Photo by Stringer/Getty Images

MULELOLA!

Inkondo Ishili ku Middle East—Finshi Baibo Yalandapo?

Abantu mu calo na basakamana sana pa fili no kucitika pa mulandu ne fimfulunganya ifilecitika mu America, mu Israel, na mu Iran. Bushe ifi ifilecitika fili no kubipilako ica kuti fikakuma ne fyalo fimbi? Bushe amabuteko kuti yapwisha ifimfulunganya no kulenga mu calo conse mwaba umutende?

Abantu abaishibako amasesemo ya mu Baibo nalimo kuti balatontonkanya ukuti ifimfulunganya filecitika mu calo ca Israele e lyo ne fyalo fyabela mupepi na Israel (Middle East) kuti fyalenga inkondo ya Armagedone iyo balandapo mwi buuku lya Ukusokolola yatendeka.

Finshi Baibo Yalandapo?

Bushe amabuteko yali no kupwisha inkondo ili ku Israel e lyo ne fyalo fyabela mupepi na Israel?

Baibo ilanda ukuti: “Mwilacetekela intungulushi nelyo umuntunse umbi, uushingamupususha.”—Amalumbo 146:3.

Tatwishibe nga ca kuti amabuteko yali no kupwisha ifimfulunganya fili kuli iyi ncende no kulenga kukabe umutende. Na lyo line, Baibo yalilanda mu kulungatika ukuti takuli kateka umuntunse, amabuteko, nelyo ibumba lya bantu ilingapwisha inkondo no kulenga kwaba umutende umuyayaya. Ni Lesa fye ‘e ukapwisha inkondo mwi sonde lyonse.’—Amalumbo 46:9.

• Nga mulefwaya ukwishibilapo na fimbi, belengeni Ulupungu lwa kwa Kalinda ulukwete umutwe uuleti “Bushe Inkondo Ikapwa Shani?”

Bushe inkondo ili ku Israele ne fyalo fyabela mupepi na Israel ilefikilisha ubusesemo?

Baibo ilanda ukuti: “Mukalaumfwa inkondo e lyo na malyashi ya nkondo. . . . Uluko lukemina uluko lumbi no bufumu bukemina ubufumu bumbi.”—Mateo 24:6, 7.

Ifimfulunganya ifili mu Israel na mu fyalo fyabela mupepi na Israel filelangilila fye ukuti “icalo cili ku mpela,” kabili filelangilila no kuti tuleikala “mu nshiku sha kulekelesha.” (Mateo 24:3; 2 Timote 3:1) Ifi inkondo shifulile filelangilila fye ukuti nomba line, Lesa ali no kucitapo cimo pa kupwisha inkondo elyo na mafya yambi ayo abantunse bonse bakwata.

• Nga mulefwaya ukwishibilapo na fimbi, belengeni icipande citila ““Finshi Twingeshibilako Inshiku sha Kulekelesha, Nelyo ‘Inshita ya Mpela’?””

Bushe Armagedone ikatendekela ku Israele ne fyalo fyabela mupepi na Israel?

Baibo ilanda ukuti: “Kabili fyashilonganike ku cifulo ico beta mu ciHebere ukuti Armagedone.”—Ukusokolola 16:16.

Inkondo ya Armagedone te nkondo ya mabuteko ya bantunse beka beka iikatendekela ku Israele ne fyalo fyabela mupepi na Israel. Lelo ni nkondo ya calo conse iyo amabuteko ya bantunse yakalwa na Lesa.

• Nga mulefwaya ukwishibilapo na fimbi, belengeni icipande citila “Bushe Inkondo ya Armagedone Cinshi?”

Finshi fingatwafwa ukukanaba no mwenso ilyo mu calo mulecitika ifimfulunganya?

Baibo itila: “Mwisakamikwa nangu cimo, lelo muli fyonse lekeni Lesa eshibe ifyo mulelomba, mu kupepa no kupaapaata pamo no kutootela.”—Abena Filipi 4:6.

Yehovaa Lesa afwaya ukuti tulepepa kuli ena. Pantu Lesa alatusakamana, akulakutika amapepo yesu kabili akulatwafwa ukushipikisha amafya. (1 Petro 5:7) Pa kuti tuleshipikisha amafya, Lesa alilenga twaishiba icalenga abantu batwalilila ukulwa inkondo, akalenga inkondo ikapwe kabili akafumyapo ifilenga tulekalipwa no kucula.—Ukusokolola 21:3, 4.

• Nga mulefwaya ukwishibilapo na fimbi pa fyo Lesa acita pa kutwafwa, belengeni icipande citila “You Can Find Words of Comfort in the Bible.”

[Futunoti]