Ipepo

1 Mulandu Nshi Tulingile Ukupepela?

IPEPO. Muli Baibolo mwaliba amalyashi ayengi ayasuma kabili ayalenga ukuti tulefwaisha ukuyeshiba. Tontonkanyeni pa mepusho 7 ayo abantu bepusha pe pepo; kabili moneni ne fyo Baibolo yasuka aya yene mepusho. Ici cipande e lyo ne fikonkelepo, filembelwe ukuti fimwafwe ukutendeka ukupepa e lyo no kumwafwa ukwishiba ukupepa pa kuti amapepo yenu yaleumfwika.

MWI sonde fye lyonse, abantu ba mitundu yalekanalekana ne mipepele balapepa. Balapepa nga bali beka nelyo nga nabalongana. Balapepa nga bali mu macalici, mu matempele, mu masunagoge, mu fikuulwa fya kupepelamo ifya baShilamu, nelyo mu mfuba. Pa kupepa, nalimo bafukama pali tu mati, bamo babomfya kolona, ifipasho, ututabo balembamo amapepo, nelyo babelenga amapepo ayo balembela limo pa tupampa uto bakobeka pamo.

Ukupepa e kwalenga abantu bapusaneko ne fya mweo fimbi pano calo. Cishinka ukuti abantu ne nama balipalanako mu fintu fimo. Ku ca kumwenako, fwe bantu tulakabila ifya kulya, umwela, na menshi kabili ifi fine e fyo ne nama shikabila. Na kabili nga filya fine caba ku nama, tulafyalwa, tulaba no mweo, kabili tulafwa no kufwa. (Lukala Milandu 3:19) Lelo bantu fye e bapepa. Mulandu nshi?

Icasuko cayanguka ca kutila, tulakabila ukupepa. Na kuba, ipepo e nshila abantu balandilamo na Lesa nelyo fyonse ifyo bamona ukuti fya mushilo kabili fyabako umuyayaya. Baibolo ilanga ukutila Lesa atupangile ukuti tulepepa. (Lukala Milandu 3:11) Inshita imo, Yesu Kristu atile: “Balipaalwa abaishiba ukuti balakabila ifya kwa Lesa.”—Mateo 5:3.

Pa mulandu wa kuti “abantu balakabila ifya kwa Lesa,” e calenga ukuti balekuula ifikuulwa fya mapepo, balepanga no kulenga ifya kubomfya mu mapepo, kabili e co bapoosela ne nshita iikalamba mu kupepa. Lelo abantu bamo tabafwaya ukupepa, baicitila fye ifyo abene balefwaya nelyo bashintilila pa bantu banabo. Lelo bushe tamumona ukuti abantunse te kuti batwafwe muli fyonse ifyo tukabila? Fwe bantunse tuli bena kufwa, twikala fye inshiku ishinono pa calo, kabili tatwishiba ifya ku ntanshi. Uwingatwafwa mu fya kwa Lesa ifyo tukabila, ni uyo uwakwata amano ukucila fwe bantunse, uwakwatisha amaka kabili uushingafwa. Nomba finshi ifi fine ifya kwa Lesa ifyo tukabila ifilenga tulepepa kuli ena?

Tontonkanyeni pali ifi: Bushe tamwabala amufwayapo uwa kumutungulula, ukumupandako amano, nelyo uwa kwasuka amepusho ayo abantu bashingasuka? Nga mwalifwilwapo, bushe tamwabala amufwayapo uwa kumusansamusha, nelyo uwa kumupandako amano ukupingula ica kucita pa cintu icikosele, nangu uwa kumubelela uluse nga mwacita icilubo icamulenga ukumfwa sana ububi?

Baibolo ilanga ukutila, kuti twapepela pali ifi fyonse. Baibolo e citabo icingatusambilisha ifya kupepa kabili mwalilembwa amapepo ya baume na banakashi abengi abali ne citetekelo. Balipepele kuli Lesa pa kuti abasansamushe, abatungulule, ababelele uluse, no kwasuka amepusho ayakosesha ayo bakwete.—Amalumbo 23:3; 71:21; Daniele 9:4, 5, 19; Habakuki 1:3.

Nangu ca kutila aya mapepo yali ayapusanapusana, yonse yalipalene mu cintu cimo. Bonse abayapepele, balishibe icintu icacindama icilenga amapepo ukwasukwa, ico abantu abengi muno nshiku bashaishiba nelyo ico basuula. Ne ci ca kutila, bonse balishibe uo balingile ukupepako.

