UBULONDOLOSHI BWA FIKOMO FYA MU BAIBOLO
Yeremia 29:11—“Nine Neekafye Naaishiba Ifyo Naapanga Ukumucitila”
“‘Ninjishiba amatontonkanyo ayo ndetontonkanya pali imwe,’ e fyasosa Yehova,a ‘amatontonkanyo ya mutende, te ya bubi iyo, aya kumupeela inshita ya ku ntanshi iisuma ne subilo.’”—Yeremia 29:11, Amalembo ya Calo Cipya.
“‘Nine neekafye naaishiba ifyo naapanga ukumucitila, ifyo naapanga ukumuleetela ishuko, ilyo muloleela ukulaakwata, teeshaamo naapanga ukumuleetela kuntashi iyoo.’ Ee, nine ne-Mfumu ndelanda.”—Yelemia 29:11, Ifipangano Fyakwa Leesa.
Umwalola Amashiwi Yaba Pali Yeremia 29:11
Yehova Lesa alilaile bakapepa bakwe ukuti alefwaya bakekale umutende ku ntanshi. Nangu ca kuti aya mashiwi balembeele abantu ba ku kale, na muno nshiku mwine yalalangilila ifyo Lesa atontonkanya. Pantu ni “Lesa [uupeela] isubilo.” (Abena Roma 15:13) Na kuba alilembele aya amalayo mu Baibolo pa kuti “tube ne subilo” ilya kuti ifintu fikawama ku ntanshi.—Abena Roma 15:4.
Amashiwi na Yambi Ayaba Pali Yeremia 29:11
Aya mashiwi yali muli kalata iyo batumiine abena Israele abali muli bunkole mu Babiloni abo basendele ukufuma mu Yerusalemu.b (Yeremia 29:1) Lesa aebele abali muli bunkole ukuti bali no kuba ku Babiloni pa myaka iingi, kanshi balingile ukukuula amayanda, ukulima amabala no kukwata indupwa. (Yeremia 29:4-9) Na lyo line Lesa atile: “Ilyo ikafikilishiwa imyaka 70 ku Babiloni, nkamupempula, kabili nkafikilisha kuli imwe amashiwi yandi ayasuma no kumubwesesha [ku Yerusalemu].” (Yeremia 29:10) Kanshi Lesa alibalaile ukuti takabalabe kabili na filya balesubila ukuti bakabwelelamo fyali no kucitika.—Yeremia 31:16, 17.
Lesa alifikilishe ifyo alaile abena Israele. Nga fintu asobele, abena Babiloni balibacimfishe ku Mfumu Sailasi iya ku Persia. (Esaya 45:1, 2; Yeremia 51:30-32) Pa numa, Sailasi alilekele aba Yuda babwelelamo ku calo cabo. Ilyo papitile imyaka 70 muli bunkole, balibwelelemo ku Yerusalemu.—2 Imilandu 36:20-23; Esra 3:1.
Ifi amalayo yaba pali Yeremia 29:11 yafikilishiwe, filakoselesha bonse abacetekela ifyo Lesa atulaya. Pa fyo Lesa atulaya paba no bulayo bwa kuti ilyo Yesu Kristu akalateka mu Bufumu bwa kwa Lesa, pano isonde ponse pakaba umutende.—Amalumbo 37:10, 11, 29; Esaya 55:11; Mateo 6:10.
Ubufi Abantu Balanda Pali Yeremia 29:11
Ubufi: Lesa alipangila libele ificitikila umuntu umo na umo.
Icine: Lesa alaleka abantu basalapo abene ifyo balefwaya. Amashiwi yaba pali Yeremia 29:11 mashiwi Lesa aebele abena Israele abali ku Babiloni, alefwaya bakaleikala umutende ku ntanshi. (Yeremia 29:4) Na lyo line, Lesa alisuminishe umuntu umo na umo ukuipingwilapo nampo nga alefwaya ukwisanonkelamo mu malayo Lesa alaile nelyo iyo. (Amalango 30:19, 20; Yeremia 29:32) Bonse abapingwilepo ukufwaya Lesa balemupepa ne mitima ya cishinka.—Yeremia 29:12, 13.
Ubufi: Lesa akalenga abamupepa ukuba ne fyuma ifingi.
Icine: Amashiwi ya kuti “ukumuleetela ishuko” ayasangwa mu ma Baibolo yamo pali Yeremia 29:11 bayapilibula ukufuma kwi shiwi lya ciHebere ilipilibula “umutende e lyo no kuba no bumi ubusuma.” Ukulingana ne fikomo fyabalilapo, Lesa alaile ukupeela abena Israele abali muli bunkole umutende no bumi ubusuma, lelo te fyuma. Kanshi abena Israele bonse bali no kutwalilila ukuba muli bunkole, lelo bushiku bumo bali no kubwelela ku Yerusalemu.—Yeremia 29:4-10.
Belengeni Yeremia icipandwa 29 pamo na mafutunoti ayalelondolola ifyebo e lyo no mukululo wa malembo yambi ayalandako pali ilyo lyashi.
a Ishina lya kwa Lesa ni Yehova.—Amalumbo 83:18.
b Ukulosha kuli Yeremia 29:11, icitabo ca The Expositor’s Bible Commentary catile: “Takwaba ubulayo na bumbi mu malembo ubwawama ukucila ubu, ubulanga ifyo Yahweh [Yehova] aleumfwila abali muli bunkole uluse ukucila pali ifi abalaile ifyalengele baba ne subilo.”—Volume 7, ibula 360.