Lesa amutumine pano isonde, Yesu alecita lyonse ukufwaya kwa kwa Lesa. Alishipikishe ubwesho ubukalamba sana, kabili alitwalilile ukuba uwa cishinka kuli Wishi mpaka ne mfwa. (Yoh. 4:34; 15:10) Apo Umwana wakwe ali ne cishinka ukufika fye ne mfwa, Lesa alimubuushishe ku bumi bwa ku muulu kabili alimupeele amaka ya kuba Imfumu ya Bufumu bwa ku muulu. (Imil. 2:32-36) Apo ni Mfumu, Kristu Yesu alikwata umulimo uukalamba uo Lesa amupeela uwa kutungulula ifibumbwa fya kwa Lesa ifya ku muulu, pa kufumyapo imitekele ya bantunse pe sonde e lyo no kufumyapo ububifi bonse. (Amapi. 2:21, 22; 2 Tes. 1:6-9; Ukus. 19:11-21; 20:1-3) Lyena Ubufumu bwa kwa Lesa ubwa ku muulu e buteko bweka fye ubukaba pe sonde, kabili Yesu e mfumu ya ubu Bufumu.—Ukus. 11:15.

UBUSUMA BWABA MU KWISHIBA IMILIMO IYO KRISTU AKWATA

⁸ Yesu Kristu uo tupashanya alipwililika. Balimupeela umulimo uwa kutusakamana. Pa kuti tulenonkelamo mu fyo atusakamana, tufwile ukutwalilila ukuba aba cishinka kuli Yehova, kabili tufwile ukulabombela pamo ne cilonganino cakwe icilelunduluka.

⁹ Abasambi ba kwa Yesu aba kubalilapo balishibe bwino imilimo iyo Lesa apeela Kristu. E calengele ukuti balebombela pamo, e lyo no kulaumfwila Kristu ilyo alebatungulula no mupashi wa mushilo. (Imil. 15:12-21) Umutumwa Paulo alandile pa fyo icilonganino ca Bena Kristu basubwa caikatene. Atile: “Pa kuba abalanda icine, mu kutemwa tukule muli fyonse ukupashanya Kristu uuli e mutwe wesu. Muli ena e mo umubili onse, walundinkana bwino bwino no kulengwa ukubombela pamo mu mfyufyu shonse. E lyo cila cilundwa na co cilabomba umulimo wa ciko pa kuti umubili wikatane kabili umubili onse ulakulilako no kukoselako mu kutemwana.”—Efes. 4:15, 16.

¹⁰ Nga ca kuti bonse mu cilonganino baleumfwana, balebombela pamo, e lyo no kutungululwa na Kristu, icilonganino cilalunduluka kabili mulaba ukutemwana, pantu ukutemwa “e cikakilo cafikapo ica kwikatana.”—Yoh. 10:16; Kol. 3:14; 1 Kor. 12:14-26.

¹¹ Ifilecitika mu calo ifilefikilisha ukusesema kwaba mu Baibolo filanga ukuti ukutula mu 1914, Yesu Kristu balimupeela Ubufumu. Alateka mu kati ka balwani bakwe. (Amalu. 2:1-12; 110:1, 2) Bushe ifi Yesu ateka mu kati ka balwani bakwe filangilila cinshi? Filangilila ukuti nomba line ali no kulanga ukuti ni Mfumu ya shamfumu kabili Shikulu wa bashikulu ilyo akapingula abalwani bakwe. (Ukus. 11:15; 12:10; 19:16) Lyena, ubulayo bwa kwa Yehova ubwa kulubula abakaba ku kulyo kwa kwa Kristu, ubo alandile ilyo Adamu na Efa bamupondokeele mu Edeni bukafikilishiwa. (Mat. 25:34) Ala twalitemwa nga nshi pa kwishiba imilimo iyo Kristu apeelwa ku kufikilisha ubufwayo bwa kwa Lesa! E ico natutwalilile ukuba abaikatana ilyo tulebomba umulimo wa mwi sonde lyonse uwa kubila imbila nsuma, ilyo Kristu aletutungulula muli shino nshiku sha kulekelesha.