Ipepo

2 Ni Kuli Ani Tulingile Ukupepa?

BUSHE Lesa alomfwa amapepo ya bantu bonse te mulandu na untu balepepako? Muno nshiku, abengi basumina ukuti Lesa alakutika ku mapepo yonse. Abengi abatontonkanya ifi ni balya abamona ukuti ukupepela pamo na macalici yambi kwaliba fye bwino kabili abatila imipepele yonse isuma te mulandu ne fyo isambilisha. Lelo, bushe ifi batontonkanya kuti fyaba fya bufi?

Baibolo isambilisha ukutila, abantu abengi abapepa, tabapepa kuli Lesa wa cine. Ku numa sana ilyo balelemba Baibolo, abantu abengi balepepa ku filubi. Lelo, libili libili Lesa alebasoka ukukanalapepa ku filubi. Ku ca kumwenako, Amalumbo 115:4-6 yalanda pa tulubi ukuti: “Amatwi twalikwata, lelo te kuti tumfwe.” Ukulingana ne li lembo, bushe batini kuti cabamo amano ukupepa kuli lesa uushingakumfwa?

Ilyashi limo ilyalembwa mu Baibolo lilakosha sana ici cishinka. Kasesema wa cine Eliya aebele bakasesema ba kwa Baali ukuti bapepe kuli lesa wabo, kabili pa numa na o ali no kupepa kuli Lesa wakwe. Eliya atile Lesa wa cine ali no kwasuka ipepo, e lyo lesa wa bufi tali na kwasuka. Bakasesema ba kwa Baali balisumine kabili balipepele icine cine kuli lesa wabo pa nshita iitali. Ilyo balepepa balelila no kulila, lelo tapali icacitike! Baibolo itila: “Takwali ishiwi nangu uwaleasuka nangu uwa kubikako amano.” (1 Ishamfumu 18:29) Nomba cali shani ilyo Eliya apepele?

Ilyo Eliya apepele, apo pene fye Lesa alimwaswike, atumine umulilo ukufuma ku muulu no koca umutuulo uo apekenye. Mulandu nshi Eliya bamwasukile? Kwaliba cimo icacindama icaba mwi pepo apepele icalembwa pali 1 Ishamfumu 18:36, 37. Ili pepo lyali fye ilipi, mu ciHebere lyakwete fye nalimo amashiwi 30. Lelo muli aya yene amashiwi ayanono, Eliya alumbwilemo ishina lya kwa Lesa ilya kuti Yehova imiku itatu.

Baali, uo ishina lyakwe lipilibula ukuti “umwine” nelyo “shikulu,” ali ni lesa wa bena Kanaani, kabili kwali ba Baali abengi. Lelo ishina lya kuti Yehova lyena lyali-ibela, lishina lya kwa Lesa umo fye mpo. Uyu Lesa aebele abantu bakwe ukuti: “Nine Yehova. Ilyo e shina lyandi; nshakapeele ubukata bwandi kuli umbi.”—Esaya 42:8.

Bushe Eliya na bakasesema ba kwa Baali bapepele kuli Lesa umo wine? Ukupepa Baali kwalelenga abantu ukuiseebanya pantu balecita ubulalelale no kutuula amalambo ya bantu. Lelo ukupepa Yehova kwalecindamika abena Israele, pantu bena tabalecita ifya musango uyu. Taleni tontonkanyeni pali ici: Nga mwalilembele kalata ku munenu uwacindikwa sana, mwabikapo ne shina lyakwe, bushe kuti mwaenekela iyo kalata ukuya ku muntu umbi uwakwata ne mibele yabipa? Awe nakalya!

Nga mulepepa kuli Yehova, ninshi mulepepa kuli Kabumba, Umufyashi wa bantu bonse.a Kasesema Esaya apepele ukuti: “Imwe, mwe Yehova, ni mwe Shifwe.” (Esaya 63:16) Uyu wine e Lesa uo Yesu Kristu alelandapo ilyo aebele abasambi bakwe ukuti: “Ndeya kuli Tata, kabili Shinwe, kuli Lesa wandi, kabili Lesa wenu.” (Yohane 20:17) Yehova e Wishi wa kwa Yesu. E Lesa uo Yesu alepepako kabili aebele abasambi bakwe ukulapepa kuli uyu wine Lesa.—Mateo 6:9.

