Ndakumbwa Umwanakashi Munandi Nelyo Umwaume Munandi—Bushe Ninshi Naba pa Babembuka na Baume Banabo Nelyo Abanakashi Banabo?
Awe te ifyo!
Icishinka: Ilingi line, ukukumbwa umwanakashi nelyo umwaume munobe kulapwa.
E fyo cali kuli Lisette uwalekumbwa umwanakashi munankwe pa nshita imo. Atile: “Ku sukulu nasambilile ukuti ilyo umwaice alekula, alomfwa ifyapusanapusana mu mubili. Imona kwati abaice nga baishiba ificitika mu mibili yabo ilyo balekula, kuti baishiba ukuti ukuti ukukumbwa umwanakashi munobe nelyo umwaume munobe kulapwa kabili te kuti baletontonkanya ukuti e fyo bafyalwa.”
Abaice bonse bafwile ukusalapo cimo, nampo nga kulacita ubulalelale ubusekele muli cino calo ukulakonka ifyo Icebo ca kwa Lesa cilanda
Inga ca kuti tauleleka ukukumbwa umwanakashi munobe nelyo umwaume munobe? Bushe Lesa alilufyanya pa kukaanya umuntu ukulaala no mwanakashi munankwe nelyo umwaume munankwe nga uo atemwa?
Nga wayasuka ukuti alilufyanya, ninshi ufwile ukwishiba ukuti abatontonkanya ifi ni balya abamona kwati umuntu afwile ukulaala no muntu umbi lyonse ilyo akwata insuuna. Baibolo ilacindamika abantu ilyo itila kuti basalapo ukukanacita ubulalelale ilyo baba ne nsuna.—Abena Kolose 3:5.
Ifyo Baibolo yalanda fyaliba fye bwino. Yeba fye bonse abafwaya ukulaala na banakashi banabo nelyo abaume banabo e lyo na bacita ubulalelaele ubwashala ukuti bafwile ‘ukufulumuka ubulalelale.’ (1 Abena Korinti 6:18) Na kuba, abaume abengi abatunkwa ukulaala na banakashi nelyo abanakashi abatunkwa ukulaala na baume balaikaanya ukucita ubulalelale. Kanshi na bafwaya ukulaala na baume banabo nelyo abanakashi banabo bafwile ukulaikaanya nga balefwaya ukusekesha Lesa.—Amalango 30:19.