Mibele Nshi Umwina Kristu Afwile Ukukwata?—Ifyo Baibo Yalandapo.

Muno nshiku abantu abengi mwi sonde lyonse balanda ukuti Bena Kristu, lelo balacita ifintu ifikalifya abantu bambi. Bamo ni bakaitemwe, tabaaba ne cishinka nelyo icikuuku. Bambi nabo tabaaba ne cishinka ku bena mwabo. Ifi bacita filenga bamo balatontonkanya ukuti: ‘Mibele nshi Umwina Kristu Afwile ukukwata?’

Ifyo cipilibula ukuba umwina Kristu

Calyanguka umuntu ukulanda ukuti Mwina Kristu. Lelo ukulanda fye ukuti ndi Mwina Kristu tacipilibula ukuti ninshi umuntu Mwina Kristu. Ukulingana ne fyo Baibo ilanda, pa kuti umuntu abe Umwina Kristu afwile ukuba umusambi wa kwa Yesu. (Imilimo 11:26) Yesu umwine alandile ukuti: “Nga mwatwalilila ukukonka ifyo nanda, ninshi ca cine muli basambi bandi.” (Yohane 8:31) Kwena takuli uwingakumanisha ukukonka fyonse fye ifyo Yesu alandile. Lelo umwina Kristu alesha na maka ukukonka ifyo Yesu alesambilisha kabili alacita ifi cila bushiku mu mikalile yakwe. Tontonkanyeni pali ifi ifya kumwenako.

Abena Kristu balalanga ukutemwa kwa cine

Ifyo Yesu alandile: “Ndemupeela ifunde ilipya, ilya kuti muletemwana; ifyo namutemwa, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.”—Yohane 13:34, 35.

Ifyo Yesu acitile: Yesu alelanga ukutemwa kwa cine kuli bonse, nampo nga bakankaala nelyo abapiina, nampo nga balilumbuka nelyo iyo. Aleundapa abalwele, aleliisha abali ne nsala, kabili ali-ipeleshe fye no kufwila abantu.—Mateo 14:14-21; 20:28

Ifyo Abena Kristu bacita: Abena Kristu balalanga ukutemwa kwa cine pantu balepeelako bambi ifyo bakwete, tabakwata akapaatulula kabili balabelela uluse abantu bambi. Balafwilisha abalekabila ukubafwa, kabili balaipeelesha pa kuti fye bafwilishe abantu.—1 Yohane 3:16.

Abena Kristu baliba ne cishinka

Ifyo Yesu alandile: “Nine . . . icine.”—Yohane 14:6.

Ifyo Yesu acitile: Yesu ali ne cishinka muli fyonse ifyo alelanda ne fyo alecita. Talebomfya amaka yakwe ku kulenga abantu bacita ifyo alefwaya ukuti bacite, nelyo ukubepa ubufi. Abantu bamwishibe ukuti ali wa cishinka. Lyonse aleba ne cishinka, nangu ca kuti inshita shimo abantu balekalipa pa mulandu ne fyo alelanda.—Mateo 22:16; 26:63-67.

Ifyo Abena Kristu bacita: Abena Kristu tababepa. Balalipila imisonko, tabeeba, kabili ababomba incito balabomba ama-awala ayakumanina ukulingana na malipilo ayo ababengisha incito babapeela. (Abena Roma 13:5-7; Abena Efese 4:28) Tabaliila abantu amasuku pa mutwe, tababepa ilyo balelemba amashindano, nelyo ukubepa ubufi pa mapepala ya kwingililapo incito.—AbaHebere 13:18.

Abena Kristu baliba ne cikuku

Ifyo Yesu alandile: “Bonse mwe balecula kabili abafininwa, iseni kuli ine kabili nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mukatuusha. Pantu ikoli lyandi talyafina, ne cipe candi calyanguka.”—Mateo 11:28-30.

Ifyo Yesu acitile: Yesu ali ne cikuuku kabili alecita ifyalelenga ca-angukila abantu ukuya kuli ena. Alepokelela abana abanono, alesansamusha abali no bulanda, kabili alecindika abantu.—Marko 10:13-15; Luka 9:11.

Ifyo abena Kristu bacita: Abena Kristu balaba ne cikuuku ilyo balelanda na bantu; tababa ne cilumba nelyo ukulanda amashiwi ayabipa. (Abena Efese 4:29, 31, 32) Balabika amano ku bantu kabili balafwaya ne nshila sha kubafwilamo.—Abena Galatia 6:10.

Abena Kristu balatwalilila ukuba aba cishinka ku bena mwabo

Ifyo Yesu alandile: “Kanshi ico Lesa alundanya, umuntu e cilekanya.”—Marko 10:9.

Ifyo Yesu acitile: Nangu ca kuti Yesu taupile, alekoselesha abaupana ukutwalilila ukuba ne cishinka ku bena mwabo. (Mateo 19:9) Alisokele abaupana pa fintu ifingalenga icupo cabo capwa.—Mateo 5:28.

Ifyo Abena Kristu bacita: Abena Kristu tabacita nangu fimo ifilanga ukuti tabacindika icupo. (AbaHebere 13:4) Abaupana balacita ifilanga ukuti balitemwana kabili balacindikana.—Abena Efese 5:28, 33