Papita Imyaka 100 Ukutula mu 1916

ILYO umwaka wa 1916 waletampa, ninshi abantu balilwa ukucila pa mwaka umo Inkondo Iikalamba iyo batendeke ukwita ukuti Inkondo ya Calo iya Kubalilapo. Abantu abengi nga nshi mu fyalo fyalelwako iyi inkondo balifwile.

Ulupungu lwa kwa Kalinda ulwa January 1, 1916 lwatile: “Iyi Inkondo iikalamba iya mu Bulaya nailenga abantu ukubika amano ku fya kwa Lesa no kulasakamana sana pa fyo ifintu fikaba ku ntanshi. E ico natutwalilile ukubombesha no kuba abashipa ilyo tulebomba umulimo wa kwa Lesa.”

Ilembo lya mwaka uwa 1916 lyalikoseleshe aba bwananyina ukuba ne “citetekelo icakosa” nga fintu Baibolo ya King James Version ilanda pa Abena Roma 4:20. Abasambi ba Baibolo abengi balikonkele ifyo ili lembo lilanda kabili Yehova alibapaalile icine cine.

Bakangalila Benda Balekoselesha Aba Bwananyina

Akabungwe ka Watch Tower Society kaletuma bakangalila abenda ukuya mu misumba mu kukoselesha Abasambi ba Baibolo. Mu 1916 bakangalila benda abali nalimo  69 balibombele uyu mulimo kabili balyendele amakilomita 805.

Ilyo munyina Walter Thorn, uwali kangalila, alelanda ilyashi pa kulongana kwa citungu mu musumba wa Norfolk, mu citungu ca Virginia alingenye umulimo wa Bena Kristu ku Nkondo Iikalamba. Atile: “Abaume amamilioni 20 ukufika kuli 30 e balelwa inkondo. . . . Kwaliba abashilika na bambi abashaishibikwa ku bekala calo. Aba bashilika ba kwa Shikulu. Kabili nge bumba lya kwa Gideone, nabo balalwa ubulwi, lelo tababomfya ifyanso. Balwa inkondo ya kucingilila icine no bulungami kabili icitetekelo e cilenga ukuti balelwa.”

Balitwalilile Ukubomba na Lintu Kwali Amafya pa Mulandu wa Nkondo

Mu France abaume ukucila pali 1 milioni balibacenene nelyo ukubepaya ilyo kwali ukulwa uko baleita ukuti First Battle of the Somme ukwaliko ku kupwa kwa mwaka wa 1916. Mu ncende shimbi mu France mwine bamunyinefwe balebombesha ukwafwa amabumba nelyo ifilonganino na lintu ifintu fyayafishe pali iyi nshita. Mu Ulupungu lwa kwa Kalinda ulwa January 15, 1916, mwali kalata ya kwa munyinefwe Joseph Lefèvre uwali Umusambi wa Baibolo uo batamfishe mu musumba wa Denain ilyo abashilika ba ku Germany basanshile uyu musumba mu 1914. Uyu munyinefwe aile ku kapinda ka ku kulyo ku musumba wa Paris no kutendeka ukulalongana ne bumba lya Basambi ba Baibolo limo fye ilyali muli ulya musumba. Nangu ca kuti ba Joseph balelwalilila, baletungulula ukulongana konse.

Ilyo papitile inshita, munyinefwe Théophile Lequime uwabutwike ukufuma ku musumba wa Denain, nao wine aalile ku musumba wa Paris ukwali ba Joseph. Pa kutendekelapo, ba Lequime baile ku Auchel uko batendeke ukulapilibula ifipande fyali mu Ulupungu lwa kwa Kalinda no kufituma ku ba bwananyina ku ncende shimbi mu France mwine. Abashilika e balengele ukuti ba Lequime bafume mu musumba wa Auchel pantu balebatunganya pa mulandu ne milimo iyo balebomba. Ilyo munyinefwe Lequime afikile ku Paris, munyinefwe Lefèvre amwene ukuti Lesa alyaswike amapepo ayo alepepa.

