Bushe Maria Umwina Magadala ali Nani?
Icasuko ca mu Baibolo
Maria umwina Magadala ali musambi wa cishinka uwa kwa Yesu Kristu. Ishina lya kuti umwina Magadala lifwile lyafumine kwi tauni lya Magadala (nalimo itauni lya Magadani), ilyali mupepi na Bemba wa Galili. Maria afwile alikeleko kuli ili itauni.
Maria umwina Magadala ali pa banakashi abengi abaleya na Yesu na basambi bakwe mu kubila imbila nsuma kabili abalepeela Yesu na basambi bakwe ifyo balekabila. (Luka 8:1-3) Alimweneko uko Yesu balemwipaya kabili ali pa bantu ababalilepo ukumumona ilyo abuushiwe.—Marko 15:40; Yohane 20:11-18.
Bushe Maria umwina Magadala ali ni cilende?
Baibolo tayalandapo ukuti Maria umwina Magadala ali ni cilende. Ifyo yalandapo fye pali ena ilyo ashilaba umusambi wa kwa Yesu fya kuti, Yesu alifumishe ifibanda 7 muli Maria umwina Magadala.—Luka 8:2.
Cinshi abantu abengi balandila ukuti ali ni cilende ilyo ashilaba umusambi wa kwa Yesu? Pa numa ya myaka iingi ukutula apo Maria umwina Magadala afwilile, abantu bamo balelanda ukuti e ulya umwanakashi uo Baibolo ishalumbula ishina (uwali nalimo cilende) uwasambile amakasa ya kwa Yesu ukubomfya ifilamba fyakwe no kuyakumuna ukubomfya umushishi wakwe. (Luka 7:36-38) Na lyo line, tapaba nangu fimo ifyo Amalembo yalanda ifingalenga twasumina ifi abantu balelanda.
Bushe Maria umwina Magadala ali “mutumwa wa batumwa”?
Awe. Icalici lya Katolika lita Maria ukuti “Umutakatifu Maria Magdalena” no kuti “umutumwa wa batumwa” pa mulandu wa kuti e wabalilepo ukuya eba abatumwa ukuti Yesu nabuushiwa. (Yohane 20:18) Nomba ici tacalengele aba umutumwa. Kabili Baibolo tayalandapo ukuti ali mutumwa.—Luka 6:12-16.
Baibolo bapwishishe ukuilemba mu nshita ya batumwa. Ilyo papitile imyaka nalimo 500, e lyo intungulushi sha mu macalici shatendeke ukulanda ukuti Maria umwina Magadala alikwete icifulo icikalamba sana. Mu fyalembwa ifyo balembele mu myaka ya ba 100 ne ya ba 200 ifishaba pa mabuuku ya mu Baibolo ayaputwamo, balanda ukuti abatumwa ba kwa Yesu bamo balifimbiile Maria. Aya malyashi ya kupanga fye kabili tayabamo mu Malembo.
Bushe Maria umwina Magadala ali mukashi wa kwa Yesu Kristu?
Awe. Na kuba, Baibolo yalilanda ukwabula no kupita mumbali ukuti Yesu taupile.a
a Moneni icipande citila “Bushe Yesu Alyupile? Bushe Yesu Alikwete Abaice Bakwe?”