Ukwafwilisha Abaponenwe na Masanso Ayakalamba mu 2023—“Tulamona Ifyo Yehova Atutemwa”

Baibo yasobele ukuti “uluko lukemina uluko lubiye” kabili kukaba amasanso ayakalamba ilyo ‘icalo cikaba ku mpela.’ (Mateo 24:3, 7) Mu mwaka wa mulimo uwa 2023 twalimweneko ifyo amashiwi ya ubu busesemo yalefikilishiwa.a Nalyo line, ilyo inkondo na masanso ayakalamba fyalecitika mupepi na mu fyalo 100, Inte sha kwa Yehova balepashanya Yehova uwaba no kutemwa. Balemupashanya shani?

Mu mwaka wa mulimo uwa 2023, aba bwananyina baliponenwe na masanso ayakalamba ukucila pali 200 ayesako pa mulandu ne fyabumbwa nelyo pa mulandu ne fyo abantu bacita. Utubungwe utwalembeshiwa ukulingana ne funde uto Inte sha kwa Yehova babomfya, twabomfeshe amadola ukucila pali 10 milionb pa ndalama tusangula ku kwafwilisha umulimo wa mwi sonde lyonse, ku kwafwilisha abaponenwe na masanso ayakalamba mwi sonde lyonse. Ishi ndalama kulunda pa sho bamunyinefwe ne nkashi babomfeshe ku kwafwilisha abalekabila ubwafwilisho ku ncende bekala. Moneni ifyo imisangulo musangula baibomfeshe pa nshita imo ukwafwilisha bamunyinefwe abaponenwe na masanso ayakalamba.

“Ukutemwa kwa Cine eko Kwaba”

Mu ncende shimo ku Nigeria ilingi line mulaba sana ba mulamba cila mwaka. Nalyo line, mulamba waliko mu October 2022 e wabipishe sana ukucila pali ba mulamba bonse abaliko mu myaka 10 iyapita. Impanga iya kulile ukufika ku mahekita 676,000 apaali amabala yalyonaike, kabili ukucila pa bantu 2 milion e bashile amayanda yabo. Aba pa Bethel ya ku Nigeria balipangile Komiti ya Kwafwilisha Abaponenwe na Masanso Ayakalamba pa kuti bafwilishe ababwananyina abaponenwe na masanso mu fyo balekabila no kubafwa ukutwalilila ukuba ne citetekelo icakosa.

Ifyacitikile Bamunyina na Bankashi

• Bakasabankanya 7,505 e bashile amayanda yabo

• Amayanda 860 yalyonaike

• Amayanda ya Bufumu 90 e lyo ne Cikuulwa ca Kulonganinamo Ukulongana Kukalamba cimo mwalingiile ba mulamba

Ifyo Imisangulo Yabombele

Indalama amadola ukucila pali 250,000 e shabombele ku mulimo wa kwafwilisha abaponenwe na masanso ayakalamba, fimo ifyo shabombele ni fi:

• Ukushitamo ifya kulya pamo nga rice, cilemba e lyo ne fya kulya fimbi

• Ifya kubomfya mu ng’anda pamo nga apa kulala e lyo na ma moskito neti

• Ukuwamya no kukuula amayanda ayaonaike

Bushe bamunyinefwe bacitile shani pa kuti bashininkishe ukuti babomfya bwino imisangulo? Cimo ico bacitile kubebeta bwino bwino icikuulwa cimo na cimo pa kuti bamone nga kuti baciwamya nelyo iyo. Lyena nga ca kuti basanga ukuti icikuulwa cilekabila ukucikuula cipya cipya, balecikuula ukubomfya inshila isha-anguka ukulingana ne fyo ifikuulwa fyaba kuli iyo ncende.

Bamunyinefwe na bankashi abapokelele ubwafwilisho balatasha icine cine. Nkashi umo alandile ukuti: “Mulamba alyonawile amabala yesu yonse ica kuti tatwakwete na mayanda umwakwikala, ici calengele twafilwa ukwishiba ne fya kucita. Twalitemenwe sana ilyo bamunyina na bankashi baishile mu kutwafwa pali bulya bwine ubushiku fyacitike, e lyo no kutupekanishisha umwakwikala. Twalyumfwile bwino sana ilyo twapokelele ifya kulya ukufuma ku Bethel. Tatwakwete na mashiwi ya kulanda ilyo twamwene uko ifyaba pali Yohane 13:34, 35 fyafikilishiwe . . . . Ukutemwa kwa cine eko kwaba. Ine no lupwa lwandi lonse tuletasha sana, ne mitima yesu yonse, pa fyo bamunyinefwe mwaishile twafwa ilyo twalekabila ubwafwilisho.”