Yehova alipaalile aba bamunyinefwe pa milimo iyo babombele mu Paris. Munyinefwe Lefèvre atile: “Nomba natukwata ibumba lya bantu nalimo 45.  . . Abengi pali aba, nabeshiba ukuti ukuipeela kuli Lesa lishuko kabili balelunduluka sana. Abengi muli ili ibumba balesangwa ku kulongana kwa mulimo cila mulungu.”

Balikeene Ukwingila Ubushilika

Apo inkondo yalitwalilile, aba bwananyina abengi balecula pa mulandu wa kukanaingila ubushilika. Mu mafunde ya bashilika mu Great Britain balibikileko ifunde lya kuti abaume abali ne myaka pa kati ka 18 ukufika kuli 40 balingile ukwingila ubushilika. Na lyo line, Abasambi ba Baibolo balitwalilile fye ukukanaingila ubushilika.

Ku ca kumwenako, mu Ulupungu lwa kwa Kalinda ulwa April 15, 1916, mwali kalata iyalembele ba W. O. Warden aba ku Scotland. Balembele abati: “Umwana wandi umo umwaume nafisha imyaka 19. Ukushinta na lelo alabombela Shikulu, alikaana ukwingila ubushilika kabili nga ca kuti atwalilila fye ukukaana, bakamupika ne mfuti. Na lyo line, nincetekela ukuti Yehova akamwafwa ukutwalilila ukulakonka amafunde yakwe no kulacita ifyalungama.”

Munyinefwe James Frederick Scott, uwali kolopota wacaice (painiya) mu Edinburgh ku Scotland, balemulubulwisha pa mulandu wa kukanaingila ubushilika. Lelo ilyo aba mu cilye baumfwile ifishinka fyonse, baebele munyinefwe Scott ukuti “ifunde lyalimusuminishe ukukanaingila ubushilika,” kanshi takwete umulandu.

Na lyo line, ubuteko tabwasuminishe bamunyinefwe abengi ukukanaingila ubushilika. Mu Ulupungu lwa kwa Kalinda ulwa October 15, 1916, mwali lipoti iyalandile ukuti ilyo calefika mu September, pali bamunyinefwe 264 abaipwishe ukuti babasuminishe ukukanaingila ubushilika, abali 23 balibapeele incito iishili ya kulwa inkondo e lyo abashala balibakandile mu nshila ishalekanalekana, bambi babapeele imilimo pamo nga ukupanga imisebo, ukutoba amabwe, ne milimo imbi.” Bamunyinefwe abo basuminishe ukukanaingila ubushilika bali fye 5.

Munyinefwe CharlesTaze Russell Afwa

Pa 16 October 1916, munyinefwe Charles Taze Russell uwaletungulula ibumba lya Basambi ba Baibolo alimine ubulendo bwa kulanda amalyashi ku masamba ya calo ca United States. Ku ca bulanda, munyinefwe Russel alifwile pa 31 October mwi shitima mu musumba wa Pampa mu citungu ca Texas ninshi ali ne myaka 64.

Bamunyinefwe abengi tabaishibe uwali no kupyana munyinefwe Russell. Mu fyebo alembele pa fyo baali no kucita ku fyuma fyakwe nga afwa ifyo basabankenye mu Ulupungu lwa kwa Kalinda ulwa December 1, 1916, alandile pa fyo alefwaya ukuti umulimo uo atungulwile pa myaka iingi ukabombwe. Na lyo line, icipusho ico baleipusha ca kuti: Nani nomba aali no kulatungulula umulimo?

Ici icipusho cali no kwasukwa pa kukumana kwa pa mwaka ukwa kabungwe ka Watch Tower Bible and Tract Society of Pennsylvania ukwali no kubako ku kutendeka kwa mwaka wa 1917. Bonse abasangilwe kuli uku kukumana balisalile uwali no kupyana munyinefwe Russell. Lelo mu myeshi iyakonkelepo, calimoneke ukuti ifyo basalile tafyali no kutwalilila kabili baali no kukwata amesho ayakalamba.