Finshi fipalene pa ficita ba Austin na ba Laurie? Kwaliba ifyo bonse babili batemwa ukulacita.

Inga imwe? Bushe kwaliba ifisuma ifyo mufwaya ukulacita? Nalimo mulafwaya ukulatukusha umubili lyonse, ukulalala sana, nelyo ukulalanshanya sana na bulupwa ne fibusa.

Nalimo kwaliba imisango yabipa iyo mufwaya ukuleka, pamo nga ukupeepa fwaka, ukulya sana ifya kulya ifingalenga mwaina ukucila mu cipimo, nelyo ukulapoosa inshita iikalamba pa Intaneti.

Icishinka ca kuti, calyafya ukuleka imisango yabipa. Na kuba, batila ukuleka imisango yabipa kwaba kwati kufuma mu malangeti ninshi nakutalala, e lyo ukutendeka imisango yabipa kwaba kwati kwingila mu malangeti ilyo kutalele.

Nomba kuti mwacita shani pa kuti muleke imisango yabipa no kutendeka ukulacita ifintu ifingalenga mwaba abantu abasuma? Natulande pa fintu fitatu ifyo Baibolo yalanda ifingatwafwa.

Nalimo kuti mwafwaisha ukwalula ifyo mwatemwa ukucita pa muku umo. Kuti mwalati, ‘Uno mulungu nalaleka ukupeepa fwaka, ukutukana, ukulakokola ukuya mu kulaala, nalatendeka ukutukusha umubili, ukulalya ifya kulya ifishinganjinisha kabili nakulatuminako bamama na bashikulu amafoni.’ Na lyo line, ukwesha ukwalula ifyo mwatemwa ukucita pa muku umo kuti kwalenga mwafilwa ukwalula fyonse ifyo mwatemwa ukucita.

Umuntu uwafuuka alatekanya. Aleshiba ukuti kwaliba ifyo engacita ne fyo engafilwa ukucita. Kanshi mu nshita ya kufwaya ukwalula imisango yakwe pa muku umo, alaya alealuka panono panono.

IFYO MWINGACITA

Muleyalula imisango yenu panono panono. Ukukonka ifi twalalandapo kuti kwamwafwa:

1. Lembeni ifintu ifisuma ifyo mulefwaya ukulacita e lyo ne misango yabipa iyo mulefwaya ukuleka. Mwilemba ifinono, lelo mulembe fye fyonse ifyo mulefwaya ukulacita ne fyo mulefwaya ukuleka ukucita.

2. Mubalilepo ukulemba ifintu ifyo mulemona ukuti e ficindeme sana.

3. Lyena kuti mwatendeka ukubombela pali cimbi nelyo fibili.

Pa kuti muleke bwangu imisango yabipa, esheni ukuipyanikishapo ne fintu ifisuma. Ku ca kumwenako, nga ca kuti mulapoosa sana inshita ukutamba TV e lyo pa nshita imo ine mulafwaya ukulalanshanya sana na balupwa wenu ne fibusa, ninshi kuti mwacita ifi: ‘Nga ca kuti mwainuka ku ncito, tamulingile ukwasha TV ilyo line fye mwafika, lelo kuti cawama ukulanshanya na lupwa wenu nelyo cibusa pa foni.’

• Tutile mulefwaya ukuleka ukulya ifya kulya ifingalenga mwaina, lelo mwakumbwa ice cream kabili mwalafwaisha ukuilya.

• Tutile mulefwaya ukuleka ukupeepa fwaka, lelo cibusa wenu uwaishiba ukuti mulefwaya ukuleka ukupeepa, amupeela fwaka.

• Tutile mulefwaya ukutukushako umubili, nomba camukosela fye no kusenda insapato sha kubutukilamo mwi fungu lya busanshi.

Bushe namumona ifipalene muli ifi twalandapo? Ilingi line, uko tusangwa e lyo na bantu tusangwa nabo kuti fyalenga twaba ne misango yabipa nelyo ukuba ne mibele iisuma.

Baibolo ilatukoselesha ukulatontonkanishisha libela. Nga tulecita ifi, tatwakulasangwa na bantu nelyo ukuba ku cifulo icingalenga twafilwa ukufikilisha ifyo tulefwaya ukubombelepo. (2 Timote 2:22) Mu mashiwi yambi kuti twatila cilaba bwino nga ca kuti tulesala abantu tulesangwa nabo ne fiba ku cifulo tulesangwako.

