Nga Mulefwaya Ukulapashanya Yesu Muleba. . .
ABA LUSE
Apo Yesu aali uwapwililika, talekwata amafya nelyo amasakamika ayo abantu bambi balekwata. Na lyo line, aleumfwila sana abantu uluse. Aleesha sana ukucitila abantu ifisuma. Icalelenga Yesu ukwafwa abantu ni co alebomfwila uluse. Moneni ifya kumwenako fimo fimo mu Fipandwa 32, 37, 57, 99.
MWILAIFINYA
Abantu ba mishinku yalekanalekana, abakalamba na baice, baleya kuli Yesu pantu taleimona ukuti alicila bambi kabili alekwatako inshita ya kuba nabo. Abantu balimwene ukuti Yesu alebabikako amano, kanshi baletemwa ukuba pamo nankwe. Nga mulefwaya ukwishiba ukuti Yesu alebika amano ku bantu, belengeni Ifipandwa 25, 27, 95.
MULEPEPA LYONSE
Yesu lyonse alepepa kuli Wishi ukufuma pa nshi ya mutima ilyo aleba eka na lintu aleba na bakapepa ba kwa Lesa. Alepepa imiku iingi, te pa kulya fye ica kulya iyo. Alepepa amapepo ya kutasha na ya kulumbanya Wishi, e lyo alelomba no kuti alemutungulula ilyo alepingulapo ifya kucita. Moneni ifyo alepepa mu Fipandwa 24, 34, 91, 122, 123.
MWILAITEMWA
Inshita shimo Yesu alekabila ukutuusha, na lyo line pali ishi inshita, talefwaya fye ukucita ifyo umwine alefwaya. Tufwile ukulamupashanya sana mu fyo alecita. Moneni ifyo twingamupashanya mu Fipandwa 19, 41, 52.
MULEELELA
Yesu talesambilisha fye abantu ukuti bafwile ukweleela bambi, lelo na o wine aleelela abasambi bakwe e lyo na bantu bambi. Tontonkanyeni pa fya kumwenako ifili mu Fipandwa 26, 40, 64, 85, 131.
MULEBOMBESHA
Calisobelwe ukuti abaYuda abengi tabaali no kusumina Mesia kabili abalwani bakwe baali no kumwipaya. Kanshi ici cali no kulenga Yesu nalimo alefilwa ukulabombesha mu mulimo wakwe. Na lyo line, Yesu alebombesha mu kusambilisha abantu icine. Ifyo acitile fitusambilisha ukuti tufwile ukulabombesha nangu ca kuti abantu bambi kuti baletucusha. Belengeni Ifipandwa 16, 72, 103.
MULEICEFYA
Yesu alishibe ifintu ifingi kabili ali na mano sana ukucila abantunse abashapwililika. Apo ali uwapwililika, ukwabula no kutwishika ifyo alecita ne fyo aletontonkanya fyalicilile sana ifyo abantu bambi baali. Na lyo line Yesu ali uwaicefya pantu alecitilako abantu bambi ifintu. Kuti mwasanga amasambililo yalanda pa kuicefya mu Fipandwa 10, 62, 66, 94, 116.
MULETEKANYA
Yesu lyonse aletekanishisha abatumwa bakwe e lyo na bantu bambi nga ca kuti bafilwa ukumupashanya nelyo nga bafilwa ukucita ifyo alebeba. Alebwekeshabwekeshapo ukubasambilisha amasambililo yamo pa kuti bengapalama kuli Yehova. Moneni ifya kumwenako ifilanga ukuti Yesu aali uwatekanya, mu Fipandwa 74, 98, 118, 135.