Bushe Muleibukisha?
Bushe kuti mwaibukisha ifyo mwabelenga mu Ulupungu lwa kwa Kalinda ulwa uno mwaka? Natumone nga kuti mwaibukisha. Asukeni ifipusho fyakonkapo:
Mulandu nshi tupeelela Yehova ubukata?
Tulapeela Yehova ubukata pantu twalimucindika sana kabili twalimutemwa sana. Na kabili tulapeela Yehova ubukata pantu tulafwaya abantu bambi bamwishiba.—w25.01, ibu. 3.
Nga ca kuti umo atukalifya, kuti twacita shani pa kuti tumubelele uluse?
Tatusuulako fye ku fyo tuleumfwa. Nomba nga ca kuti twaleka ukukalipa no kulaenda ne cikonko ku mukoshi, tatwakacite ifyabipa pa mulandu wa kuti twalikalipa.—w25.02, amabu. 15-16.
Mulandu nshi abacaice bafwile ukulapashanishisha umusambi Marko?
Marko alisumine ukubombela aba bwananyina. Nangu ca kuti afwile alyumfwile ububi sana pa fyacitike, alitwalilile ukubombela aba bwananyina. Ali ni cibusa wa kwa Paulo e lyo na ba bwananyina bambi abali abakalamba mu fya kwa Lesa.—w25.04, ibu. 27.
Bushe Yesu aloseshe mwi ilyo apepele ati: “Nalilenga baishiba ishina lyenu”? (Yoh. 17:26)
Abasambi bakwe balishibe kale ishina lya kwa Lesa. Nomba Yesu alilengele baishiba bwino sana Lesa, ifyo afwaya isonde likabe, ifyo afwaya abantu bakaleikala e lyo ne mibele yakwe.—w25.05, amabu. 20-21.
Bushe ukuicefya kulenga twaishiba finshi?
Kulenga twaishiba ukuti te fyonse twaishiba. Ku ca kumwenako, tatwaishiba ilyo impela ikesa, tatwaishiba ifyo Yehova engacita pa kutwafwa. Tatwaishiba ifingacitika mu bushiku bukonkelepo kabili tatwaishiba ne fyo Yehova atwishiba.— w25.06, amabu. 15-18.
Kuti twacita shani pa kuti tunonkelemo ilyo twabelenga icipande nelyo ilyo twakutika ilyashi lya ku cintubwingi?
Kuti twayipusha atuti: ‘Fishinka nshi ifyo bacilandapo ifyacilenga abacilakutika bashininkisha ukuti ifyo Baibo isambilisha fya cine? Bushe muliko icilangililo icisuma ico ningabomfya pa kusambilisha umuntu icine? Nani uwingatemwa ukulanda pali ili lyashi?’—w25.07, ibu. 19.
Finshi twingasambililako ku fyo Lesa abelele Davidi uluse?
Nangu ca kuti Davidi alicitile imembu ishikalamba, ilyo alapiile ukufuma panshi ya mutima, Yehova alimubelele uluse. (1 Isha. 9:4, 5) Lesa nga atwelela, tatontonkanya na kabili pa membu twacitile kabili te kuti atukandilepo.—w25.08, ibu. 17.
Nga ca kuti fimo fyakosela umusambi ukumfwa, finshi mwingacita?
Nga ca kuti fimo fyakosela umusambi ukumfwa na pa numa ya kumulondolwela bwino ifyo Baibo ilanda, kuti mwaficiluka mwakonkanyapo isambililo e lyo mwaisafilandapo pa numa.—w25.09, ibu. 24.
Baibo itila ulubembu ‘lulabeleleka.’ (Heb. 3:13) Bushe lutubeleleka shani?
Ulubembu kuti lwatubeleleka pa kuti tulecita ifyabipa. Na kabili kuti lwatubeleleka pa kuti twalatwishika, nalimo twalatwishika nga ca kuti Lesa alitutemwa.—w25.10, ibu. 16.
Fintu nshi fitatu ifyo twingacita pa kuti amapepo yesu yaleba ayasuma?
(1)Tufwile ukutontonkanya pa mibele iyo Yehova akwata. (2) Kuti twatontonkanya pa mafya tukwete. Nalimo nacitukosela ukubelela uwa bwananyina uluse uwatulufyenye. Kuti twalomba Lesa ukuti atwafwe pa kuti tumubelele uluse. (3) Tatufwile ukukwankwanya ukupepa. Nga twacita ifi, kuti twaeba Yehova fyonse ifyo tuleumfwa ne fyo tuletontonkanya.—w25.10, amabu. 19-20.
Kuti twacita shani pa kwafwa abakalamba?
Kuti tulebatandalilako nelyo ukubatuminako foni. Na kabili kuti twabashindikako ku cipatala mu kumona badokota. Nelyo kuti twabilako nabo imbila nsuma mu nshila shalekanalekana.—w25.11, amabu. 6-7.
Finshi Abena Kristu abalepekanya ubwinga balingile ukucita pa kuti ubwinga bwabo bukabe ubwa mucinshi?
Bafwile ukukonka amafunde ya buteko. Bafwile ukushininkisha ukuti bonse abali pa bwinga baletungululwa no mupashi wa kwa Lesa. Bafwile ukufwala ifya kufwala ifyalinga kabili ifya mucinshi. Tabalingile no kukonka intambi ishapusana ne fyo Baibo ilanda. Balingile ukulalanshanya bwino ilyo balepekanya ubwinga.—w25.12, amabu. 21-24.