AYA AMASHIWI ayo umutumwa Paulo alandile ayalembwa pa AbaHebere 13:7, kuti yapilibulwa no kuti: “Muleibukisha intungulushi shenu.” Ukutula pa Pentekoste mu mwaka wa 33, abatumwa ba cishinka aba kwa Shikulu Yesu Kristu, baali e bumba litungulula ilyaletungulula icilonganino icipya ica Bena Kristu. (Imil. 6:2-4) Ilyo umwaka wa 49 walefika, ninshi Yesu alibwelelamo ku muulu, ili bumba litungulula lyalikulile ica kuti mwali na bashali abatumwa ba kwa Yesu. Ilyo balepingula umulandu wa kusembululwa, mwi bumba litungulula mwali “abatumwa na bakalamba ba mu Yerusalemu.” (Imil. 15:1, 2) Ili bumba litungulula e lyaleafwa Abena Kristu bonse. Lyaletuma amakalata ne fipope ku filonganino, ica kuti ifilonganino fyalekoseleshiwa kabili abasambi balitwalilile ukwikatana mu fyo baletontonkanya na mu fyo balecita. Aba mu filonganino balenakila ibumba litungulula kabili balekonka ifyo lyalepingula, na Yehova alebapaala ica kuti balefulilako.—Imil. 8:1, 14, 15; 15:22-31; 16:4, 5; Heb. 13:17.

² llyo abatumwa bafwile, mu cilonganino mwaishileba abasangu. (2 Tes. 2:3-12) Nga filya Yesu asobele mu cilangililo ca ngano ne fyani. Mu ngano (Abena Kristu basubwa) balitandilemo ifyani (Abena Kristu ba bufi). Ingano ne fyani fyalekulila pamo pa myaka iingi mpaka ne nshita ya kulobolola, e kutila mu nshita ya “ku mpela ya cino calo.” (Mat. 13:24-30, 36-43) Pali iyi inshita, Abena Kristu bonse abasubwa balitwalilile ukutungululwa na Yesu, lelo takwali ibumba litungulula ilyo Yesu alebomfya pe sonde ilya kutungulula abasambi bakwe. (Mat. 28:20) Lelo Yesu alisobele ukuti kukaba ukwaluka mu nshita ya kulobolola.

³ Bushe “umusha wa cishinka kabili uwashilimuka” nani? Pa kwasuka ici cipusho, Yesu ashimike icilangililo umo alandile pa fintu fimo ifyaba mu ‘cishibilo’ ca kuti “icalo cili ku mpela.” (Mat. 24:3, 42-47) Yesu alandile ukuti umusha wa cishinka ali no kulapekanishisha abantu ba kwa Lesa ifya kulya fya ku mupashi “pa nshita yalinga.” Mu nshita ya batumwa, Yesu talebomfya umuntu umo ukutungulula abantu ba kwa Lesa, lelo alebomfya ibumba lya baume. Na muno nshiku sha ku mpela mwine, umusha wa cishinka uo Yesu abomfya te muntu umo iyo.

BUSHE “UMUSHA WA CISHINKA KABILI UWASHILIMUKA” NANI?

⁴ Ni bani abo Yesu asonta ukupeela abasambi bakwe ifya kulya fya ku mupashi? Abo apeela uyu mulimo, Bena Kristu basubwa ababa pe sonde. Baibolo itila aba Abena Kristu ni “bashimapepo” abapeelwa umulimo wa ‘kubila konse konse ubucindami bwa wabetile ukuti bafume mu mfifi bengile mu lubuuto lwakwe ulwapesha amano.’ (1 Pet. 2:9; Mal. 2:7; Ukus. 12:17) Bushe bonse abasubwa ababa pe sonde baba mwi bumba lya musha wa cishinka? Awe. Ilyo Yesu mu cipesha amano aliishishe ibumba lya baume nalimo 5,000, ukufumyako abanakashi na bana abanono, ayakenye ifya kulya no kupeela abasambi bakwe, e lyo abasambi bakwe nabo bapeele amabumba. (Mat. 14:19) Abomfeshe fye abantu abanono pa kuliisha abengi. Na muno nshiku mwine, abo Yesu apeela umulimo wa kupekanya ifya kulya fya ku mupashi, bantu fye abanono.

