ABACAICE BEPUSHA UKUTI
Bushe Mfwile Ukubatishiwa?—Ulubali 3: Cinshi Cilenga Ndeshingashinga Ukubatishiwa?
Bushe ulomfwa umwenso nga watontonkanya pa kuipeela kuli Yehova no kubatishiwa? Nga ca kuti ulomfwa umwenso, ninshi cino cipande calakwafwa ukuleka ukulaumfwa sana umwenso.
Ifili muli cino cipande
Inga ca kuti nacita ulubembu ulukalamba pa numa ya kubatishiwa?
Icingalenga uletontonkanya ifi: Nalimo walishibako umuntu umo uwacitile ulubembu ulukalamba ica kuti balimufumishe na mu cilonganino. (1 Abena Korinti 5:11-13) Nalimo ulesakamana ukuti ifi fine na iwe efikakucitikila.
“Umuku wa kubalilapo natontonkenye pa kubatishiwa, nalitiinine ukuti nalimo nkalufyanya icintu icikalamba pa numa ya kubatishiwa. Natontonkenye pa fyo ici cingaseebanya abafyashi bandi.”—E fyalandile Rebekah.
Ilembo ilingakwafwa: “Umubifi naleke ukucita ifyabipa . . . Nabwelele kuli Yehova, uukamubelela uluse, nabwelele kuli Lesa wesu pantu akamwelela nga nshi.”—Esaya 55:7.
Tontonkanya pali ici: Nangu ca kuti abacita imembu abashifwaya ukulapila balabafumya mu cilonganino, Yehova alabelela uluse abalapila ukufuma panshi ya mutima kabili abasumina ukubalungika.—Amalumbo 103:13, 14; 2 Abena Korinti 7:11.
Na kuba, icishinka ca kuti: Nangu ca kuti tawapwililika, Yehova nga akwafwa kuti wakaana amatunko. (1 Abena Korinti 10:13) Pantu na kuba, nani uufwile ukukusalilapo ifya kucita? Bushe ni webo? Nelyo bushe muntu umbi?
“Naletiina nati nalimo kuti nacita ulubembu ulukalamba pa numa ya kubatishiwa, lelo naishileiluka nati nga ca kuti ndeshingashinga ukubatishiwa ninshi ndelufyanya. Nailwike ukuti nshifwile ukuleka umwenso wa kutiina ifingacitika ku ntanshi walenga nakaana ukucita ifyo mfwile ukucita ino nshita.”—E fyalandile Karen.
Icishinka ca kuti: Nga wasalapo, ninshi te kuti ucite ulubembu, nga filya fine ababomfi ba kwa Yehova abengi basalapo ukukaanalacita imembu.—Abena Filipi 2:12.
Bushe ulingile ukubelengelapo na fimbi? Mona icipande citila “Kuti Nacita Shani pa Kuti Ndekaana Amatunko?”
Inga ca kuti ulatiina ukuti nalimo tawakakumanishe ukulacita ifyo Umwina Kristu uwabatishiwa afwile ukulacita?
Icingalenga uletontonkanya ifi: Nalimo walishibako abaice bamo abaya ku fifulo ukutali sana no kwaba indupwa shabo pa kuti balebombesha mu mulimo wa kwa Yehova. Nalimo utontonkanya ukuti abantu bakalaenekela ukuti na iwe ifi fine e fyo ukacita.
“Umwina Kristu uwabatishiwa alafikapo ukubomba imilimo iikalamba, lelo te bantu bonse abasalapo ukuipeelesha ukubombako iyi imilimo, bambi nabo te kuti bakumanishe ukubomba pa mulandu ne fyo ifintu fyaba mu mikalile yabo.”—E fyalandile Marie.
Ilembo ilingakwafwa: “Lelo cila muntu aleiceeceeta pa kuti alemona nga ca kuti ifyo acita fyaliba fye bwino, e lyo akasekelela pa fyo acita, te kuilinganya ku muntu umbi.”—Abena Galatia 6:4.
Tontonkanya pali ici: Mu cifulo ca kulailinganya kuli bambi, uletontonkanya sana pa mashiwi yaba pali Marko 12:30 ayatila: “mulingile ukutemwa Yehova Lesa wenu no mutima wenu onse.”
Uleibukisha ukuti ufwile ukulabombela Yehova no mutima obe onse, te mutima wa muntu umbi. Nga watemwa sana Yehova, ukalafwaya inshila sha kubombelamo apengapela amaka yobe.
“Nangu ca kuti ukubatishiwa cintu icacindama sana, tacipilibula ukuti nga wabatishiwa ninshi ifintu fikakukosela. Nga ca kuti ulesangwa na bantu abasuma, bakalakwafwa. Ilyo uleya ulecita panono panono ifyo Umwina Kristu uwabatishiwa afwile ukulacita, ukalabelako ne nsansa. Nga ca kuti ulesengauka ukubatishiwa, ninshi uleyonaula fye.”—E fyalandile Julia.
Icishinka ca kuti: Ufwile ukulatasha sana Yehova pa fyo akulanga ukuti alikutemwa. Nga ulecita ifyo ukalafwaisha ukulamubombela apapelele amaka yobe.—1 Yohane 4:19.
Bushe ulingile ukubelengelapo na fimbi? Mona icipande citila “Bushe Nalicetekelwa?”
Nga ca kuti ulemona kwati tawafikapo ukubombela Yehova?
Icingalenga uletontonkanya ifi: Yehova mukalamba nga nshi kabili e walinga ukuteka pano isonde na mu muulu; abantunse tapali ifyo bali nga kubalinganya kuli Yehova! Nalimo kuti walatwishika no kutwishika nga ca kuti Yehova alikwishiba.
“Apo abafyashi bandi ni Nte sha kwa Yehova, nalesakamana pantu naletontonkanya nati bucibusa nakwata na Yehova bwa kupyana fye ku bafyashi bandi, no kuti ine pa lwandi Yehova tankulila kuli ena.”—E fyalandile Natalie.
Ilembo ilingakwafwa: “Takwaba uwingesa kuli ine, kano Tata uwantumine amuleta kuli ine.”—Yohane 6:44.
Tontonkanya pali ici: Ifi uletontonkanya pa kubatishiwa cilangililo ca kuti Yehova alekuleta pa kuti ube sana cibusa wakwe. Bushe taciweme sana ifi Yehova alefwaya ukuti ube cibusa wakwe?
Uleibukisha no kuti, ni Yehova—te iwe nelyo umuntu umbi—e wabikako ifyo umuntu afwile ukucita pa kuti atendeke ukumubombela. Kabili Icebo cakwe citweba ukuti tufwile ‘ukupalama kuli Lesa, e lyo na o akapalama kuli ifwe.’—Yakobo 4:8.
“Apo walishiba Yehova kabili walipalama na kuli ena, cilangilila fye ukuti alikutemwa. Kanshi nga watontonkanya ukuti tawafikapo ukumubombela, uleibukisha ukuti ena akumona ukuti walifikapo. Kabili lyonse Yehova alilungama mu fyo amona ifintu.”—E fyalandile Selina.
Icishinka ca kuti: Nga ca kuti naukumanisha ifyo Baibo ilanda ukuti e fifwaikwa pa kuti umuntu abatishiwe, ninshi naufikapo ukulabombela Yehova. Kabili uleibukisha ukuti, Yehova afwaya ulemupepa.—Ukusokolola 4:11.
Bushe ulingile ukubelengelapo na fimbi? Mona icipande citila “Mulandu Nshi Ningile Ukupepela?”