa muntu nga ca kuti apeela ukulingana na apo akwatile te kulingana ne fyo ashikwete.’—2 Kor. 8:12.

Kanshi mulebika amano ku fyo mwingakumanisha ukucita. Ku ca kumwenako, ni nshila nshi isha kubililamo imbila nsuma isho mwingalabililamo imbila nsuma nangu fye ni pa nshita iinono? Bushe kuti mwatuminako bamunyinefwe na bankashi foni nelyo kuti mwabalembelako kardi pa kuti mubakoseleshe? Utuntu utunono uto mwingacitila aba bwananyina kuti twabakoselesha sana, maka maka nga ca kuti mwe babacitila uto tuntu, mwalibombela Yehova pa myaka iingi.

Nangu ca kuti mwe bakalamba te kuti mucite fimo pa mulandu wa kuti namukula, fingi mwingacita mu mulimo wa kwa Yehova. Belengeni ilyashi lya ku East Africa ilili mu kabokoshi akaleti, “Balimupuswishe” akali muli cino cine cipande.

Muleibukisha ukutila kuti mwakoselesha aba bwananyina ifi mwabombela Yehova ne cishinka pa myaka iingi, na pali ifi mwatwalilila ukumubombela. Aba bwananyina kuti balamupashanya ifi mwatwalilila ukushipikisha, kabili kuti mwacetekela ukuti “Lesa taba uushalungama, takalabe umulimo wenu ne fyo mwalangile ukuti mwalitemwa ishina lyakwe, ilyo mwabombeele aba mushilo na pa fyo mutwalilila ukubabombela.”—Heb. 6:10.

TWALILILENI UKWAFWILISHA ABANTU UKULINGANA NA PAPELELE AMAKA YENU

Abafwailisha pa fintu basanga ukuti, abakalamba abengi abafwilisha abantu balakwata ubumi ubusuma, balatontonkanya bwino, kabili balekala imyaka iingi.

Kwena te kweba ati nga mulecitila abantu ifisuma ninshi amafya mukwata pa mulandu wa kuti muli bakote kuti yapwa. Bufumu bwa kwa Lesa fye e bukafumyapo icilenga tulekota kabili tulefwa, e kutila ulubembu ulo twapyana kuli Adamu.—Rom. 5:12.

Lelo na pali ino ine nshita imilimo mubombela Yehova pamo nga ukusambilisha abantu pali ena ilalenga mwakwata isubilo ilyakosa, kabili no bumi bwenu kuti bwawaminako. Mwe bakalamba mufwile ukwishiba ukuti Yehova alatasha pa milimo yonse iyo mumubombela, no kuti aba bwananyina mu cilonganino nabo balimutemwa pa fyo mwatwalilila ukuba ne citetekelo.