Bapolitishani Balesoka Abantu Pali Armagedone—Finshi Baibolo Yalandapo?

Ulucelo pali Cimo, pa 10 October, 2022, icalo ca Russia calitumine iminshinga mu misumba ya mu Ukraine, pa kuti cilandula pa fyo icalo ca Ukraine caonawile ubulalo ubwacindama ubwaba pa kati ka Crimea na Russia. Ilyo ifi ifyonse fyacitike ninshi papita fye inshita inono ukutula apo bapolitishani bamo balandile ukuti Armagedone kuti yaisa nomba line.

• “Ukutula apo [kateka wa calo ca U.S John F.] Kennedy atumine umunshinga ku calo ca Cuba, uno e muku Armagedone yapalamishapo sana . . . Ndemona ukuti te kuti mubomfye amabomba ya manyukiliya ukwabula ukuti kube Armagedone.”—E fyalandile Kateka wa calo ca U.S. Joe Biden, October 6, 2022.

• “Ninsumina ukutila kuti kwaba Armagedone nomba line, kabili ikakuma fye isonde lyonse.”—E fyalandile Kateka wa calo ca Ukraine Volodymyr Zelensky ilyo bamwipwishe pa fingacitika nga babomfya amabomba ya manyukiliya, BBC News, 8 October, 2022.

Bushe ukubomfya amabomba ya manyukiliya kuti kwalenga Armagedone yaisa? Finshi Baibolo yalandapo?

Bushe ukubomfya amabomba ya manyukiliya kuti kwalenga Armagedone yaisa?

Awe. Muli Baibolo ishiwi lya kuti “Armagedone” lisangwa fye umuku umo pa Ukusokolola 16:16. Ili shiwi talilosha ku nkondo isho ifyalo filwa, lelo lilosha ku nkondo ya kwa Lesa ne “shamfumu sha ba pano isonde shonse.” (Ukusokolola 16:14) Lesa akabomfya inkondo ya Armagedone pa kufumyapo amabuteko ya bantunse.—Daniele 2:44.

Nga mulefwaya ukwishibilapo na fimbi pa fikacitika pe sonde Armagedone nga yaisa, belengeni icipande citila Bushe Inkondo ya Armagedone Cinshi?

Bushe isonde na bantu bakonaulwa ku nkondo ya manyukiliya?

Awe. Nangu ca kuti bakateka abantunse kuti babomfya amabomba ya manyukiliya ku ntanshi, Lesa takasuminishe ukuti isonde likonaulwe. Baibolo itila:

• “Isonde lyaikalilila fye umuyayaya.”—Lukala Milandu 1:4.

• “Abalungama e bakekala mu calo, kabili bakekalamo umuyayaya.”—Amalumbo 37:29.

Lelo, ubusesemo bwa mu Baibolo ne filecitika muno nshiku filelangilila ukuti nomba line kwalaba ifintu ifikalamba ifyalayaluka pano isonde. (Mateo 24:3-7; 2 Timote 3:1-5) Pa kuti mwishibe ifyo Baibolo ilanda pa fikacitika ku ntanshi, kuti mwatendeka ukusambilila Baibolo na ba Nte.