Bushe Baibolo ilatwebapo ukuti tulingile ukupepa kuli Yesu, kuli Maria, ku batakatifu, nelyo kuli bamalaika? Awe, tufwile ukupepa fye kuli Yehova. Moneni imilandu ibili iyo tulingile ukupepela fye kuli ena. Uwa kubalilapo wa kuti, ipepo lubali lwa kupepa Lesa, kabili Baibolo yalanda ukuti tufwile fye ukupepa kuli Yehova epela. (Ukufuma 20:5) Umulandu wa bubili wa kuti, Baibolo itila Lesa ‘alomfwa ipepo.’ (Amalumbo 65:2) Nangu ca kutila Yehova alapeelako bambi imilimo, tapeela nangu umo umulimo wa kukutika ku mapepo. Alaya ukuti umwine e wakulakutika ku mapepo yesu.

Kanshi nga mulefwaya Lesa ukulakutika ku mapepo yenu, muleibukisha aya amashiwi yaba mu Baibolo aya kuti: “Onse uwalilila kwi shina lya kwa Yehova akapusuka.” (Imilimo 2:21) Bushe Yehova alasuka amapepo yonse cikuli fye lipepo? Nelyo bushe kwaliba na fimbi ifyo tufwile ukwishiba nga tulefwaya Yehova ukulakutika ku mapepo tupepa kuli ena?

[Futunoti]

[Icikope pe bula 5]

Filya Eliya aebele bakasesema ba kwa Baali ukucita filanga ukuti te mapepo yonse ayaya kuli Lesa wa cine

Ipepo

3 Bushe Tulingile Ukupepa Shani?

PA KUPEPA, aba mu mipepele iingi babika sana amano ku fintu bengacita, pamo nga ifyo balingile ukwikala nelyo ukwiminina, amashiwi bafwile ukusosa, na fimbi ifyo balingile ukukonka. Lelo ifi fintu te fyo Baibolo ilandapo sana, ilanda pa fintu ifyacindama nga nshi ifyo tufwile ukucita.

Baibolo yalilanda pa babomfi ba kwa Lesa aba cishinka abalepepa. Aba bantu bali ku ncende ishalekanalekana, bamo baleimininako pa kupepa e lyo bambi balefukamako. Ukulingana ne fyo ifintu fyali, bamo balepepela fye mu mutima e lyo bambi bena balepongomoka. Bamo balepunamina mu muulu e lyo bambi balekontamina pa nshi. Pa kupepa, aba bantu tabalebomfya ifipasho, bakolona, nelyo ukulabelenga mu mabuuku, lelo balelanda ifyali mu mutima. Mulandu nshi Lesa akutikile ku mapepo yabo?

Nge fyo tumwene mu cipande cifumineko, balepepa fye kuli Lesa umo, Yehova, epela. Lelo kuliko na cimbi icacindama ico balecita. Pali 1 Yohane 5:14 patila: “Uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.” Amapepo yesu yafwile ukulingana no kufwaya kwa kwa Lesa. Bushe ici cilolele mwi?

Nga tulefwaya ukulapepa ukulingana no kufwaya kwa kwa Lesa, intanshi tufwile ukwishiba ukufwaya kwakwe. Kanshi ukusambilila Baibolo kwalicindama sana pa kuti Lesa alekutika ku mapepo yesu. Bushe ici cilolele mu kuti Lesa akakutika fye ku mapepo yesu nga twasoma Baibolo? Iyo, Lesa enekela ifwe ukusambilila ukufwaya kwakwe, ukwishiba bwino bwino ifyo afwaya, no kulacita ifintu ukulingana no kufwaya kwakwe. (Mateo 7:21-23) Amapepo yesu yafwile ukulingana ne fyo tulesambilila.

Ilyo tulesambilila pali Yehova na pa kufwaya kwakwe, icitetekelo cesu cilakoselako. Icitetekelo na co calicindama sana kabili cilakabilwa pa kuti Lesa alekutika ku mapepo yesu. Yesu atile: “Fyonse ifyo mwalomba ilyo mulepepa, nga muli ne citetekelo, mukapokelela.” (Mateo 21:22) Ukuba ne citetekelo te kusumina fye icisuminesumine. Lelo kupilibula ukusumina mu fintu ifya kuti nangu tafimoneka, fyalikwata ubushininkisho ubulanga ukuti e ko fyaba. (AbaHebere 11:1) Mu Baibolo mwaba ubushininkisho ubwingi nga nshi ubulanga ukuti nangu ca kuti Yehova tamoneka, eko aba, kuti twamucetekela, kabili alasuka amapepo ya bantu abamutetekela. Na kabili, kuti twalomba ukuti atulundileko icitetekelo, kabili Yehova alatupeela ifyo tukabila.—Luka 17:5; Yakobo 1:17.

