ABACAICE BEPUSHA UKUTI
Cinshi Abafyashi Bankanisha Ukuya mu Kwangala?
Elenganya ukuti abanobe bakweba ukuti ukaye nabo ku parte pa mpela ya mulungu. Lyena waipusha abafyashi bobe nga kuti bakusuminisha ukuya, e lyo bakaana. Taupapile pali ifi bakwasuka. Pantu ifi fine e fyo bakwaswike no muku wafumako.
Ifili muli cino cipande
Mulandu nshi abafyashi bandi bankanisha ukuya mu kwangala?
Nga ca kuti lyonse ulemona kwati abafyashi bobe balakaana ilyo wabeba ukuti ulefwaya ukucita fimo, kuti watendeka ukumona ukuti tabafwaya fye uleba ne nsansa.
Ifi fine e fyo no mukashana Marie, uwa myaka 17 aletontonkanya ilyo akwete foni pa muku wakubalilapo. Atile: “Batata balimpeele amafunde ayengi pa fyo nalingile ukulabomfya foni, e lyo na bantu abo nalingile ukulalanda nabo, kabili ne nshita iyo nalingile ukulalanshanya na bena. Lelo abanandi bena balecita fye fyonse ifyo balefwaya!”
Ifyo ufwile ukutontonkanyapo: Bushe cishinka ukuti abafyashi ba kwa Marie tabalefwaya fye ukuti aleba ne nsansa? Finshi fimbi nalimo ifyalengele abafyashi ba kwa Marie balesakamikwa?
Amafunde ya pa musebo yalapoka namutekenya ubuntungwa bwa kucita fimo, lelo yalamucingilila. Ifi fine e fyo caba na ku mafunde ayo abafyashi bakupeela.
Ifyo wingacita: Elenganya ukuti uli mufyashi, lyena umwana obe umwaice nakwata foni pa muku wakubalilapo. Finshi fingalenga ulesakamana pa fyo akulabomfya foni? Mafunde nshi wingamupeela pa fyo alingile ukulabomfya foni? Finshi wingacita nga ca kuti umwana obe aletontonkanya ukuti taulefwaya fye aleba ne nsansa?
“Abafyashi bandi lyonse balenjeba ukuti, ‘ule-elenganya pa fyo cumfwika ukuba umufyashi.’ Ukucita ifi kwalingafwile ukumona ubusuma bwali mu kukonka amafunde ayo balempeela e lyo no mulandu balempelela amafunde. Nga ca kuti na ine nalikwete abana, nga nalefwaya ukuti nabo balekonka amafunde yamo yene nayo abafyashi bandi bafwaya ukuti ndekonka.”—E fyalandile Tanya.
Finshi ningacita pa kuti abafyashi bandi belankaanya ukwangala?
“Mu kwimya ishiwi pa muulu ilyo ulelanshanya na bafyashi bobe tamwaba ubusuma ubuli bonse, kabili ukucita ifi kuti kwalenga iwe na bafyashi bobe mwafilwa ukusuminishanya pa fintu fimo. Nga ca kuti uleumana na bafyashi bobe, bakalakumona ukuti taulakula kabili tabakulakusuminisha ukucita ifyo ulefwaya.”—E fyalandile Richard.
“Abafyashi nga bakupeela amafunde ninshi balefwaya ukuti ifintu fikuwamine. Icilenga abafyashi bandi bankaanye ukucita ifintu fimo te kutila tabalefwaya mbe ne nsansa, lelo bafwaya ukuti ndecita ifingalenga naba ne nsansa sha cine cine kabili ifishingandetela amafya.”—E fyalandile Ivy.
Ishinte lya mu Baibo: “Umuwelewele alafumya ubukali bwakwe bonse, lelo uwa mano alailama.”—Amapinda 29:11.
“Inshita shimo nshalekonka amafunde yantu bampeele pa fyo ningile ukubomfya foni. Nale-esha ukusanga inshila shakulanshanishishamo na banandi ubushiku nelyo ukulabomfya foni mu nshila iyo abafyashi bandi bashasuminishe. Na lyo line, baleishiba ifyo nalecita kabili ici calelenga balefwaisha ukwishiba ifyo nalebomfya foni inshita yonse, pa mulandu wa kuti balilekele ukuncetekela. Tacawama ukulacita ifyo abafyashi bobe bakukaanya ukucita.”—E fyalandile Marie.
“Uletekanya. Nalimo kuti pakokola pa kuti abafyashi bobe bakusuminishe ukucita ifintu fimo, lelo nga ca kuti balemona ifyo ulekonka amafunde bakupeela, kuti calenga bakusuminisha ukucita ifintu na fimbi ifyo balekukaanya.”—E fyalandile Melinda.
Ishinte lya mu Baibo: “Muleumfwila abafyashi benu muli fyonse.”—Abena Kolose 3:20.
“Ukupampamina pa kucita ifyo ulefwaya te kuti kulenge ifintu fikuwamine nelyo ukukwafwa ukucita ifyo ulefwaya ukucita.”—E fyalandile Natalie.
“Abafyashi bafwaya ukuti ulesala bwino ifya kucita. Kanshi ilyo ndelanshanya na bafyashi, ndesha ukulanda ifyo ndetontonkanya ukucila ukulanda pa fyo ndeumfwa. Ukucita ifi kulalenga abafyashi balensuminisha ukucita ifyo ndefwaya.”—E fyalandile Joseph.
Ishinte lya mu Baibo: “Mulecindika bashinwe na banyinenwe.”—Abena Efese 6:2.