Bushe na imwe mwalitala amutontonkanyapo pa kubelenga Baibolo e lyo mwafilwa ukulaibelenga pa mulandu wa kulaumfwa nga ifyaleumfwa abo tulandilepo pa muulu? Ca cine, abengi balatiina ukubelenga Baibolo. Bushe kuti mwatendeka ukubelenga Baibolo nga ca kuti mwaishiba ukutila kuti yamwafwa ukuba ne nsansa? Bushe kuti mwatendeka ukulaibelenga nga ca kuti mwasanga ukuti kwaliba fimo ifingalenga mwalaumfwa bwino ukulaibelenga?

Natulande pa bantu bamo abanonkelamo mu kubelenga Baibolo.

Ezekiel, uuli ne myaka ukucila pali 20 atile: “Ilyo nshilatendeka ukulabelenga Baibolo nali kwati muntu uulensha motoka, lelo uushishibe uko aleya. Nomba Baibolo yalingafwa ukuba ne nsansa. Mwaliba ifyebo ifingafwa cila bushiku.”

Frieda, uuli ne myaka ukucila pali 20 na o atile: “Nali uwabilima, lelo Baibolo yalingafwa ukuba uwatekanya. Ici calilenga abantu bantemwa kabili nalikwata ne fibusa ifingi.”

Ba Eunice abali ne myaka ukucila pali 50 batile: “Baibolo yalilenga naba ne mibele iisuma.”

Abantu abengi basanga ukuti ukubelenga Baibolo kulabaletela sana insansa, kanshi na imwe kuti mwaba ne nsansa nga mulebelenga Baibolo. (Esaya 48:17, 18) Baibolo na kabili kuti yamwafwa (1) ukulapingula bwino pa fintu (2) ukupanga ifibusa ifisuma, (3) ukucefyako amasakamika na (4) ukwishiba icine pali Lesa, kabili ici e cacindama sana. Nga mulekonka ifyo Baibolo ilanda, ifintu fyakulamuwamina pantu amashiwi yabamo yafuma kuli Lesa. Lesa te kuti atwebe ukulacita ifishili bwino.

Ico mufwile ukucita kutendeka ukulabelenga Baibolo. Finshi mulingile ukucita pa kuti cimwafya ukutendeka ukubelenga Baibolo na pa kuti muleumfwa bwino ukuibelenga?

Kuti mwacita shani pa kuti mutemwe ukubelenga Baibolo, no kunonkelamo sana? Natulande pa fintu 5 ifyayafwa abantu abengi.

Mufwile ukusala ukwa kubelengela ukuli bwino. Mulingile ukusala icifulo ukushili icongo. Takufwile ukuba ifya kumupumfyanya pa kuti mulebika sana amano ku fyo mulebelenga. Uko mulebelengela kufwile ukuba ulubuuto e lyo no mwela uusuma pa kuti muleumfwa bwino ilyo mulebelenga.

Tamufwile ukulabelengela fye ukuti musangemo ifilubo. Apo Baibolo citabo icafuma kuli Shifwe wa ku muulu, ilyo mulebelenga mufwile ukuba nga umwana ulefwaya ukusambilila ku mufyashi uwaba no kutemwa. Nga kwaliba ifyabipa ifyo mwaumfwa pali Baibolo, mufwile ukufilabako ilyo mulebelenga pa kuti Lesa amusambilishe.—Amalumbo 25:4.

Mulepepa ilyo mushilatendeka ukubelenga. Mu Baibolo mwaba amashiwi ya kwa Lesa, kanshi pa kuti tumfwikishe ifyo ilanda kano atwafwa. Lesa alilaya “ukupeela umupashi wa mushilo ku bamulomba.” (Luka 11:13) Umupashi wa mushilo uwa kwa Lesa kuti wamwafwa ukumfwikisha amashiwi ya kwa Lesa. Mu kuya kwa nshita ukalamwafwa no kumfwikisha “ifyashika ifya kwa Lesa.”—1 Abena Korinti 2:10.