Kuli na cimbi icacindama ico tufwile ukucita ilyo tulepepa. Yesu atile: “Takuli uwisa kuli Tata kano aishila muli ine.” (Yohane 14:6) Kanshi Yesu e nshila iyo tufwile ukupitilamo pa kupepa kuli Wishi, Yehova. E mulandu wine Yesu aebele abasambi bakwe ukulapepa ukupitila mwi shina lyakwe. (Yohane 14:13; 15:16) Ici tacilepilibula ukuti tufwile ukulapepa kuli Yesu. Lelo, tupepa ukupitila mwi shina lya kwa Yesu, pantu e walenga ukuti tukwate ishuko lya kupepa kuli Shifwe uwa mushilo kabili uwapwililika.

Bushiku bumo, abasambi abo Yesu alesangwa nabo lyonse bamulombele ukuti: “Mwe Shikulu, tusambilisheni ifya kupepa.” (Luka 11:1) Bafwile tabalelomba ukuti abasambilishe ifyo balingile ukupepa, ifi fine twacilalandapo. Lelo balefwaisha ukwishiba ifyo balingile ukupepela. Mu nshila imbi kuti twatila baleti, ‘Finshi tulingile ukupepela?’

[Amashiwi pe bula 6]

Amapepo ayo Lesa akutikako ni yalya aya bantu abamutetekela, ayalingana no kufwaya kwakwe, kabili ayapitila mwi shina lya kwa Yesu

Ipepo

4 Finshi Tulingile Ukupepela?

IPEPO Yesu apepele pa kusambilisha abasambi bakwe ifya kupepa, e pepo ilyo Abena Kristu abengi bapepa libili libili. Na kuba, abengi tabaishiba umo Yesu aloseshe ilyo apepele lilya ipepo, ilyo beta ukuti Ipepo lya kwa Shikulu nelyo Ipepo lya we Shifwe. Abantu abengi nga nshi balisungila lilya ipepo kabili balalibwekeshapo libili libili, maka maka mu nshita ya kasuba. Lelo, umu te mo Yesu aloseshe. Twaishiba shani ifi?

Ilyo ashilabasambilisha ifya kupepa, Yesu atile: “Ilyo ulepepa, wilabwekeshapo ukusosa fimo fine.” (Mateo 6:7) Bushe Yesu alepilika ifyo umwine alandile no kweba abasambi amashiwi ayo bali no kusungila no kulabwekeshapo libili libili? Iyo! Lelo, aletusambilisha ifyo tulingile ukupepela, kabili aletulanga ifintu ifyacindamisha ifyo tufwile ukubikako amano ilyo tulepepa. Natulande sana pa fintu Yesu alandile muli lilya ipepo. Ili pepo lyaba pali Mateo 6:9-13.

“Shifwe wa mu muulu, ishina lyenu libe ilya mushilo.”

Yesu acinkwileko abasambi bakwe ukuti abantu balingile ukupepa fye kuli Wishi, Yehova. Nomba bushe mwalishiba umulandu ishina lya kwa Lesa lyacindamina nga nshi no mulandu lilingile ukubela ilya mushilo?

Ukutula fye pa kutendeka, ishina lya mushilo ilya kwa Lesa balilipontela. Umulwani wa kwa Lesa, Satana, atile Yehova wa bufi, tatemwa abantunse kabili takwata ne nsambu sha kuteka ifyo abumba. (Ukutendeka 3:1-6) Abengi balyumfwila ubufi bwa kwa Satana, basambilisha ukuti Lesa munkalwe, tasakamana abantu, kabili alitemwa ukukanda abantu, e lyo bambi balakaana ukuti te wabumbile ifintu fyonse. Bambi bapata fye ne shina lyakwe, balifumya ishina lya kuti Yehova mu maBaibolo kabili balakaanya na bantu ukulalibomfya.

Baibolo yalanda ukuti Lesa akafumyapo ulu lufyengo lonse. (Esekiele 39:7) Ilyo akacita ifi, akamupeela na fyonse ifyo mukabila kabili akapwisha na mafya mwakwata. Akacita shani ifyo? Amashiwi Yesu akonkeshepo ukusosa muli lilya ipepo yalilondolola ifyo akacita.

