ABACAICE BEPUSHA UKUTI
Finshi Ifyo Mfwile Ukulacita pa Numa ya Kubatishiwa?—Ulubali 1: Twalilila Ukucita Ifingalenga Bucibusa Bobe na Yehova Bwatwalilila Ukuba Ubwakosa
Ifintu ifyacindama pamo nga ing’anda na motoka filafwaikwa ukufisakamana bwino. Ifi fine e fyo na iwe ulingile ukubika amano kuli bucibusa bobe na Lesa. Finshi ufwile ukulacita pa kuti bucibusa bobe na Lesa butwalilile ukuba ubwakosa pa numa ya kubatishiwa?
Ifili muli cino cipande
Lyonse uleisambilisha Icebo ca kwa Lesa
Ilembo apafumine icishinka icikalamba: “Muletwala ifisabo mu mulimo onse uusuma kabili ilyo muleya muleishibilako Lesa bwino bwino.”—Abena Kolose 1:10.
Umo aya amashiwi yalola: Pa numa ya kubatishiwa ulingile ukutwalilila ukubelenga Baibo no kulatontonkanya sana pa fyo ulebelenga.—Amalumbo 25:4; 119:97.
Ifyo wingenekela: Inshita shimo tawakulafwaya ukuisambilisha. Kuti walaumfwa kwati tawatemwa fye ukuisambilisha.
Ifyo wingacita: Uleisambilisha sana pa malyashi ya mu Baibo ayo watemwa. Ufwile ukuipangila programu ya kuisambilisha Baibo. Nga wapanga programu iisuma cikalakwangukila ukuisambilisha. Ico uleisambilishisha kufwaya ukuti utemwe sana Yehova ne Cebo cakwe. Nga uleisambilisha muli uyu musango, ukalaishiba ifingi kabili ukalatemwa ifyo uleisambilisha.—Amalumbo 16:11.
Fimbi ifyo wingacita: Pa kuti uleisambilisha bwino, uleba ku ncende ukushili icongo kabili ukushili ifingakupumfyanya.
Fimbi ifingakwafwa
Belenga:
“Bushe Baibolo Kuti Yangafwa Shani?—Ulubali 2: Ulecita Ifingalenga Watemwa Ukubelenga Baibolo”
“Finshi Ningalacita pa Kuti Nilapumbulwa?”
Tamba:
Kopolola:
Lyonse ulepepa kuli Yehova
Ilembo apafumine icishinka icikalamba: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.”—Abena Filipi 4:6.
Umo aya amashiwi yalola: Tulalanda na Lesa, na o alalanda na ifwe: Nga ulebelenga Icebo cakwe, ninshi ulekutika kuli ena; nga ulepepa kuli ena ninshi ulelanda nankwe. Ilyo ulepepa kuli Lesa kuti wamulomba ukuti akwafwe kabili kuti wamutasha pa fyo akupaala.
Ifyo wingenekela: Inshita shimo kuti walamona kwati upepa fye amapepo yamo yene. Limo kuti walatwishika nga ca kuti cine cine Yehova alakutika nga ulepepa nelyo nga kuti afwaya no kukutika kuli iwe.—Amalumbo 10:1.
Ifyo wingacita: Cila bushiku uletontonkanya pa fyo wingapepelapo. Nga ca kuti uko uli te kuti upepe ipepo ilitali, kuti wasunga fye ifyo ulefwaya ukupepelapo, e lyo waisapepelapo inshita imbi. Ulepepela pa fintu ifyo umona ukuti fyalicindama kabili ulepepelako na bantu bambi.—Abena Filipi 2:4.
Fimbi ifyo wingacita: Nga ca kuti ulemona ukuti ulepepa fye amapepo yamo yene, kuti wapepa kuli Yehova no kumweba ifyo ulemona. Alafwaya ukumfwa fyonse ifikusakamika, kumo fye ne fikusakamika pa mapepo ayo upepa.—1 Yohane 5:14.
Fimbi ifingakwafwa
Belenga:
Kopolola:
Lyonse ule-ebako abantu ifyo wasuminamo
Ilembo apafumine icishinka icikalamba: “Lyonse uleisakamana we mwine, ulesakamana ne fyo ulesambilisha. . . . Nga wacita ifyo ukaipususha we mwine na balekumfwa.”—1 Timote 4:16.
Umo aya amashiwi yalola: Nga ule-ebako abantu ifyo wasuminamo, ninshi na iwe ulekosha icitetekelo cobe. Nga ulecita ifi, kuti walenga abalekumfwa baisapusuka kabili na iwe wine kuti waisapusuka.
Ifyo wingenekela: Inshita shimo te kuti ufwaye ukwebako abantu ifyo wasuminamo. Limo kuti walatiina fye no kwebako abantu ifyo wasuminamo, maka maka pa sukulu.
Ifyo wingacita: Wilaleka ifyo umfwa pamo nga umwenso filelenga ulefilwa ukucita ifyo ufwile ukucita. Umutumwa Paulo alembele ukuti: “Lelo nga [nabila imbila nsuma] ukwabula ukuitemenwa, na lyo line nalipeelwa umulimo mfwile ukubomba.”—1 Abena Korinti 9:16, 17.
Fimbi ifyo wingacita: Nga ca kuti abafyashi bobe kuti bakusuminisha, kuti wakwata uwa bwananyina uwatemwa ukubila imbila nsuma uwingalakwafwa.—Amapinda 27:17.
Fimbi ifingakwafwa
Belenga:
“Cinshi Ntiinina Ukwebako Abantu Ifyo Nasuminamo?”
Ulelongana lyonse
Ilembo apafumine icishinka icikalamba: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana.”—AbaHebere 10:24, 25.
Umo aya amashiwi yalola: Icikalamba ico twila mu kulongana kupepa Yehova. Lelo kwaliba na fimbi fibili ifyo tunonkelamo nga twaya mu kulongana. Ica kubalilapo, nga ulelongana aba bwananyina balakukoselesha. Ica bubili, nga uleasukapo ilyo ulelongana ulakoselesha aba bwananyina.—Abena Roma 1:11, 12.
Ifyo wingenekela: Inshita shimo kuti wapumbulwa ica kuti wafilwa no kumfwa ifyo balesambilisha. Nelyo kuti waleka ukulalongana lyonse. Nalimo kuti walabika sana amano ku fya ku sukulu ica kuti walafilwa no kulalongana lyonse.
Ifyo wingacita: Ukwabula ukulekelesha ifya ku sukulu, ulefwaisha ukulalongana lyonse kabili uleshininkisha ukuti ulenonkelamo sana ilyo ulelongana. Uleitemenwa ukwasukapo. Pa numa ya kulongana uletashako nangu fye uwa bwananyina umo pa fyo acilanda ilyashi nelyo pa fyo acasuka bwino.
Fimbi ifyo wingacita: Uleipekanishisha libela ilyo ushilaya mu kulongana. Kopolola JW Library® app kabili uletinika apo balemba ukuti “Meetings” pa kuti uleishiba ifyo mukasambilila ilyo mukalalongana.
Fimbi ifingakwafwa
Belenga: