15 Lyena abaume abo basalile basendele bankole kabili bapeele abasapwile ifya kufwala ifyo bafumishe pa fyo abashilika bapokele. E ico balibapeele ifya kufwala, indyato, ifya kulya, ifya kunwa e lyo na mafuta ya kusuba pa nkanda. Lyena babikile abanakile sana pa mpunda e lyo batwala bankole bonse kuli bamunyinabo ku Yeriko, umusumba wa tuncindu. Pa numa balibweleelemo ku Samaria.