“Ubufumu bwenu bwise.”

Muno nshiku, bashimapepo tabaishiba icishinka pa Bufumu bwa kwa Lesa. Lelo nge fyo abalekutika kuli Yesu baishibe, bakasesema ba kwa Lesa balisobele kale sana ukuti Mesia, Umupusushi uwasalwa na Lesa, ali no kuba Imfumu iya Bufumu ubwali no kuwamya ifintu mu calo. (Esaya 9:6, 7; Daniele 2:44) Bukalenga ishina lya kwa Lesa ukuba ilya mushilo lintu bukasansalika ubufi bwa kwa Satana no kumonaula kumo ne milimo yakwe. Ubufumu bwa kwa Lesa bukafumyapo inkondo, amalwele, ifikuko, ukubikako fye ne mfwa. (Amalumbo 46:9; 72:12-16; Esaya 25:8; 33:24) Kanshi nga mulepepa ukuti Ubufumu bwa kwa Lesa bwise, ninshi mulepepa ukuti aya malayo yonse yakafikilishiwe.

“Ukufwaya kwenu kucitwe pano isonde nga mu muulu.”

Amashiwi Yesu asosele yalanga ukuti ukufwaya kwa kwa Lesa nangu cibe shani kukacitwa pano calo nga mu muulu, umo ekala. Takwaba nangu cimo icacilikila ukufwaya kwa kwa Lesa mu muulu; Umwana wa kwa Lesa alilwile inkondo na Satana na bamalaika bakwe no kubapoosa pano calo. (Ukusokolola 12:9-12) Ici icalenga butatu ico Yesu asosele muli lilya ipepo, kumo na filya fibili ifya kubalilapo ifyo tulandilepo, fitwafwa ukubika amano ku fintu ifyacindama nga nshi, e kutila ku kufwaya kwa kwa Lesa, te kufwaya kwesu iyo. Kufwaya kwa kwa Lesa e kuwamina ifibumbwa fyonse. E mulandu wine no muntu uwapwililika Yesu asosele kuli Wishi ukuti: “Ukufwaya kwenu e ko kucitwe, te kwandi iyo.”—Luka 22:42.

“Tupeeleni lelo ifya kulya ifya buno bushiku.”

Amashiwi Yesu akonkeshepo ukusosa yalanga ukuti kuti twapepela na pa fintu ifyo tulekabila. Tacalubana ukulomba kuli Lesa ukuti atupeele ifyo tulekabila pali ubo bushiku. Na kuba, ukucita ifi kutucinkulako ukuti Yehova “e upeela abantu bonse umweo no mupu na fyonse.” (Imilimo 17:25) Baibolo imulondolola ukuti mufyashi umusuma uwatemwa sana ukupeela abana bakwe ifyo balekabila. Na kabili, nga filya fine umufyashi umusuma acita, Yehova na o tapeela abana bakwe ifishingabanonsha.

“Tubeleleni uluse pa membu shesu.”

Bushe mulafwaya ukuti Lesa amwelele imembu? Abengi muno nshiku tabaishiba ulubembu kabili tabamona ukuti ukucita ulubembu kwalibipa. Lelo Baibolo isambilisha ukuti ulubembu e lwalenga amafya yonse ayo tupitamo, pantu e lwalenga ukuti abantu balefwa. Apo tufyalwa ababembu, bonse fye tulabembuka imiku iingi, kabili nga ca kuti fye Lesa atwelela imembu shesu e lyo twingaba no mweo wa muyayaya. (Abena Roma 3:23; 5:12; 6:23) Lelo, aya mashiwi ya mu Baibolo yalatusansamusha, ayatila: “Imwe, mwe Yehova, muli basuma kabili mwali-iteyanya ukwelela.”—Amalumbo 86:5.

“Tupokololeni ku mubifi.”

Bushe mwalishiba ukuti mulakabila ukuti Lesa alemucingilila pali ino ine nshita? Abengi balakaana ukuti “umubifi,” Satana, tabako. Lelo Yesu alesambilisha ukuti Satana e ko aba, kabili alemwita no kuti “kateka wa pano calo.” (Yohane 12:31; 16:11) Satana alilufya abantu aba muli cino calo ico atungulula, kabili alafwaisha no kuti amulufye pa kuti mwikapanga bucibusa na Shinwe, Yehova. (1 Petro 5:8) Lelo Yehova alikwatisha amaka ukucila Satana kabili alatemwa sana ukucingilila abamutemwa.