IFYO MULINGILE UKUCITA

• Mulecita ifingalenga camwangukila ukucita ifisuma. Ku ca kumwenako, nga ca kuti mulefwaya ukuleka ukulya ifya kulya ifishawama ku bumi, tamulingile ukulasunga ifyo ifya kulya mu ng’anda. Nga mulecita ifi, cikalamwangukila ukukaanalya ifyo ifya kulya.

• Mwilacita ifingalenga camwafya ukucita ifisuma. Ku ca kumwenako, nga ca kuti mulefwaya ukulatukusha umubili ulucelo celo, ilyo mushilalala, mulebikila calimo ifya kufwala pa kuya mu kutukusha umubili. Pa kutendeka kuti cilemwafya, lelo nga mwakonkanyapo ukulacita ifi, tacakulamwafya.

• Mulesala bwino ifibusa. Ilingi line, tutendeka ukucita filya fine ificita abantu abo tusangwa nabo. (1 Abena Korinti 15:33) Kanshi tamufwile ukulasangwa na bantu abengalenga mwalacita ifyo mulefwaya ukuleka, lelo mufwile ukulasangwa na balya abengamukoselesha ukuba ne mibele isuma.

Abantu bamo batila, umuntu pa kuti abeelele ukucita fimo pafwile papita imilungu itatu. Na lyo line, abafwailisha pa fintu basanga ukuti abantu bamo tabakokola ukubeelela ukucita fimo, lelo bambi palapita inshita iikalamba pa kuti babeelele. Bushe mwafuupulwa pa kwishiba ifi?

Tontonkanyeni pali ici: Tutile mulefwaya ukulatukusha umubili imiku itatu mu mulungu.

• Mu mulungu wa kubalilapo, mwatukusha pa nshiku shonse shitatu.

• Mu mulungu wa bubili, mwatukushako fye pa nshiku shibili.

• Mu mulungu wa butatu, mwatukusha na kabili pa nshiku shonse shitatu.

• Pa mpela ya mweshi, mwatukusha fye pa bushiku bumo.

• Mu mulungu walenga 5, mwatukusha umubili na kabili pa nshiku shonse shitatu, kabili ukutula ilyo mwabelela ukulautukusha.

Papitile imilungu 5 pa kuti mubelele ukulatukusha umubili. Nalimo kuti mwamona kwati palipitile inshita iitali pa kuti mubelele ukulatukusha umubili imiku itatu mu mulungu, lelo kulaba ukumfwa bwino sana nga mwalacita ifintu fimo ifisuma ifyo mwalefwaya ukulacita.

Baibolo itweba ukuti twilanenuka. Icacindama te miku tufilwa ukucita ifintu fimo, lelo miku tuibikilishako ukuficita na kabili.

IFYO MWINGACITA

• Mwilamona kwati nga mwabwekeshapo ukucita ifyo mulefwaya ukuleka ukucita nelyo mwafilwa ukucita ifyo mulefwaya ukulacita ninshi calala capwa. Muleenekela ukutila limo mwakulabwekeshapo ukucita ifyo mulefwaya ukuleka nelyo mwakulafilwa ukucita ifyo mulefwaya ukulacita.

• Muletontonkanya sana pa nshita ilyo mwacitile bwino. Ku ca kumwenako, nga mulefwaya ukulalanshanya bwino na bana, muleyipusha amuti: ‘Ni lilali naumfwile kwati ndefwaya ukusasukila abana bandi, lelo nshabasasukile? Finshi nacitile pa kuti nibasasukila? Kuti nacita shani na kabili pa kuti nikabasasukila?’ Ukuipusha aya amepusho kuti kwamwafwa ukubika sana amano ku fyo mulecitamo bwino ukucila mu fyo mushilecita bwino.

Bushe mulafwaya ukwishiba ifyo Baibolo ingamwafwa ukucita pa fintu fimo, pamo nge fyo mwingacefyako amasakamika, ifyo mwingaba ne nsansa mu lupwa, ne fyo mwingacita pa kuba ne nsansa? Landeni ne Nte sha kwa Yehova, nelyo kabiyeni pa webusaiti yesu iya jw.org/bem.