Bushe Amangalo Ayaba ku ma Olympic Kuti Yalenga Abantu Baikatana?—Finshi Baibo Yalandapo?

Abantu nalimo 5 bilioni baletamba amangalo ayali ku ma Olympic ya mu 2024, kabili abantu ukufuma mu fyalo 206 e balecimfyanya muli aya amangalo. Ba Thomas Bach, ba presidenti ba kabungwe ka International Olympic Committee balandile ukuti, “aya amangalo yalalenga abantu baikatana kabili baba no mutende mwi sonde lyonse. Kanshi natwangalile pamo aya amangalo ayengalenga abantu mwi sonde lyonse baikatana, nangu ca kuti balipusana inkulilo.”

Bushe amangalo ya ma Olympic kuti yalenga abantu baikatana no kuba no mutende? Bushe kwaliba icingalenga twacetekela ukuti kukaba umutende wa cine cine?

Bushe ca cine aya amangalo kuti yalenga abantu baikatana no kuba no mutende?

Amangalo ya ku ma Olympic aya uno mwaka tayalengele abantu ukulatontonkanya fye pa fyangalo. Lelo aya amangalo nayalenga abantu ukulalanda sana pa fya ma politiki, kabili ici nacilenga abantu balalanda pa nsambu sha bantu, ukuba sana na kapaatulula ka nkanda, akapaatulula ka fya mapepo, na pa fyo abantu bamo baba abapiina sana e lyo bambi abakankaala sana.

Abantu abengi balatemwa ukutamba amangalo ya kucimfyanya ayaba ku ma Olympic. Nangu abantu balitemwa ukutamba aya amangalo, te kuti yalenge baikatana no kuba no mutende.

Baibo yalisobele imibele iyo abantu bakwata muno nshiku iilenga ca-afya ukwikatana. (2 Timote 3:1-5) Nga mulefwaya ukwishibilapo na fimbi pa masesemo ya mu Baibo, belengeni icipande citila “Did the Bible Predict the Way People Think and Act Today?”

Ifikalenga abantu bakekatane

Mu Baibo mwaliba ifingalenga twaba ne subilo lya kuti abantu mwi sonde lyonse bakekatana. Baibo yatulaya ukuti abantu bonse mwi sonde bakekatana ilyo ubuteko bwa ku muulu ubwitwa no kuti “Ubufumu bwa kwa Lesa” bukalateka.—Luka 4:43; Mateo 6:10.

Imfumu ya ubu Bufumu, Yesu Kristu, akashininkisha ukuti mwi sonde lyonse muli umutende. Baibo itila:

• “Abalungami bakapuuka nge cani, no mutende ukaba konse.”—Amalumbo 72:7.

• “Akapususha umupiina uulepunda mutuule, . . . Akabapususha ku bankalwe na kubacusha abantu.”—Amalumbo 72:12, 14.

Na muno nshiku mwine, ifyo Yesu alesambilisha fyalilenga abantu abengi nga nshi mu fyalo 239 baikatana. Balisambilila ukukanapata abantu banabo. Pa kuti mwishibilepo na fimbi, belengeni icipande citila “Ifyo Twingacita pa Kuleka Ukuba no Lupato.”