Ifyo ka JW Box Kalenga Abantu Batwalilila Ukuba ne Citetekelo Icakosa

Pali ino nshita Inte sha kwa Yehova balabomfya sana impapulo shilanda pali Baibolo isha pa makompyuta, pa matabuleti, na pa mafoni. Nomba mu ncende ishingi, bamunyinefwe na bankashi tabakwata indalama shakushitamo ama bundle ya Intaneti aya kubomfya pa kuti bakopolole impapulo. E lyo bambi bekala mu ncende umo Intaneti ishupa sana, nelyo umushaba na Intaneti.

Na lyo line, bamunyinefwe na bankashi abengi balakopolola impapulo sha pa matabuleti na pa mafoni ukwabula ukubomfya Intaneti! Bacita shani pa kuti bakopolole impapulo ukwabula Intaneti?

Ifilonganino ifyaba mu ncende umo Intaneti ishupa sana balafitumina ka JW Box. Utu ma JW Box batushita fye ku kampani kabili twalikwata WiFi. Aba ku Dipartimenti ya Makompyuta iya pa Bethel balabikamo programu iilenga tulesunga impapulo na mavidio ayaba pa jw.org. Ka JW Box kamo bakashita pa madola ya ku America 75 (K1,537.50).

Bamunyinefwe na bankashi nga bali pa Ng’anda ya Bufumu, kuti bakopolola impapulo na mavidio ifiba muli ka JW Box nga ba-asha WiFi pa mafoni nelyo pa matabuleti yabo. Nabakwata amafoni na matabuleti ya kale nelyo ayashakosa umutengo nabo kuti bakopolola impapulo muli ka JW Box. Nomba nga ca kuti icilonganino caba ukushaba Intaneti, kuti bacita shani pa kuti muli ka JW Box muleba impapulo ishipya? Aba pa maofeshi ya musambo aya Nte sha kwa Yehova balatuma amaflashi ku filonganino, umuba impapulo ishipya isha pa jw.org isho bengabika muli ka JW Box. Flashi imo baishita pa madola ya ku America nalimo 4 (K82).

Bushe ka JW Box kaafwa shani bamunyinefwe na bankashi? Ba Nathan Adruandra aba ku Democratic Republic of Congo abakwata abana batile: “Nalyeseshe pa nshita iitali ukukopolola vidio ya cangalo citila ‘Mwe Yehova, . . . Muli Imwe E mo Natetekela’ ne citila Ibukisheni Muka Lote, lelo nalifililwe. Ici calengele mfuupulwe. Pali ino nshita ndakopolola aya amavidio pali foni yandi, kabili aya amavidio yalatwafwa ukusambilisha bwino abana besu.”

Munyinefwe uwafwilisha aba mu filonganino pa kuti beshibe ifya kubomfya ka JW Box atile: “Bamunyinefwe na bankashi bamona ka JW Box ukuti bupe ubusuma nga nshi ubo Yehova abapeela. Baliba sana ne nsansa pantu pali ino nshita balakopolola impapulo na mavidio ifyaba pa Impapulo Tubomfya Sana pa Kusambilisha Abantu.”

Twalituma utu ma JW Box ukucila pali 1,700 ku filonganino fimo ifya mu Africa, mu Oceania, na mu South America, kabili tulepekanya ukutuma utu ma JW Box ku filonganino na fimbi. Ni kwi kufuma indalama tubomfya pa kushita utu ma JW Box? Tubomfya indalama isho musangwilako ku mulimo wa mwi sonde lyonse, kabili mwe bengi mubomfya donate.jw.org pa kusangwilako. Tulemutasha pa fyo muitemenwa ukusangwilako kuli uyu mulimo.