ABACAICE BEPUSHA UKUTI
Finshi Ifyo Mfwile Ukulacita pa Numa ya Kubatishiwa?—Ulubali 2: Ifyo Wingalacita pa Kuti Utwalilile Ukuba uwa Cishinka
Baibo itila “Yehova taakatane icisuma ku benda mu bololoke.” (Amalumbo 84:11) Bushe cipilibula shani ‘ukwenda mu bololoke’ nelyo ukuba uwa cishinka? Cipilibula ukuti ulingile ukulacita ifintu ifilanga ukuti ulacita ifyo walaile Yehova ilyo waipeele kuli ena. (Lukala Milandu 5:4, 5) Finshi ufwile ukulacita pa kuti wingatwalilila ukwenda mu bololoke pa numa ya kubatishiwa?
Ifili muli cino cipande
Ufwile ukutwalilila ukushipikisha nga wakwata amafya
Ilembo apafumine icishinka icikalamba: “Pa kwingila mu bufumu bwa kwa Lesa, tuli no kupita mu macushi ayengi.”—Imilimo 14:22.
Umo aya amashiwi yalola: Ukulanda fye icishinka, Abena Kristu bonse balakwata amafya. Amafya yamo ayo ukalakwata pamo nga ukukupumya nelyo ukukukanya ukubombela Lesa, ukulayakwata pa mulandu wa kuti uli Mwina Kristu. Yambi yena pamo nga amafya ya kubulwa indalama no kulwala yakuma fye abantu bonse.
Ifyo wingenekela: Inshita shimo ifintu fyakula-aluka kabili limo te kuti utemwe ne fyo fingaluka. Baibo itila ifintu ifyabipa kuti fyacitikila fye umuntu onse, nampo nga Mwina Kristu nelyo iyo.—Lukala Milandu 9:11.
Ifyo wingacita: Apo waishiba ukuti ukalakwata amafya, kuti waipekanishisha libela ifyo ukacita nga wayakwata. Nga wakwata amafya ulemona ukuti e nshita ya kukosha sana icitetekelo cobe kabili e nshita ya kushintilila sana pali Yehova. (Yakobo 1:2, 3) Mu kupita kwa nshita ukalaumfwa nge fyo umutumwa Paulo aumfwile. Atile: “Muli fyonse ndi na maka pantu kuli uulenkosha.”—Abena Filipi 4:13.
ILYASHI LYA CINE. “Pa numa fye ya kubatishiwa, bandume yandi balifumine mu cilonganino, abafyashi bandi balilwele kabili na ine nalilwele. Nga calinyangukile ukunenuka no kulaba ukuti ilyo naipeele kuli Lesa nalimulaile ukuti ico nali no kucindamika sana kulamupepa. Lelo ukuipeela kuli Lesa e kwalengele nshipikishe aya amafya.”—Karen.
Fimbi ifyo wingacita: Kuti wasambililako pali Yosefe. Kuti wabelenga ilyashi lyakwe mwi buuku lya Ukutendeka icipandwa 37 na icipandwa 39 ukushinta ku 41. Tontonkanya pali ifi: Mafya nshi ayabula ukwenekela ayo akwete, kabili acitile shani pa kuti ashipikishe? Bushe Yehova amwafwile shani?
Fimbi ifingakwafwa
Belenga:
Kopolola:
Ufwile ukutwalilila ukukaana amatunko
Ilembo apafumine icishinka icikalamba: “Umuntu onse atunkwa ilyo ulunkumbwa lwakwe umwine lwamusembeleka.”—Yakobo 1:14.
Umo aya amashiwi yalola: Inshita shimo bonse fye tulakwata amatunko. Nga ca kuti tatukeene aya amatunko kuti twacita ifyabipa.
Ifyo wingenekela: Pa numa ya kubatishiwa, ukalakwata “ulunkumbwa lwa mubili.” (2 Petro 2:18) Kuti watunkwa no kucita ubulalelale.
Ifyo wingacita: Ulingile ukupangila limo ifya kucita ilyo ushilatunkwa, pa kuti ulunkumbwa lwikalenga ukacite ifyabipa. Uleibukisha ifyo Yesu alandile. Atile: “Takuli uwingabombela bashikulu babili.” (Mateo 6:24) Kuti wasala uufwile ukuba shikulu obe. Ulingile ukusala Yehova. Nangu ulunkumbwa lwingakula shani kuti wasalapo ukukanacita ifyo watunkwa ukucita.—Abena Galatia 5:16.
Fimbi ifyo wingacita: Ufwile ukwishiba ifyo ucitamo bwino ne fyo ushicitamo bwino. Ulesala ifibusa ifingalenga wakwata imibele iisuma. Ulesengauka abantu abengalenga cakukosela ukucita ifisuma. Na kabili uletaluka ififulo ne fintu fimbi ifingalenga cakukosela ukucita ifisuma.—Amalumbo 26:4, 5.
Ufwile ukutwalilila ukuba uwacincila
Ilembo apafumine icishinka icikalamba: “Onse uwa muli imwe alange ukucincila kumo kwine . . . ukufika na ku mpela, pa kuti mwiba abanang’ani.”—AbaHebere 6:11, 12.
Umo aya amashiwi yalola: Umuntu nga talebika amano ku mulimo wakwe kuti aleka ukubombesha kabili kuti aba umunang’ani.
Ifyo wingenekela: Ufwile walitemenwe kabili wali uwacincila ilyo wabatishiwe. Walitemenwe sana Yehova. Lelo mu kupita kwa nshita kuti cakukosela ukutwalilila ukunakila Yehova muli fyonse, kabili nga caba ifi kuti wafuupuka kabili kuti waleka ukuba uwacincila sana.—Abena Galatia 5:7.
Ifyo wingacita: Twalilila ukucita ifisuma na lintu uleumfwa kwati taulefwaya ukucita ifisuma. (1 Abena Korinti 9:27) Ilyo ulecita ifi, twalilila ukwishibilako Yehova kabili lyonse ulepepa kuli ena pa kuti wingatwalilila ukupalama kuli Wiso wa ku muulu. Kabili twalilila no kukosha bucibusa bobe na batemwa ukubombela Yehova.
Fimbi ifyo wingacita: Uleibukisha ukuti Yehova alikutemwa sana kabii ali-ipekanya ukukwafwa. Nga ca kuti inshita shimo waleka ukuba uwacincila, wilamona kwati Yehova nakufulilwa. Baibo itila: “Apeela amaka ku wanaka; kabili akosha uushikwete amaka.” (Esaya 40:29) Mu kupita kwa nshita akakupaala nga uleibikilishako pa kuti ube uwacincila.
Fimbi ifingakwafwa
Belenga:
Tamba:
Icishinka ca kuti: Nga ca kuti ule-enda mu bololoke ukalalenga Yehova alesekelela! (Amapinda 27:11) Yehova akatemwa nga wasalapo ukuba ku lubali lwakwe kabili akalakupela fyonse ifyo wakulakabila pa kuti wingalacimfya amatunko ya kwa Satana.