Bushe Icine Calicindama Muno Nshiku?

Bushe na imwe mwalimona ukuti pali ino nshita cileya cilekoselako fye ukulekanya icine ku bufi? Pali ino nshita abantu balasumina ifintu ukulingana ne fyo abene baleumfwa pali ifyo fintu nelyo ifyo baletontonkanya, tababika amano ku kufwaya ukwishiba nga fya cine nelyo nga fintu fyashininkishiwa. Abantu abengi mwi sonde bamona kwati takwaba icine.

Ukufuma fye na kale, abantu balemona kwati takwaba icine. Nalimo imyaka 2,000 iyapita, kateka umwina Roma Ponti Pilato aipwishe Yesu ati: “Icine cinshi?” (Yohane 18:38) Nangu ca kuti Pilato talolelele ukuti Yesu asuke, icipusho aipwishe calicindama sana. Ifyo Baibo yalanda kuti fyamwafwa ukwishiba ukuti ici cine e lyo ubu bufi, icintu ico abantu abengi bafilwa ukwishiba.

Bushe icine e ko caba?

Ee e ko caba. Baibo nga yabomfya ishiwi lya kuti “icine,” ninshi ilelanda pa fintu ifyashininkishiwa e lyo na pa fintu ifyalungama. Isambilisha ukuti Yehovaa Lesa e Ntulo ya cine, imwita ukuti ni “Lesa wa cishinka.” (Amalumbo 31:5) Mu Baibo mwaba icine icafuma kuli Lesa, kabili ipashanya ici icine ku lubuuto, pantu kuti catutungulula muli cino calo umwaba abantu abashaishiba ubupusano ubwaba pa cine no bufi.—Amalumbo 43:3; Yohane 17:17.

Kuti mwacita shani pa kuti mwishibe icine?

Lesa tafwaya twasumina icine icaba mu Baibo ukwabula ukutontonkanyapo. Lelo afwaya tulebomfya amaka ya kupelulula ukucila ukulakonka fye ifyo tuleumfwa. (Abena Roma 12:1) Afwaya twamwishiba no kumutemwa “no kutontonkanya [kwesu] konse,” kabili afwaya twashininkisha fwe bene ukuti ifyo tulesambilila mu Baibo fya cine.—Mateo 22:37, 38; Imilimo 17:11.

Bushe ubufi bwatendeke shani?

Baibo ilanda ukuti uwabalilepo ukubepa mulwani wa kwa Lesa, Satana Kaseebanya, uo Baibo ita no kuti “wishi wa bufi.” (Yohane 8:44) Alilandile ifya bufi pali Lesa ku bantu bakubalilapo. (Ukutendeka 3:1-6, 13, 17-19; 5:5) Ukutula ilya nshita Satana alitwalilila ukubepa abantu pali Lesa kabili tafwaya baishiba icine.—Ukusokolola 12:9.

Cinshi ubufi bwafulila pali ino nshita?

Muli shino inshiku isho Baibo ita ukuti “inshiku sha kulekelesha” e lyo Satana acililemo ukubepa abantu. Ilingi line abantu balabepa nga balefwaya ukuti abantu beishiba icishinka. (2 Timote 3:1, 13) Pali ino nshita mu mipepele iingi mwalifula sana ubufi. Baibo yasobele ukuti abantu “bakailonganikila bakasambilisha aba kubeba ifyo abene balefwaya ukumfwa,” kabili abene balasalapo ukuleka “ukukutika ku cine.”—2 Timote 4:3, 4.

Mulandu nshi icine cacindamina?

Icine cilalenga abantu bacetekelana. Abantu nga tabacetekele abantu banabo kuti bafilwa ukulaumfwana bwino, kabili na bantu mu bwikashi te kuti bekatane. Baibo ilanda ukuti Lesa afwaya ukupepa kwesu kuleba ukwa cine. Itila: “Abamupepa bali no kupepela [Lesa] mu mupashi na mu cine.” (Yohane 4:24) Pa kuti mwishibe ifyo icine icaba mu Baibo cingalenga mwaishiba ubufi ubo ababa mu mipepele basambilisha no kuleka ukukonka ifya bufi, belengeni icipande citila “Umulandu Abantu Bamo Cibafisha Ukutemwa Lesa.”

Cinshi Lesa afwaila naishiba icine?

Lesa afwaya ukuti mukapusuke, lelo mulingile ukusambilila icine pali ena pa kuti mukapusuke. (1 Timote 2:4) Nga mwasambilila ifyo Lesa amona icalungama ne calubana, kabili mwatendeka no kucita icalungama, ninshi mukaba cibusa wakwe. (Amalumbo 15:1, 2) Lesa alitumine Yesu pano isonde pa kuti abantu basambilile icine, kabili afwaya tuleumfwila ifyo Yesu alesambilisha.—Mateo 17:5; Yohane 18:37.

Bushe Lesa akafumyapo ubufi?

Ee akabufumyapo. Lesa tomfwa bwino abantu nga balebepa abantu banabo no kubaliila amasuku pa mutwe. Alilaya ukuti akonaula bonse abashifwaya ukuleka ukubepa. (Amalumbo 5:6) Lesa nga acita ifi, akafikilisha ne fyo alaya ukuti: “Amashiwi ya ulanda ifya cine yakekalilila pe.”—Amapinda 12:19.