Bushe Lesa Alikwata Ishina?

Icasuko ca mu Baibolo

Abantu bonse balikwata amashina. Bushe Lesa ena e ushingakwata ishina? Umuntu onse afwile ukukwata ishina ilyo ifibusa fyakwe fifwile ukulabomfya. Kanshi na Lesa afwile ukukwata ishina ilyo tufwile ukulabomfya fwe fibusa fyakwe.

Lesa alilanda mu Baibolo ati: “Nine Yehova. Ilyo e shina lyandi.” (Esaya 42:8) Nangu ca kuti balamwita no kuti “Lesa Wa Maka Yonse,” “Shikulu Mulopwe,” na “Kabumba,” alicindika bakapepa bakwe pa kubeba ukuti balemwita ishina lyakwe.—Ukutendeka 17:1; Imilimo 4:24; 1 Petro 4:19.

Mu maBaibolo ayengi mwaliba ishina lya kwa Lesa pa lembo lya Ukufuma 6:3. Pali ili ilembo patila: “Ilyo nalemoneka kuli Abrahamu, kuli Isaki na kuli Yakobo, baishibe ukuti nine Lesa Wa Maka Yonse, lelo nshailengele ukwishibikwa kuli bena ukuti ishina lyandi nine Yehova.”

Mu Cibemba ishina lya kwa Lesa lyapilibulwa ati Yehova kabili lyalibomfiwa pa myaka iingi. Nangu ca kuti abengi batemwa ukumwita ati “Yahweh,” ishina lya kuti Yehova e lyaishibikwa sana. Iciputulwa ca kubalilapo ica mu Baibolo calembelwe mu ciHebere. Pa kubelenga iciHebere, batendekela ku kulyo no kuya ku kuso. Mu ciHebere, ishina lya kwa Lesa balilemba mu filembo ifi 4, יהוה. Ifi ifilembo e fyapilibulwa ati YHWH.