Abantu na bambi mu bwikashi balimwene ifyo twabombele umulimo wa kwafwilisha abaponenwe na masanso ayakalamba. Imfumu ya mu musumba wa Sabagreia, Bayelsa State,yalandile ukuti: “Mwi sonde mwaliba utubungwe twa mapepo utwingi, nomba ni Nte sha kwa Yehova fye e babombelepo uyu mulimo uwa kwafwilisha abaponenwe na masanso ayakalamba . . . . [Icilonganino cenu] caba pa filonganino ifisuma nga nshi mwi sonde lyonse.”

“Tulamona Ifyo Yehova Atutemwa”

Mu February 2023, umulilo walyonawile ifintu ifingi nga nshi mu calo ca Chile ukufika ku miku 400. Impanga ukucila pa mahekita 430,000 yalyonaike, ukubikako ne fintu fimbi ifyacindama sana mu calo ca Chile na fyo fyalyonaike. Nalimo abantu 8,000 e bashile amayanda yabo. Ilyo amasanso yacitike, aba ku Bethel balitendeke ukupekanya ifya kwafwilisha abaponenwe na masanso.

Ifyacitikile Bamunyina na Bankashi

• Bakasabankanya 222 e bashile amayanda yabo

• Amayanda 20 yalyonaike

Ifyo Imisangulo Yabombele

Indalama amadola ukucila pali 200,000 e shabombele ku kwafwilisha abaponenwe na masanso ayakalamba, fimo ifyo shabombele ni fi:

• Ukushita ifya kulya na menshi

• Ukushita amafuta ya muli bamotoka, ifya kubomfya pa kuwamya, e lyo no muti

• Ukukuula amayanda ayaonaike

Aba mu lupwa lumo balipeshiwe amano ilyo basangile ukuti fyonse ifyo bakwete fyalyonaike, ukubikako fye ne ng’anda e lyo na makwebo yabo. Ici calengele ulu lupwa uku kana kwata ifya kusangilamo imikalile. Mu nshiku ishinono ukutula apo ing’anda yabo yaonaikile, ulu lupwa lwaleumfwa sana ububi nga balolesha apali ing’anda yabo. Nomba ilyo ing’anda yabo yatendeke ukukuulwa na kabili, balilekele ukusakamikwa sana. Ilyo bamwene Ifyo abalebomba umulimo uwa kuitemenwa balebalanga ukutemwa calilengele batwalilila ukushipikisha. Ifi fyacitikile fyalikoseleshe sana ulu lupwa ica kuti nabo balibombeele pamo na balebomba umulimo wa kuitemenwa ukukuula ing’anda ya kwa munyina umbi iyaonaike.

Umulimo wa kwafwilisha abaponenwe na masanso ayakalamba walengele bamunyina na bankashi abengi ukuba ne nsansa. Munyinefwe umo alandile ukuti: “Caliwama sana ifi Yehova abikako ama Komiti ya Kwafwilisha Abaponenwe na Masanso Ayakalamba. Pa numa fye ya bushiku bumo ukutula apo ubusanso bwacitikile, aba bamunyinefwe balishile pa ncende apo ubusanso bwacitikile ku kwafwa abaponenwe no busanso. Tulakoseleshiwa sana nga twabelenga pa fyo basakamana abaponenwa na masanso ayakalamba ku fyalo fimbi. Lelo cilapusanako nga ca kuti ni mwebo mwaponenwa na masanso ayakalamba. Cilalenga watasha sana icilonganino ca kwa Yehova, ukumona ifyo ababwananyina bapashanya Yehova ukuba ne imibele iyo akwata e lyo ne fyo babikako amano, ukushininkisha ukuti namukwata fyonse ifyo mulekabila mu mikalile e lyo ne fya kumupashi. Tulamona ifyo Yehova atutemwa ukupitila mu fyo aletwafwa.”

Ilyo tulepalamina ku mpela ya cino calo, amasanso ayakalamba yakulaya yalefulilako fye. (Luka 21:10, 11) Na lyo line, Kristu Yesu alebomfya icilonganino ca bena Kristu pa kutulanga ukuti akulaba na ifwe “inshiku shonse mpaka na ku mpela ya calo.” (Mateo 28:20) Imisangulo yenu iya kuitemenwa iyo musangula ku mulimo wa mwi sonde lyonse ukubomfya donate.jw.org e lyo ne nshila shimbi, ukubikako ne fyo muipeelesha ukubomfya inshita yenu na maka, filangilila ifyo mufwaisha ukutungilila Ubufumu e lyo ne Mfumu iyaba no kutemwa. Tulemutasha pa fyo mwatwalilila ukuba na bukapekape.