Umwaume wa Mpungu

MU 1997 ilyo abapondokele ubuteko balelwishanya na bashilika ba buteko mu Freetown, nalesenda amakalata mu Freetown ukutwala kwi ofeshi likalamba mu Conakry, mu calo ca Guinea.

Pa citesheni ca mabasi, naninine basi pamo na baume na bambi. Twaleumfwa imfuti shilelila ukutali, kabili twaleumfwa umwenso. Ilyo twalepita mu misebo ya mu musumba, imfuti nomba shatwalilile fye ukulila. Namutekenya wesu alyalwike alola na kumbi. Tapapitile na nshita ibumba lya bacipondoka abali ne mfuti lyalitwimike, lyatweba no kufuma muli basi. Pa numa ya kutwipusha, balitulekele twaya. Lelo ku ntanshi nako ibumba lya bashilika na limbi lyalitwimike. Pa mulandu wa kuti umo pali ifwe alishibene no mukalamba wa bashilika, nabo balitulekele twaya. Ku mpela ya musumba, ibumba lyalenga butatu ilya bacipondika na lyo lyalitwimike, lelo lyalitulekele twaya. Ilyo twatwalilile ukuya, twalipitile pa fipekeni fya bakapokola ifingi mpaka twayafika mu Conakry pali muntungulya ninshi motoka ili fye ulukungu lweka lweka.

Pa nyendo ishingi nalesenda ifibokoshi fya fitabo, ifisolobelo fya kubomfya mu ofeshi, ifyalembwa ifye ofeshi likalamba, e lyo ne fya kukumbusuka abantu. Ilingi line naleendela muli bamotoka abanono na mu maminibasi. Lelo limo nalepeela abantu e lyo no kubomfya amato ukutwala impapulo ukupita mu ncende ya mfula sana no kwabuka imimana.

Bushiku bumo ilyo naletwala ifisolobelo ku Conakry ukufuma ku Freetown, minibasi nanininemo baliimike ku bashilika bacipondoka abali pa mupaka. Umushilika umo alimwene ifipe fyandi, kabili alitendeke ukumfwailisha. Ilyo line nalimwene uo nalesambilila nankwe ku sukulu pali balya bene bashilika. Abashilika banankwe balemwita abati ni Kapeta, kabili e walemonekapo uwakankala sana pa bashilika bonse. Naebele uwalenjipusha nati ndefwaya ukulandako na Kapeta, kabili nalimwitile. Ilyo fye Kapeta amwene, alinjibukishe kabili twalikumbatene twawa na mu nseko. Ilyo twalekele ukuseka, anjipwishe ati:

“Bwafya nshi ukwete?”

Namwaswike nati: “Ndefwaya ukuya ku Guinea.”

Ilyo line fye aebele abashilika ukuti baleke minibasi yesu ipite ukwabula ukutulonda.

Ukufuma lilya line, lyonse ilyo naleiminina pali ici cipekeni, “Kapeta” aleeba abashilika banankwe ukundeka napita. Nalepeelako abashilika magazini, kabili baletemwa sana ukubelenga. Basukile banjinika abati Umwaume wa Mpungu.