Bushe Calola mwi Ukuba Aba Mushilo?

Icasuko ca mu Baibolo

Ukuba aba mushilo calola mu kukanaba abakowela. Ishiwi lya ciHebere ilyo bapilibula ukuti “umushilo” lyafuma kwi shiwi ilipilibula ukuti “ukupaatulako.” Kanshi ica mushilo cintu ico bapaatulako nelyo icashila, maka maka pa mulandu wa kutila ca busaka kabili calisanguluka.

Lesa wa mushilo icine cine. Baibolo itila; “Takwaba uwa mushilo nga Yehova.”a (1 Samwele 2:2) Kanshi caliba fye bwino ifi Lesa atweba ifya mushilo ifyo tulingile ukukonka.

Ishiwi lya kuti “umushilo” kuti lyabomfiwa kuli conse icakuma ifya kwa Lesa, maka maka ifyo babomfya fye ku kupepa Lesa. Ku ca kumwenako Baibolo ilanda pa:

• Fifulo fya mushilo: Lesa aebele Mose ilyo ali mupepi ne cimpusa icalebilima umulilo ati: “Apo wiminine ni pa mushili wa mushilo.”​—Ukufuma 3:2-5.

• Imitebeto ya mushilo: Abena Israele balepepa Yehova pa mitebeto iyaleitwa ukuti “ukulongana kwa mushilo.”​—Ubwina Lebi 23:37.

• Ifipe ifya mushilo: Ifipe ifyo balebomfya mu kupepa Lesa pe tempele mu Yerusalemu balefita abati ‘ifipe fya mushilo.’ (1 Ishamfumu 8:4) Ifi ifipe balificindike sana nangu ca kuti tabalingile ukulafipepa.b

Bushe umuntu uushapwililika kuti aba uwa mushilo?

Ee. Lesa aeba Abena Kristu ukuti: “Muleba aba mushilo, pantu ine ndi wa mushilo.” (1 Petro 1:16) Ca cine ukuti umuntu uushapwililika te kuti abe uwa mushilo nga Lesa. Na lyo line, abantu abomfwila amafunde ya kwa Lesa ‘balisanguluka, balapokelelwa kuli Lesa.’ (Abena Roma 12:1) Ifyo umuntu acita ne fyo alanda e filanga ukuti alesha na maka ukuba uwa mushilo. Ku ca kumwenako, nga ca kuti umuntu alomfwila ukufunda kwa mu Baibolo ukutila “mube aba mushilo, [kabili] muletaluka ku bulalelale” kabili “mube aba mushilo mu myendele yenu yonse.”—1 Abena Tesalonika 4:3; 1 Petro 1:15.

Bushe kuti twaleka ukuba aba mushilo kuli Lesa?

Ee. Nga ca kuti umuntu aleka ukukonka amafunde ya kwa Lesa ayalanda pa mibele iisuma te kuti atwalilile ukuba uwa mushilo. Ku ca kumwenako, “bamunyinefwe aba mushilo” ebo balembeele ibuuku lya AbaHebere na lyo line balibasokele ukutila kuti batendeka ukuba, “no mutima uwabipa uwabula icitetekelo pa kufuma kuli Lesa wa mweo.”—AbaHebere 3:1, 12.

Ifyo abantu balanda pa fingalenga umuntu aba uwa mushilo

Ifyo abantu balanda: Ukukanaupa nelyo ukukanaupwa kuti kwalenga umuntu aba uwa mushilo.

Icishinka: Nangu ca kuti Umwina Kristu kuti asalapo ukukanaupa nelyo ukukanaupwa, ukucita ifi takulenga umuntu aba uwa mushilo kuli Lesa. Ca cine ukuti abashaupa nelyo ukuupwa balabika sana amano ku fya kwa Lesa ukwabula ifya kubapumfyanya. (1 Abena Korinti 7:32-34) Na lyo line, Baibolo isambilisha ukuti abaupana nabo kuti baba aba mushilo. Na kuba Petro uwali pa basambi ba kwa Yesu alyupile.​—Mateo 8:14; 1 Abena Korinti 9:5.