Icalo ca Russia Naciimina Icalo ca Ukraine

Pa 24 February 2022 ku maca, icalo ca Russia calisansa icalo ca Ukraine. Nangu ca kuti inkondo naitendeka, bakateka abengi mwi sonde lyonse balyeseshe ukucita ifingalenga ukuti iyi inkondo itendeka. Bushe iyi nkondo yalakuma shani ifyalo mwi sonde lyonse? Inshiku ishinono ishapita ba secretary-general aba kabungwe ka United Nations ba António Guterres batile: “Inkondo kuti yalenga fye abantu ukucula, ifintu kuti fyaonaika nelyo konaulwa umupwilapo mu Bulaya kabili no mutende mwi sonde kuti wapwa.”

Bushe ifi filecitika filefikilisha shani ifyo Baibolo yalandapo?

• Yesu Kristu asobele ukuti kukaba inshita ilyo “uluko lukemina uluko lubiye no buteko bukemina ubuteko bubiye.” (Mateo 24:7) Belengeni icipande citila “Finshi Twingeshibilako ‘Inshiku sha Kulekelesha’?” pa kuti mumone ifyo Baibolo ilanda pa nkondo ishilecitika muno nshiku, ishilefikilisha ifyo Yesu asobele.

• Ibuuku lya mu Baibolo Ilya Ukusokolola lilanga ukuti uwaikele pali kabalwe “uwakashika” e mininako inkondo kabili ‘alafumya umutende pe sonde.’ (Ukusokolola 6:4) Belengeni icipande citila “Bushe Abaume Bane Abanina Pali Bakabalwe ni Bani?” pa kuti mumone ifyo ubu busesemo bulekuma inkondo shilecitika muno nshiku.

• Ibuuku lya mu Baibolo ilya kwa Daniele lyasobele ukuti “imfumu ya ku kapinda ka ku kuso” ikalwa ne “mfumu ya ku kapinda ka ku kulyo.” (Daniele 11:25-45) Tambeni vidio itila Ubusesemo Ubwafikilishiwa—Daniele Icipandwa 11 pa kuti mumone ico ubuteko bwa Russia na mabuteko ya fyalo ifibombela pamo nabo betilwa ukuti imfumu ya ku kabinda ka ku kuso.a

• Ibuuku lya Ukusokolola lyalilondolola ne “nkondo ya bushiku bukalamba ubwa kwa Lesa Wa Maka Yonse.” (Ukusokolola 16:14, 16) Nomba iyi te nkondo ya mabuteko nge iyi iiliko. Belengeni icipande citila “Bushe Inkondo ya Armagedone Cinshi?” pa kuti mwishibilepo na fimbi pa fikacitika ku ntanshi.

Mulandu nshi twingakwatila isubilo lya kuti ifintu fikawama ku ntanshi?

• Baibolo itila Lesa akalenga “inkondo ukupwa ukufika ku mpela sha pano isonde.” (Amalumbo 46:9) Belengeni icipande citila “Isubilo lya Kuti Ifintu Fikawama ku Ntanshi lya Cine” pa kuti mumone ifyo Lesa atulaya.

• Yesu asambilishe abasambi bakwe ukulapepa ukuti Ubufumu bwa kwa Lesa bwise. (Mateo 6:9,10) Ubufumu bwa kwa Lesa buteko bwa ku muulu ubukacita ifyo Lesa afwaya ukucitila abantu kabili pa fyo Lesa afwaya ukucita paba no kuleta umutende pe sonde. Pa kuti mwishibilepo na fimbi pa fyo Ubufumu bukamucitila, tambeni vidio itila Bushe Ubufumu bwa kwa Lesa ni Cinshi?

Mu calo ca Ukraine mwaba Inte sha kwa Yehova ukucila pali 129,000. Nga filya ba Nte mu fyalo fimbi bacita, aba aba bwananyina nabo balapashanya Yesu, kanshi tabaitumpa mu fya calo kabili tabalwako inkondo. (Yohane 18:36) Inte sha kwa Yehova mwi sonde lyonse balabila ‘imbila nsuma ya bufumu’ ku bantu pantu e bukapwisha fye amafya abantu bakwata ukubikako fye ne nkondo. (Mateo 24:14) Mukwai kuti mwatutumina nga mulefwaya ukwishibilapo na fimbi pa fyo Baibolo yatulaya ifilenga twaba ne subilo.