Futunoti
a Nga mulefwaya ukwishibilapo na fimbi pa co tulandila pa mwaka wa 607 B.C.E., belengeni icipandwa cileti “Ni Lilali Umusumba wa Yerusalemu Baonawile?—Ulubali 1,” pe mabula 26-31 mu Ulupungu lwa kwa Kalinda ulwa October 1, 2011 e lyo ne cileti “Ni Lilali Umusumba wa Yerusalemu Baonawile?”—Ulubali 2, pa mabula 22-28 mu Ulupungu lwa kwa Kalinda ulwa November 1, 2011.
Bushe “inshita cinelubali” shalepa shani? Iyi te myaka fye 7 nga filya cali kuli Nebukadnesari. Ifyo Yesu alandile filatwafwa ukwishiba icasuko. Atile: “Bakanyantaula Yerusalemu [umusumba uwaleimininako ukuteka kwa kwa Lesa], ikasuke aikumana inshita ya bena fyalo.” (Luka 21:24) “Inshita ya bena fyalo,” e kutila inshita iyo Lesa asuminishe ubuteko bwakwe ‘ukunyantaulwa ku bena fyalo,’ e cimo cine ne “nshita cinelubali” iyo ibuuku lya kwa Daniele icipandwa 4 lilandapo. Kanshi ici calola mu kuti ilyo Yesu ali pano calo, “inshita cinelubali” ninshi shalitendeka kale.
Baibolo yalilanda ifyo “inshita cinelubali” isha mu kusesema shalepa. Itila “inshita shitatu na hafu, ni nshiku 1,260, kanshi pa kupenda “inshita cinelubali,” kufusha inshiku 1,260 imiku ibili, na shonse pamo shifika ku nshiku 2,520. (Ukusokolola 12:6, 14) Ukulingana no kupenda inshita ukwa “ubushiku bumo umwaka umo,” inshiku 2,520, myaka 2,520. Kanshi kuti twatila “inshita cinelubali” nelyo imyaka 2,520, shapwile mu October mu 1914.—Impendwa 14:34; Esekiele 4:6.