Bushe Lesa Alisuminisha Ukuupa Impali?

Icasuko ca mu Baibolo

Pa nshita imo, Lesa alisuminishe abaume ukulaupa impali. (Ukutendeka 4:19; 16:1-4; 29:18-29) Lelo Lesa te waebele abantu ukulaupa impali. Apeele Adamu umukashi umo fye.

Lesa aebele Yesu Kristu ukweba abantu ukulakonka filya Lesa alefwaya ukutula pa kutendeka ukuti umwaume alekwata fye umukashi umo. (Yohane 8:28) Ilyo bamwipwishe pa cupo, Yesu atile: “Uwababumbile pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo.’”—Mateo 19:4, 5.

Pa numa, Lesa alengele umusambi wa kwa Yesu umo ukulemba ati: “Umwaume onse abe no mukashi wakwe kabili umwanakashi onse abe no mulume wakwe.” (1 Abena Korinti 7:2) Baibolo ilanda no kuti umwaume onse uwaupa, uwakwata imilimo mu cilonganino afwile ukuba “umulume wa mukashi umo.”—1 Timote 3:2, 12.