UBULONDOLOSHI BWA FIKOMO FYA MU BAIBOLO
Marko 1:15—“Ubufumu bwa kwa Lesa Nabupalama”
“Inshita naifika, no bufumu bwa kwa Lesa nabupalama. Lapileni, no kutetekela imbila nsuma.”—Marko 1:15, Amalembo ya Calo Cipya.
“Inshita naikumana, Ubufumu bwa kwa Lesa nabupalama. Mulelapila, musumine ne Mbila nsuma.”—Mariko 1:15, Baibolo ya Diocese of Mbala.
Umwalola Amashiwi Yaba Pali Marko 1:15
Yesu Kristu alandile ukuti Bufumu bwa kwa Lesaa “nabupalama,” pantu apo e wali no kuba Mfumu ya ubu Bufumu ali pamo nabo.
Yesu taloseshe mu kuti Ubufumu bwalitendeke ukuteka kale kale. Na kuba, pa numa aebele abasambi bakwe ukuti Ubufumu bwali no kwisa ku ntanshi. (Imilimo 1:6, 7) Na lyo line, aishilemoneka muli ulya wine mwaka Baibolo yasobele ukuti e mo uwali no kuba Imfumub ali no kumoneka. Uyu e mulandu Yesu alandile ukuti: “Inshita naifika” e kutila inshita ya kuti atendeke ukubomba umulimo wa kubila imbila nsuma ya Bufumu.—Luka 4:16-21, 43.
Pa kuti abantu bakanonkelemo mu mbila nsuma ya Bufumu, balingile ukulapila e kutila ukumfwa ububi pa fyabipa ifyo balecita kale no kulakonka amafunde ya kwa Lesa. Abalapile balangile ukuti bali ne citetekelo mu mbila nsuma ya Bufumu ubwali no kwisa.
Amashiwi na Yambi Ayaba Pali Marko 1:15
Yesu alandile aya mashiwi ilyo atendeke fye umulimo wakwe mu Galili. Ilembo limbi ilya Mateo 4:17 lilanda ukuti “ukufuma lilya” Yesu atendeke ukubila pa Bufumu bwa kwa Lesa. Ubufumu e bo Yesu alebilapo sana. Na kuba, Ubufumu balibulandapo imiku ukucila pali 100 mu Mabuuku ya Mbila Nsumac, ilingi busangwa mu mashiwi Yesu alandile. Ukulingana ne fyaba mu Baibolo, Yesu alelanda sana pa Bufumu bwa kwa Lesa ukucila pa malyashi yambi.
Belengeni Marko icipandwa 1 pamo na mafutunoti ayalelondolola ifyebo e lyo no mukululo wa malembo yambi ayalandako pali ilyo lyashi, ifikope na mapu.
a Ubufumu bwa kwa Lesa buteko bwa ku muulu ubo Lesa abikako ku kufikilisha ifyo afwaya ukucita pano isonde. (Daniele 2:44; Mateo 6:10) Nga mulefwaya ukwishibilapo na fimbi moneni icipande citila “Bushe Ubufumu bwa Lesa Cinshi?”
b Yesu ali no kuba imfumu pa kuti akabombe umulimo umo pa milimo iingi iyo alingile ukubomba nga Mesia walaiwe, inkombe yaibela iya kwa Lesa. Nga mulefwaya ukwishibilapo na fimbi pa masesemo ya mu Baibolo ayalanda pali Yesu ukuti e Mesia, moneni icipande cileti, “Bushe Amasesemo Ayalanda Pali Mesia Yalanga Ukuti Yesu E Wali Mesia?”
c Amabuuku ya Mbila Nsuma e yabalilapo mu Amalembo ya ciGriki aya Bena Kristu ayo beta ukuti Icipingo Cipya, ayalanda pa bumi bwa kwa Yesu no mulimo alebomba.