Mulebelengela ukumfwikisha ifyo Baibolo ilanda. Tamufwile ukulafwaya fye ukupwisha apo mulebelenga. Mulingile ukulatontonkanya sana pa fyo mulebelenga. Mufwile ukulayipusha amepusho pamo nga aya: ‘Mibele nshi iyo umuntu ndebelengapo akwete? Kuti nabomfya shani ifi nabelenga?’

Ishibeni ico mulebelengela. Pa kuti mulenonkelamo sana ilyo mulebelenga Baibolo, mufwile ukulafwayamo ifyebo ifingamwafwa. Fimo ifyo mwingacita ilyo mulebelenga Baibolo ni ifi: ‘Ukufwaisha ukusambilila sana pali Lesa.’ ‘Ukufwaya ukuba umuntu umusuma, umulume umusuma nelyo umukashi umusuma.’ Lyena kuti mwasala amalembo ya mu Baibolo ayalanda pa fyo mulefwaya ukucita.a

Ifi ifishinka 5, kuti fyamwafwa ukutendeka ukubelenga Baibolo. Nomba finshi mulingile ukucita pa kuti mutemwe ukubelenga Baibolo? Icipande cikonkelepo nacilanda pa fyo mwingacita.

Ifyo mwakulacita pa kubelenga Baibolo e fikalenga mukatemwe ukubelenga Baibolo nelyo iyo. Natulande pa fyo mwingacita pa kuti mutemwe sana ukubelenga Baibolo.

Mulebomfya Baibolo iyapilibulwa bwino kabili umwaba amashiwi ayayanguka ukumfwa. Nalimo te kuti mutemwe ukubelenga Baibolo nga ca kuti mu fyo mulebelenga muli amashiwi ayo tamuleumfwikisha nelyo ayo balebomfya kale. Kanshi mulebomfya Baibolo umwaba amashiwi ayayanguka ukumfwa, iingamufika pa mutima, kabili iyo bapilibula bwino sana.a

Mulebomfya ifya kupangapanga. Muno nshiku kwaliba amaBaibolo ayo bapulinta, ayo mwingabelengela pa Intaneti e lyo nayo mwingakopolwela pa kompyuta, pa tabuleti nelyo pa foni. AmaBaibolo yamo yalakwata ne fyo mwingabomfya pa kumona ifyo ifikomo fimbi fyalanda pa lyashi mulebelengapo nelyo ifyo ico cikomo capilibulwa mu maBaibolo yambi. Apo Baibolo yalibelengwa mu ndimi shimo, nga tamulefwaya ukubelenga kuti mwalakutika kuyo babelenga. Abengi balitemwa ukukutika kuli Baibolo iyo babelenga ilyo bali mu motoka, ilyo balewasha na lintu balebomba imilimo imbi iyo bengabomba ninshi balekutika kuli fimo. Bushe te kuti musalepo inshila imo pali ishi?

Mulebomfya ifingamwafwa ukumfwikisha Baibolo. Kwaliba impapulo ishingamwafwa ukumfwikisha ifyaba mu Baibolo. Ama mapu ayalanga ifyalo ifyo Baibolo yalandapo kuti yamwafwa ukwishiba ififulo balelandapo ilyo mulebelenga Baibolo, kabili kuti fyamwafwa ukwelenganya ifyalecitika. Ifipande pamo nga ifili muli ino magazini nelyo ifiba pa webusaiti ya jw.org/bem, pa mutwe uutila “Amasambilisho ya mu Baibolo,” kuti fyamwafwa ukumfwikisha ifyebo ifingi ifyaba muli Baibolo.

Muleeshako inshila ishalekanalekana. Nga mulemona kwati te kuti mukumemo ukubelenga Baibolo yonse, kuti mwaesha ukutendekelapo ukubelenga amabuuku ayo mwatemwisha. Nga mulefwaya ukwishiba bwino abantu abo Baibolo yalandapo sana, kuti mwaesha ukulabelenga ifyebo ifilanda pali abo bantu. Pa kuti mucite ifi, kuti mwabomfya inshila shibili isho balandilepo mu kabokoshi akaleti, “Amalembo Ayengamwafwa Ukwishiba Bwino Abantu abo Baibolo Yalandapo.” Kuti mwabelenga na pa malyashi yamo aya mu Baibolo nelyo ukubelenga ukulingana ne fyo ifintu fyakonkene ukucitika.

