UBULONDOLOSHI BWA FIKOMO FYA MU BAIBOLO
Amalumbo 23:4—“Nangu Ine Ningapita Mumukonko Umwafiita Fititi”
“Nangu nga naenda mu mupokapoka umwafita fititi, nshitina ububi, pantu muli na ine, inkonto yenu no mutambu wenu e finsansamusha.”—Amalumbo 23:4, Amalembo ya Calo Cipya.
“Nangu ine ningapita mumukonko umwafiita fititi, aawe ine teekuti ntiine nakalya, pantu twaba noobe.”—Amalumbo 23:4, BIBLE wa Mushilo.
Umwalola Amashiwi Yaba pa Amalumbo 23:4a
Lesa alacingilila abantu abamupepa na lintu baleshipikisha amafya ayakalamba. Ilembo lyalinganya ifyo kacema asakamana impaanga shakwe ku fyo Yehova asakamana aba mupepa.b Tabomfwa ukuti baba beka nga bali na mafya ayakalamba ayo ili limbo lyapalanya ku mupokapoka umwafiita fititi nelyo mu ncende iingalenga bafwa. Bomfwa ukuti Lesa ali nabo ilyo bali mu ncende ya musango uyu.
Mu nshita balelemba Baibolo, kacema alebomfya inkonto pa kucingilila impaanga ku finama ifingashilya. Iyi nkonto ilingi yaleba fye kamuti akatali akaongama ku ntanshi ako alebomfya pa kutungulula impaanga no kushifumya ukuli ubusanso. Ifi fine e fyo Yehova acita, ni kacema uwaba no kutemwa, uucingilila no kutungulula aba mupepa. Na lintu bali na mafya ayakalamba sana, Yehova alabasakamana mu nshila shalekanalekana.
Alabafunda no kubasansamusha ukubomfya Icebo cakwe, Baibolo.—Abena Roma 15:4.
Alakutika ku mapepo yabo, kabili alabapeela umutende .—Abena Filipi 4:6, 7.
Alabomfya bakapepa banabo ukubakoselesha.—AbaHebere 10:24, 25.
Alabapeela isubilo lya kuti ifintu fikawama ku ntanshi, ilyo akafumyapo ifyabipa ifilebacitikila pali nomba.—Amalumbo 37:29; Ukusokolola 21:3-5.
Amashiwi Yambi Ayaba pa Fikomo Fimbi mu Amalumbo 23
Davidi e walembele Amalumbo 23, ilyo ali umwaice ali ni kacema kabili pa numa aishileba imfumu ya bena Israele. (1 Samwele 17:34, 35; 2 Samwele 7:8) Ili ilumbo lita Yehova ukuti ni Kacema uutungulula, uuliisha, no kusansamusha aba mupepa nga filya fine kacema acita ku mpaanga shakwe.—Amalumbo 23:1-3.
Pa Amalumbo 23:4 ilyo Davidi alandile pa fyo Yehova acingilila, alilekele ukulanda kwati aleshimikila umuntu umbi lelo alembele kwati alelanda na Lesa. Ifi acitile filanga ukuti Davidi ali cibusa sana na Yehova. Davidi alishibe ukuti Yehova alemusakamana kabili alishibe na amafya alekwata. Ici calengele Davidi ukukanaba no mwenso.
Mu fikomo fibili ifyakonkapo mu Amalumbo 23, icikomo 5 na 6, tabalanda pali kacema ne mpaanga lelo bacilanya umweni no mwine wa ng’anda. Nga filya fine umwine wa ng’anda aba kapekape ku mweni, Yehova alesakamana Davidi ngo mweni uwacindikwa. Nangu balwani ba kwa Davidi tabakwete amaka ya kucita icili conse pa kuti Lesa e musakamana. Amashiwi ya kulekelesha mwi buuku lya Amalumbo 23, Davidi alanda ifyo acetekele ukuti Lesa akalamucitila ifisuma no kumutemwa mpaka ne mfwa.
Ifya kumwenako babomfya mu Amalumbo 23 filanga ifyo Lesa atwalilila ukusakamana abantu aba mupepa.—1 Petro 2:25.
a Mu ma Baibolo yamo ili lembo lyaba mu Amalumbo 22. Nangu ca kuti ibuuku lya Amalumbo lyafika ku 150, ama Baibolo yamo babika ama nambala ukulingana ne fimfungwa fya ciHebere ifya baMasore, nomba mu ma Baibolo yamo bakonka ifyo balembele Septuagint ya ciGriki. Ukupilibula Septuagint ya ciGriki ukufumya mu ciHebere kwapwile mu myaka ya ba 100 ninshi Yesu talaisa pano isonde.
b Mu Baibolo,Lesa uwe shina lya kuti Yehova, bamulondolola ukuti ni kacema wa cikuuku. Bakapepa bakwe abo bapashanya ku mpaanga balakabila ukubafwa no kubacingilila.—Amalumbo 100:3; Esaya 40:10, 11; Yeremia 31:10; Esekiele 34:11-16.