Aya mashiwi yanono ayalondolola ifyo Yesu alandilepo mwi pepo tayalandile pa fintu fyonse ifyo twingapepela. Mwilaba ukuti pali 1 Yohane 5:14 Lesa bamulondolola ukuti: “Conse ico twalomba, cikulu fye nacilingana no kufwaya kwakwe, alatumfwa.” E ico, mwilamona kwati amafya yenu yanono sana ica kuti te kuti muyalumbule na mu mapepo mupepa kuli Lesa.—1 Petro 5:7.

Inga incende umuntu aliko ne nshita apepelapo, bushe na fyo fyalicindama?

Ipepo

5 Ni Nshita Nshi Tulingile Ukupepa Kabili ni kwi Tulingile Ukupepela?

UKWABULA no kutwishika mwalimona ukuti aba mu mipepele iingi batila abantu bafwile ukuba mu fiyanda fya mapepo kabili balibika ne nshita abantu balingile ukuya mu kupepa. Bushe Baibolo yatila tufwile ukuya fye kuli ifi fiyanda pa kupepa kabili pa nshita iyo babika?

Baibolo ilanga ukuti kwaliba inshita ilyo tufwile ukupepa. Ku ca kumwenako, ilyo Yesu na basambi bakwe bashilalya ica kulya, Yesu alipepele ipepo ilya kutasha Lesa. (Luka 22:17) Na lintu abasambi bakwe balongene mu kulumbanya Lesa, balipepele pamo. Batwalilile ukucita ifyo balecita mu masunagoge ya baYuda na mwi tempele lya mu Yerusalemu. Lesa alefwaya ukuti itempele libe “ing’anda ya kupepelamo aba mu nko shonse.”—Marko 11:17.

Ababomfi ba kwa Lesa nga balongana pamo no kupepela pamo, alakutika ku mapepo yabo. Abali muli ilyo bumba nga basumina muli fimo fine e lyo ne pepo ilyo babapepelako nalilingana ne fyo Baibolo yalanda ati e fyo tulingile ukucita pa kupepa, Lesa alatemwa. Ipepo lya musango yo kuti lyalenga Lesa acita ne fyo ashaciba no kucita. (AbaHebere 13:18, 19) Inte sha kwa Yehova balapepela pamo lyonse nga balongana. Tulemukoselesha ukuyasangwa ku Ng’anda ya Bufumu iyaba mupepi no ko mwikala pa kuti mukayumfwile ifyo bapepa.

Lelo, Baibolo tayatila tufwile ukupepela fye pa ncende imo nelyo pa nshita imo. Mu Baibolo mwaba amalyashi yalanda pa babomfi ba kwa Lesa abalepepa pa nshita iili yonse nelyo ukuli konse uko bali. Yesu atile: “Ilyo ulepepa, ingila mu muputule obe, kabili ilyo waisalako iciibi, pepa kuli Wiso uushimoneka, e lyo wiso uumona umwafisama akakulambula.”—Mateo 6:6.

Mwandini aya mashiwi yasuma! Kuti mwapepa kuli Mulopwe wa bubumbo bonse pa nshita iili yonse, na lintu muli fye mweka, kabili Lesa kuti akutika kwi pepo lyenu. E mulandu wine Yesu ilingi line alefwaila ukuba eka nga alefwaya ukupepa. Bushiku bumo, aikele ubushiku bonse alepepa kuli Lesa. Afwile alefwaya ukuti Lesa amutungulule ilyo alepingula pa cintu icacindeme nga nshi.—Luka 6:12, 13.

Abaume bambi na banakashi abo Baibolo yalandapo balepepa pa kupingula pa fintu ifyacindama nga nshi nelyo nga bali na mafya ayakalamba. Limo balepongomoka pa kupepa e lyo limbi balepepela fye mu mutima; balepepela pamo na bambi e lyo na lintu baleba beka. Lelo icacindama ca kuti balepepa. Lesa aleba na babomfi bakwe ukuti: “Mulepepa ukwabula ukuleka.” (1 Abena Tesalonika 5:17) Lyonse alatemwa ukukutika ku mapepo ya bantu abacita ukufwaya kwakwe. Bushe aya mashiwi tayalelanga ukuti Yehova alitutemwa?

Kwena, muli cino calo, abantu abengi balatwishika nga ukupepa kuti kwa-afwa umuntu. Nalimo kuti mwaipusha ukuti, ‘Bushe ukupepa kuti kwangafwa?’