Baibolo yaliibela. Mwaba ukupanda amano ukufuma kuli Kabumba wesu. (2 Timote 3:16) Ifyebo fyabamo kuti fyatwafwa. Na kuba Baibolo itila: “Icebo ca kwa Lesa ca mweo kabili ca maka.” (AbaHebere 4:12) Yalikwata amaka ya kutwafwa ukwishiba ifya kulaikala bwino no kwishiba Lesa e lyo ne fyo atulaya.—1 Timote 4:8; Yakobo 4:8.

Ifyo ingamwafwa ukalaikala bwino. Baibolo yalilanda na pa fintu pamo nga:

• Ifya kumfwana na bantu banensu. —Abena Efese 4:31, 32; 5:22, 25, 28, 33.

• Ifyo mwingacita pa kukwata ubumi ubusuma. —Amalumbo 37:8; Amapinda 17:22.

• Imibele iisuma.—1 Abena Korinti 6:9, 10.

• Pa ndalama.—Amapinda 10:4; 28:19; Abena Efese 4:28.a

Abaupene nomba line aba ku Asia balitemenwe sana ifyo basambilile muli Baibolo. Nga fintu ciba ku bantu abengi nga baupana fye, calibafishe ukulaumfwana no kwishiba ifya kulanshanya bwino. Nomba ilyo batendeke ukucita ifyo balesambilila muli Baibolo ba Vicent, abalume batile: “Ifyo nalebelenga mu Baibolo fyalingafwile ukwishiba ifya kupwisha amafya twalekwata mu cupo. Ukulacita ifyo Baibolo ilanda kwalilenga tuleikala bwino.” Abena mwabo ba Annalou batile: “Ukubelenga pa bantu abalembwa mu Baibolo kwalitwafwa ukulaikala bwino. Pali ino nshita naliba ne nsansa kabili nalitemwa ifyo twikala mu cupo ne fyo tupanga ukucita.”

Ifyo mwingeshiba Lesa. Ba Vicent balandile no kuti: “Ukubelenga Baibolo kwalilenga nalaumfwa sana ukuti Yehova ni cibusa wandi ukucila ifyo naleumfwa kale.” Ifi ba Vicent balandile filanga fye ukuti Baibolo kuti yamwafwa ukwishiba bwino Lesa. Nga mulebelenga Baibolo, mwakulanonkela mu fyo Lesa atweba kabili mukaba cibusa wakwe. Na kabili mukeshiba ukuti alilanda pa fyo ifintu fikaba ku ntanshi, inshita ilyo tukakwata “umweo wine wine,” e kutila inshita ilyo tushakalefwa. (1 Timote 6:19) Takwaba icitabo cimbi icingatusambilisha pali ifi.

Nga mwatendeka ukubelenga Baibolo kabili mwatwalilila ukulaibelenga, mwakulaikala bwino kabili mukeshiba Lesa. Na lyo line, ilyo mulebelenga Baibolo, nalimo mukakwata amepusho ayengi. Na kabili nga mwakwata amepusho mulingile ukupashanya cilolo umwina Etiopia uwaliko imyaka 2000 iyapita. Alikwete amepusho ayengi pali Baibolo. Ilyo bamwipwishe nga alyumfwile ifyo alebelenga, atile: “Bushe kuti naishiba shani, apabula uwa kuntungulula?”b Lyena alisumiine ukuti bamusambilishe Amalembo kuli Filipi uwali umusambi wa kwa Yesu kabili uwaishibe sana ukusambilisha. (Imilimo 8:30, 31, 34) Na imwe nga mulefwaya ukwishibilapo na fimbi pali Baibolo, kuti mwalemba formu iyaba pa www.jw.org/bem nelyo ukulembela ku maofeshi yesu ukubomfya ama adresi ayali muli ino ine magazini. Na kabili kuti mwalanda na ba Nte abekala uko mwikalila nelyo kuti mwaya ku Ng’anda ya Bufumu iyaba mupepi. Tulemukoselesha ukutendeka ukubelenga Baibolo lelo line pa kuti imwafwe ukulaikala bwino.