Baleleemba Tukalata no Kutubika pa Nshi ya Mashini ya Kuwashishamo

Ilyo ba Zarina babatishiwe baba ne Nte ya kwa Yehova, balibwelelemo ku calo cabo ku Central Asia ukufuma ku Russia. Balefwaisha ukusambilisha abana babo abakashana babili icine pali Lesa. Nomba apo bakwete fye indalama ishinono, batendeke ukwikala na bafyashi babo, bandume yabo na bakashi baba ndume yabo mu ng’anda iyakwete fye umuputule umo uwa kusendamamo. Abafyashi babo balibakeenye ukulasambilisha abana babo icine ca mu Baibolo. Baebele abana ba ba Zarina abakashana ukuti belalanda na banyina ifya mu Baibolo.

Ba Zarina balitontonkenyepo sana pa fyo bengafwa abana babo abanakashi babili ukwishiba Yehova. (Amapinda 1:8) E ico balipepele sana kuli Yehova kabili balilombele ukuti abafwe no kubapeela amano. Ba Zarina balicitilepo fimo pa numa ya kupepa, baleya mu kwendako na bana babo kabili balelanda nabo pa fyabumbwa. Ifi balecita fyalyafwile abana babo ukutemwa Kabumba.

Ba Zarina tabapelele fye apo pene, batontonkenye pa nshila bengalasambilishishamo abana babo ukubomfya icitabo ca Bushe Cinshi Baibolo Isambilisha?a Balelemba amaparagrafu na mepusho ya muli ici citabo pe pepala. Na kabili balelembamo na mashiwi yambi pa kwafwa abana babo ukumfwikisha ifyo ba balembela. Lyena balefisa akapepala pamo na pensulo pa nshi ya mashini ya kuwashishamo iyali mu muputule balesambila. Lyena abana nga baya mu muputule balesambila, balebelenga no kulemba amasuko pa kapepala.

Ifi ba Zarina balecita, fyalengele basambilisha abana ifipande fibili mu citabo ca Ico Baibolo Isambilisha? ilyo bashilafwaya ing’anda ya kwikalamo. Ilyo bakuukile, balesambilisha abana babo ukwabula uwa kubalesha. Mu October 2016, abana babo bonse babili balibatishiwe, balitemwa pa fyo banyina mano mano ba basambilishe icine pali Lesa.