Pa Mulungu, September 28
Abalwani bandi bakafulumuka pa bushiku nkalilila kuli imwe ukuti mungafwe. Nalicetekela ukuti Lesa ali na ine.—Amalu. 56:9.
Ici cikomo pa mulu cilalanda ifyalengele Davidi aleke ukuba no mwenso. Nangu ca kuti ubumi bwakwe bwali mu kaposa mweo, aletontonkanya pa fyo Yehova ali no kumucitila ku ntanshi. Davidi alishibe ukuti Yehova ali no kumupususha pa nshita yalinga. Na kuba Yehova alilandile ukuti Davidi ali no kuba imfumu ya Israele. (1 Sam. 16:1, 13) Davidi taletwishika ukuti ifyo Yehova alaile fyali no kucitika. Finshi Yehova atulaya ukutucitila? Tatwenekela Yehova ukutucingilila ku mafya yonse ayo tukwata. Na lyo line, amafya yonse ayo mwingakwata muli cino calo, Yehova ali no kuyafumyapo mu calo cipya icileisa. (Esa. 25:7-9) Kabumba wesu alikwata amaka ya kubuusha abafwa, aya kutuposha ku malwele, e lyo nayakufumyapo bonse abatucusha.—1 Yoh. 4:4. w24.01 ibu. 6 amapara. 12-13
Pali Cimo, September 29
Wa nsansa umuntu uo baeleela icilubo cakwe, uo bafimba pa lubembu lwakwe.—Amalu. 32:1.
Muletontonkanya pa calengele muipeele kuli Yehova no kubatishiwa. Mwaliipeele kuli Yehova no kubatishiwa pantu mwalefwaya ukuba ku lubali lwakwe. Muleibukisha icalengele mushininkishe ukuti na musanga icine. Mwaishileishiba bwino Yehova kabili mwalitemenwe Shinwe wa ku muulu. Mwali ne citetekelo kabili mwalilapile. Mwalilekele ukucita ifyo Lesa apata kabili mwalitendeke ukucita ifilenga alasekelela. Mwalitemenwe ilyo mwaishileishiba ukuti Yehova alimwelele imembu. (Amalu. 32:2) Mwalitendeke ukulalongana no kulaebako bambi ifisuma ifyo mwalesambilila. Apo mwali-ipeela no kubatishiwa, mwaba mu musebo wa ku bumi, kabili tamufwaya icili conse calenga mwafuma muli uyu musebo. (Mat. 7:13, 14) Twalilileni ukuba abashangila no kulatemwa Yehova no kulaumfwila amafunde yakwe. w23.07 ibu. 17 para. 14; ibu. 19 para. 19
Pali Cibili, September 30
Lesa wa cishinka, kabili takaleke mukakwate ubwesho ubo mushingashipikisha, lelo ilyo ubo bwesho bukesa, akafwaya na pa kuti mukafuminemo pa kuti mukabe na maka ya kubushipikisha.—1 Kor. 10:13.
Nga muletontonkanya pa fyo mwaebele Yehova ilyo mwaleipeela kuli ena, mukalakwata amaka ya kulwisha amatunko. Ku ca kumwenako, bushe kuti mwatendeka ukulanga icintemwa kuli muka mwine? Awe, pantu mwalilaya Yehova ukuti tamwakulacita ifya musango uyu. Nga tamulekele ulunkumbwa lwa kucita ifyabipa lwakula muli imwe, tacakamukosele ukuleka ukutontonkanya pa kucita ifyabipa. Mukafuma “mu nshila ya bacita ifyabipa.” (Amapi. 4:14, 15) Nga muletontonkanya pa fyo Yesu aipeeleshe pa kuti alecita ifyo Wishi afwaya, tamwakapoose ne nshita iya kukaana icili conse icingalenga mwakalifya Lesa uo mwaipeelako. (Mat. 4:10; Yoh. 8:29) Icishinka ca kuti nga mwakwata amatunko na mesho e lyo cimoneka nga ca kuti mulafwaisha ukutwalilila ukukonka Yesu. Kabili kuti mwacetekela ukuti Yehova akamwafwa pa kuti mukatwalilile ukukonka Yesu. w24.03 amabu. 9-10 amapara. 8-10