[Amashiwi pe bula 9]

Kuti twapepa inshita iili yonse kabili ukuli konse uko tuli

Ipepo

6 Bushe Ukupepa Kuti Kwatwafwa?

BUSHE ukupepa kulatwafwa? Baibolo ilanga ukuti ukupepa kulatwafwa. Amapepo ya babomfi ba kwa Lesa aba cishinka yalabafwa. (Luka 22:40; Yakobo 5:13) Na kuba, ukupepa kuti kwatwafwa nga nshi mu fya kwa Lesa, mu matontonkanyo, na ku bumi bwesu fye. Mu nshila nshi?

Natulangilile: Tutile umwana wenu bamupeela ica bupe. Bushe kuti mwamufunda ukuti afwile ukutashisha fye mu mutima? Nelyo kuti mwamufunda ukulaeba abamupeela ubupe ukuti natasha? Nga twalanda ifili ku mutima, tulatendeka ukufitontonkanyapo sana kabili tulacilanapo ukutasha pa fyo batucitile. Ifi fine e fyo ciba na lintu tulelanda kuli Lesa! Moneni ifya kumwenako fyakonkapo.

Amapepo ya kutasha. Nga twatasha Shifwe pa fisuma ifyo atucitila, tulatendeka ukutontonkanya pa fyo atupaala. Icifumamo ca kuti, tulacilapo ukutasha pa fyo atucitila, tulaba ne nsansa, kabili tatusakamikwa.—Abena Filipi 4:6.

Ica kumwenako: Yesu alitashishe pa fyo Wishi alekutika no kwasuka amapepo yakwe.—Yohane 11:41.

Amapepo ya kulomba ukuti atubelele uluse. Nga twalomba ukuti Lesa atubelele uluse, tulakosha kampingu yesu, tulalapila icine cine, kabili tuleshiba bwino ifyo ukucita ulubembu kwabipa. Kabili tulaleka no kuyumfwa aba mulandu pa lubembu twacitile.

Ica kumwenako: Davidi alipepele kuli Lesa pa kulanga ifyo alapiile ne fyo ali no bulanda.—Amalumbo 51.

Amapepo ya kulomba amano no butungulushi. Ukulomba Yehova ukuti atutungulule nelyo ukutupeela amano pa kuti tupingule bwino pa fintu kuti kwalenga twaba abaicefya icine cine. Kuti kwatucinkulako pa fyo tushingacita ku maka yesu kabili kuti kwalenga twatetekela Shifwe wa mu muulu.—Amapinda 3:5, 6.

Ica kumwenako: Solomone ali-icefeshe no kulomba Lesa ukuti amupeele amano no kuti alemutungulula pa kuti aleteka bwino abena Israele.—1 Ishamfumu 3:5-12.

Amapepo tupepa lintu tuli na mafya. Nga ca kutila twaeba Lesa fyonse ifili ku mutima ifiletucusha, tukomfwa bwino, kabili tukashintilila pali Yehova ukucila ukushintilila pa maka yesu.—Amalumbo 62:8.

Ica kumwenako: Imfumu Asa yalipepele kuli Lesa ilyo yalolenkene na balwani aba maka.—2 Imilandu 14:11.

Amapepo tupepelako bambi. Ukupepelako bambi kulalenga ukuti twiba na bukaitemwe, kabili kulalenga tulelangulukilako bambi no kuba aba luse.

Ica kumwenako: Yesu alipepeleko abasambi bakwe.—Yohane 17:9-17.

Amapepo ya kulumbanya Lesa. Nga tulelumbanya Yehova pa mibele yakwe na pa fintu ifisuma ifyo acita, tulacililako ukumupeela umucinshi no kumutasha. Amapepo ya musango uyu kuti yalenga no kuti tupalame sana kuli Lesa wesu kabili Shifwe.

Ica kumwenako: Davidi alelumbanya Lesa pa fyo aabumba.—Amalumbo 8.

Ubusuma na bumbi ubwaba mu kupepa bwa kuti tulakwata “umutende wa kwa Lesa uwacila amatontonkanyo yonse.” (Abena Filipi 4:7) Ukukwata umutende muli cino calo ca mafya lipaalo icine cine. Ukupepa kulalenga umuntu ukuba no bumi ubusuma. (Amapinda 14:30) Lelo bushe kubombesha kwesu ukulenga tube no uyu mutende nelyo kwaliba na cimbi icacindama sana icilenga?

