Bushe “Alifa Kabili Omega” Nani?

Icasuko ca mu Baibolo

Yehova Lesa wa Maka Yonse e “Alifa kabili Omega.” Aya mashiwi yaba fye imiku itatu muli Baibolo.​—Ukusokolola 1:8; 21:6; 22:13.a

Mulandu nshi Lesa ayitila ukuti “Alifa kabili Omega”?

Ishiwi lya kuti Alifa e shiwi lya kubalilapo e lyo ishiwi lya kuti Omega e lya kulekeleshako muli alufabeti ya ciGriki ululimi balembelemo iciputulwa ca Baibolo icitwa ukuti Icipingo Cipya umwaba ne buuku lya Ukusokolola. Ifyo babomfya aya mashiwi muli alufabeti ya ciGriki filangilila bwino ukuti Yehova fye eka e ntendekelo kabili e mpela. (Ukusokolola 21:6) Ali ni Lesa wa Maka Yonse ukufuma umuyayaya, kabili akatwalilila ukuba Lesa wa Maka Yonse umuyayaya. Ena eka fye e wabako “ukufuma umuyayaya no kuya umuyayaya.”​—Amalumbo 90:2.

Bushe “uwa ntanshi kabili uwa kulekelesha” nani?

Baibolo ibomfya aya mashiwi kuli Yehova Lesa na ku Mwana wakwe Yesu, lelo yapilibula ifyapusana nga yalosha kuli Yesu. Natulande pa fya kumwenako fibili.

• Pali Esaya 44:6, Yehova atile: “Nine wa ntanshi kabili uwa kulekelesha, kabili takuli Lesa umbi kano ine.” Pali ili ilembo Yehova alangilila ukuti ena eka fye e Lesa wa cine umuyayaya; takwaba na umbi. (Amalango 4:35, 39) Kanshi amashiwi ya kuti “uwa ntanshi kabili uwa kulekelesha” yapilibula fye cimo cine na mashiwi ya kuti “Alifa kabili Omega.”

• Na kabili, amashiwi ya kuti “uwa ntanshi [pro’tos, te alifa] kabili uwa kulekelesha [e’skha·tos, te omega]” e yaba pa Ukusokolola 1:17, 18 na pa 2:8. Amashiwi yaba pali ifi fikomo yalanga ukuti uo balelandapo alifwile kabili pa numa alibuukile. Kanshi ifi fikomo tafilanda pali Lesa pantu tabala afwapo. (Habakuki 1:12) Lelo Yesu ena alifwile kabili alibuushiwe. (Imilimo 3:​13-​15) Yesu e muntu wa ntanshi ukubuushiwa no kuya ku muulu no mubili wa mupashi uushifwa, uko nomba aba “uwa mweo pe na pe.” (Ukusokolola 1:18; Abena Kolose 1:18) Ukutula ilya nshita Lesa abomfya Yesu ukubuusha abafwa. (Yohane 6:40, 44) Kanshi e muntu wa kulekeshako uo Yehova umwine abuushishe. (Imilimo 10:40) Kanshi Yesu kuti aitwa ukuti “uwa Ntanshi kabili uwa Kulekelesha.”

Bushe amashiwi yaba pa Ukusokolola 22:13 yalanga ukuti Yesu e “Alifa kabili Omega”?

Awe. Uwalandile amashiwi ayaba pa Ukusokolola 22:13 tabamulumbula ishina, kabili bengi abalelanda muli ici cipandwa. Profesa William Barclay alandile pa mashiwi ayaba pali ici cikomo ukuti: “Ifyalembwa muli ici cipandwa tafyalembwa umo fyakonkanina; . . . kabili ilingi line cilafya ukwishiba uulelanda.” (The Revelation of John, Volume 2, Revised Edition, ibula 223) Kanshi, “Alifa kabili Omega” uwalandwapo pa Ukusokolola 22:13 ni Yehova Lesa kabili e o beta aya amalumbo pa fikomo fimbi mwi buuku lya Ukusokolola.