UBULONDOLOSHI BWA FIKOMO FYA MU BAIBOLO
Yoshua 1:9—“Ulekosa no Kushangila”
“Bushe nshikwebele? Shipa kabili kosa. Witutuma kabili witiina, pantu Yehova Lesa obe ali na iwe konse uko uleya.”—Yoshua 1:9, Amalembo ya Calo Cipya.
“Bushe nshikwebele nati: Ulekosa no kushangila? Wilatiina kanshi, wiba no mwenso! Pantu Imfumu, Lesa obe, yakulaba nobe muli fyonse ifyo ukalacita.”—Yosue 1:9, Baibolo ya Diocese of Mbala.
Umwalola Amashiwi Yaba Yali Yoshua 1:9
Yehovaa Lesa alikoseleshe umubomfi wakwe uwa cishinka Yoshua ukutila kuti ‘ashipa kabili akosa’ nangu engakwata amafya ayakalamba shani. Yoshua tali na kutiina ifyali no kucitika ku ntanshi nga alekonka amafunde ya kwa Lesa, pantu cali no kuba kwati Yehova ali nankwe alemwafwa pa kuti atunguluke. Yehova aleeba Yoshua ifya kucita kabili alemwafwa ukucimfya abalwani bakwe, ici calelanga fye ukuti ali nankwe.
Finshi fyali no kulenga Yoshua ‘ashipa kabili akosa’? Ukulabelenga amalembo ya mushilo ayo Yehova apeele abantu bakwe pali ilya nshita ayali no kulenga ashipa kabili akosa. Muli aya malembo ya mushilo mwali “amafunde yonse ayo Mose umubomfi [wa kwa Yehova]” aebele Yoshua.b (Yoshua 1:7) Yehova aebele Yoshua ‘ukulaetetulapo akasuba no bushiku.’ (Yoshua 1:8) Ukubelenga no kutontonkanyapo sana kwali no kwafwa Yoshua ukubika sana amano ku kucita ukufwaya kwa kwa Lesa. Lyena Yoshua alingile ukulacita ifyo alebelenga mu Cebo ca kwa Lesa pa kuti ‘alebika amano ku kulakonka fyonse ifyalembwamo.’ Nga acita ifi e lyo ali no kuba na mano no kutunguluka. Kabili ifi fine e fyo cali. Nangu ca kuti Yoshua alekwata amafya, alibombeele Yehova ne cishinka kabili ali ne nsansa.—Yoshua 23:14; 24:15.
Amashiwi Yehova aebele Yoshua yalatukoselesha na muno nshiku. Yalalanga ifyo Yehova asakamana bonse aba mupepa, maka maka nga bali na mafya. Afwaya baletunguluka nga filya fine Yoshua ali! Nga filya fine cali kuli Yoshua, ababomfi ba kwa Yehova nabo kuti baba ‘abashipa kabili abakosa’ nga balebelenga no kutontonkanya sana pa Cebo ca kwa Lesa Baibolo, no kulacita ifintu ukulingana ne fyo Baibolo ilanda.
Amashiwi Yambi Ayaba pa Fikomo Fimbi Muli Yoshua 1
Pa numa ya mfwa ya kwa Mose, Yehova aebele Yoshua ukulatungulula abena Israele. (Yoshua 1:1, 2) Pali ilya inshita, abena Israele baleipekanya ukwingila mu Calo ca Bulayo, mu calo ca Kaanani. Bali no kulwa na balwani abali aba maka sana. Ku ca kumwenako, Yoshua alingile ukulwa na bena Kaanani abali ababi icine cine.c (Amalango 9:5; 20:17, 18) Na kabili abena Kaanani bali abengi nga nshi kabili balikwete ifyanso fya kulwilako inkondo ifikali ukucila abena Israele. (Yoshua 9:1, 2; 17:18) Lelo Yoshua alicitile ifyo Yehova amwebele. Kabili Lesa alilangile ukuti ali na Yoshua pantu abena Israele balicimfishe abalwani babo abengi mu myaka fye 6.—Yoshua 21:43, 44.
a Ishina lya kwa Lesa mu ciHebere e lyo bapilibula mu Cibemba ukuti Yehova, mu ciHebere lyakwata ifilembo 4 יהוה (YHWH), ifyo beta ukuti Tetragrammaton. Pali ili lembo muli Baibolo ya Diocese of Mbala balipilibula ukuti “Imfumu.” Nga mulefwaya ukwishibilapo na fimbi pali Yehova no mulandu mu ma Baibolo yamo mushabela ili shina, moneni icipande citila “Bushe Yehova Nani?”
b Amalembo ya mushilo ayo Yoshua alebelenga, kabili ayo na ifwe tubelenga mu Baibolo, nalimo mabuuku 5 ayo Mose alembele e kutila (Ukutendeka, Ukufuma, Ubwina Lebi, Impendwa na Amalango). Ibuuku lya kwa Yobo e lyo ne lumbo limo nelyo yabili.
c Nga mulefwaya ukwishiba ico balelwila inkondo, moneni icipande citila “Mulandu Nshi Lesa Aonawilile Abena Kanaani?” icaba mu Ulupungu lwa kwa Kalinda ulwa January 1, 2010.