[Amashiwi pe bula 10]

Ukupepa kulatwafwa mu fintu ifingi, mu matontonkanyo, ku bumi bwesu, e lyo maka maka mu fya kwa Lesa

Ipepo

7 Bushe Lesa Alakutika no Kwasuka Amapepo?

ABANTU abengi balafwaisha ukwishiba icasuko kuli ici cipusho. Baibolo ilanga ukuti na muno nshiku mwine, Yehova alakutika ku mapepo. Umuntu umwine e wingalenga Yehova ukukutika kwi pepo lyakwe nelyo iyo.

Yesu akalipile bashimapepo abaliko mu nshiku shakwe abalepepa mu bumbimunda; balefwaya sana abantu balebamona ukuti balilungama. Atile aba bantu bali no ‘kupokelela icilambu cabo conse’ ico balefwaisha, e kutila bali no kupokelela umucinshi ku bantu, lelo tabali na kupokelela icilambu kuli Lesa, e kutila Lesa tali na kukutika ku mapepo yabo. (Mateo 6:5) E fyo na bengi bacita muno nshiku, bapepa ukulingana ne fyo abene balefwaya, te kulingana no kufwaya kwa kwa Lesa. Apo tabakonka ifyo Baibolo yalanda pa kupepa, filya tulandilepo, Lesa takutika ku mapepo yabo.

Inga imwe, bushe Lesa alakutika no kwasuka amapepo yenu? Pa kuti Lesa asuke amapepo yenu tacashintilila pa mushobo wenu, icalo mwafumako, nangu icifulo mwakwata mu bwikashi. Baibolo itweba ukuti: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.” (Imilimo 10:34, 35) Bushe na imwe mulatiina Lesa no kucita icalungama? Nga mulatiina Lesa, ninshi mwalimucindika sana, kabili mulatiina no kumukalifya. Nga mulacita icalungama, ninshi mucita ifyo Lesa amona ukuti fisuma, tamucita ifyo mwe bene mufwaya nelyo ifyo abantu bafwaya. Bushe mulafwaisha ukuti Lesa alekutika ku mapepo yenu? Baibolo kuti yamulanga ifyo mwingapepa kuli Lesa pa kuti alekutika ku mapepo yenu.a

Abantu abengi bafwaya Lesa ukwasuka amapepo yabo apo pene fye, acita ne cipesha amano. Lelo, nangu fye ni kale sana, limo limo fye e lyo Lesa alecita ifipesha mano muli uyu musango. Limo palepita imyaka iingi sana pa kuti kucitike icipesha mano. Na kabili, Baibolo ilangilila ukuti ifipesha amano fyalekele ukucitika ilyo abatumwa bonse bafwile. (1 Abena Korinti 13:8-10) Bushe ninshi ici cilolele mu kuti Lesa alileka ukwasuka amapepo? Awe nakalya! Natulande pa mapepo yamo ayo Lesa asuka.

Lesa alapeela amano. Yehova e ntulo ya mano yene yene. Alapeela amano kuli bonse abafwaya ukuti alebatungulula kabili abafwaya ukuti abapeele amano.—Yakobo 1:5.

Lesa alapeela umupashi wakwe uwa mushilo ne fisabo fya uko. Umupashi wa mushilo maka ayo Lesa abomfya pa kucita ifintu. Takwaba icingacila umupashi wa mushilo amaka. Kuti watwafwa ukushipikisha amesho. Kuti walenga twaba no mutende ilyo tuli na mafya. Kuti watwafwa ukuba ne mibele iisuma nga nshi kabili iingalenga abantu ukututemwa. (Abena Galatia 5:22, 23) Yesu aebele abasambi bakwe ukuti Lesa alapeela sana umupashi wakwe.—Luka 11:13.

Lesa alalenga ukuti abantu abalefwaya ukumwishiba bamwishibe. (Imilimo 17:26, 27) Mu calo fye conse, mwaliba abantu abafwaya sana ukwishiba icine. Balafwaya ukwishiba Lesa, ishina lyakwe, umulandu abumbile isonde na bantu, ne fyo bengacita pa kupalama kuli ena. (Yakobo 4:8) Ilingi line, Inte sha kwa Yehova balasanga abantu ba musango yu kabili balatemwa ukubalondolwela ifyo Baibolo ilanda pali aya malyashi.

Bushe uyu e mulandu mupokeleko iyi magazini? Bushe mulefwaya ukwishiba Lesa? Nalimo ifi fine e fyo Lesa aleasuka ipepo lyenu.

[Futunoti]