Ifingalenga Twaba ne Subilo mu 2023—Finshi Baibo Yalandapo?

Ilyo umwaka wa 2023 uletendeka, bonse tulesubila ukuti ifisuma fikacitike mu mikalile yesu na balupwa lwesu. Mulandu nshi twingabela ne subilo?

Baibo ilalenga twaba ne subilo

Baibo ilatweba imbila nsuma ya kuti amafya tukwata pali ino nshita tayakatwalilile lelo yali no kupwa nomba line. Na kuba ifyaba mu Baibo “fyalembelwe ku kutufunda, pa kuti mu. . . cisansamushi ca mu Malembo tube ne subilo.”—Abena Roma 15:4.

• Pa kuti mwishibe na fimbi ifyo Baibo yatulaya, belengeni icipande citila “Isubilo lya Kuti Ifintu Fikawama ku Ntanshi lya Cine.”

Isubilo ilingamwafwa pali ino nshita

Isubilo ilyo Baibo ilenga twakwata “lyaba nge nanga ya mweo.” (AbaHebere 6:19) Ili subilo lilalenga tuleshipikisha amafya no kulaba ne nsansa pali ino nshita, kabili lilalenga twaishiba no kuti tukaba ne nsansa umuyayaya. Ku ca kumwenako:

• Moneni ifyo Baibo yalaya fya-afwile umwaume uo cakosele ukuleka ukunwa ubwalwa. Tambeni vidio itila Nalefwaisha Ukuleka Ukunwa Ubwalwa.

• Moneni ifyo Baibo yalaya fingatwafwa nga ca kuti lupwa wesu nelyo cibusa afwa. Tambeni vidio itila Ifingasansamusha Abaleloosha.

Mulekosha isubilo lyenu

Abantu abengi balasubila ukuti ifintu ifisuma fikacitika, nomba balatwishika nga ca kuti ifyo basubila fikacitika. Ifyo Baibo yalaya fyena fyalipusanako. Mulandu nshi? Pantu amalayo yaba mu Baibo ni Yehova Lesaa “uushingabepa” e walaya. (Tito 1:2) Yehova fye e wakwata fye amaka ya kufikilisha fyonse ifyo alaya; kuti ‘acita fyonse ifyo alefwaya.’—Amalumbo 135:5, 6.

Tulemukoselesha ukusambilila Baibo umwaba amalayo ayo twingacetekela. Kuti mwacetekela ifyo Baibo yalaya nga ‘mulefwailisha mu Malembo.’ (Imilimo 17:11) Kuti mwaimwena mwebene nga mwaeshapo ukusambilila Baibo naifwe. Tendekeni umwaka wa 2023 ne subilo lya kuti ifintu ku ntanshi fikawama!