⁵ Kanshi “kangalila wa cishinka, uwashilimuka” libumba fye ilinono ilya bamunyinefwe abasubwa abapekanya no kusabankanya ifya kulya fya ku mupashi mu nshita ya kuteka kwa kwa Kristu. (Luka 12:42) Muno nshiku sha kulekekesha, aba bamunyinefwe abasubwa ababa e bumba lya “musha wa cishinka kabili uwashilimuka,” babombela pamo pa maofeshi yakalamba aya Nte sha kwa Yehova. Pali lelo, aba bamunyinefwe abasubwa e Bumba Litungulula ilya Nte sha kwa Yehova.

⁶ Kristu abomfya Ibumba Litungulula pa kusabankanya ifyo ukusesema kwa mu Baibolo kulefikilishiwa, na pa kutweba ifyo twingalabomfya amashinte ya mafunde mu mikalile yesu. Tupokelela ifi ifya kulya fya ku mupashi mu filonganino fya Nte sha kwa Yehova. (Esa. 43:10; Gal. 6:16) Mu nshita balelemba Baibolo, umusha uwacetekelwa uwa pa ng’anda nelyo kangalila, e waleangalila ing’anda ya kwa shikulu wakwe. Na muno nshiku mwine, umusha wa cishinka kabili uwashilimuka alipeelwa umulimo wa kwangalila aba mu ng’anda. Kanshi umusha wa cishinka e ulolekesha na pa fikuulwa ne fipe fyonse ifibomfiwa mu mulimo wa Bufumu. Alangalila no mulimo wa kushimikila no wa kupulinta impapulo isho tubomfya, kabili e upekanya no kulongana kukalamba. E wangalila no mulimo wa kusonta bakangalila ababomba imilimo yalekanalekana mu cilonganino ca kwa Lesa pano calo. Iyi milimo yonse ilanonsha aba “mu ng’anda.”—Mat. 24:45.

⁷ Inga “aba mu ng’anda” ni bani? Kuti twatila bonse abalyako ifya kulya fya ku mupashi. Pa kubalilapo, abasubwa e bali fye aba mu ng’anda. E lyo pa numa, ibumba likalamba ilya “mpaanga shimbi” nabo baishileba aba mu ng’anda. (Yoh. 10:16) Aya mabumba yonse yabili yalya ifya kulya fya ku mupashi ifyo umusha wa cishinka asabankanya.

⁸ Mu nshita ya bucushi bukalamba, ilyo Yesu akesa mu kupingula no konaula icalo cabipa, akasonta umusha wa cishinka ukuba kangalila pa “fyuma fyakwe fyonse.” (Mat. 24:46, 47) Ababa mwi bumba lya musha wa cishinka bakapokelela icilambu cabo ku muulu. Bonse ba 144,000, bakapeelwa amaka ayo Kristu bamupeela ku muulu. Nangu ca kuti pano isonde tapakabe umusha wa cishinka kabili uwashilimuka, Yehova na Yesu bakatwalilila ukutungulula abo Ubufumu bwa kwa Mesia bukalateka. Bakalabomfya “bacilolo.”—Amalu. 45:16.

MULANDU NSHI TUFWILE ‘UKULAIBUKISHISHA ABALETUTUNGULULA’?

⁹ Kwaliba ifintu ifingi ififwile ukulenga ‘tuleibukisha abaletutungulula’ no kubacetekela. Mulandu nshi ukwibukisha abaletutungulula kwawamina? Umutumwa Paulo atile: “Pantu balinda imyeo yenu nga bantu abakalubulula; pa kuti bacite ici ne nsansa, te mu bulanda iyo, pantu nga caba ifi kuti camubipila.” (Heb. 13:17) Calicindama ukumfwila no kunakila abaletungulula, pantu balinda imyeo yesu pa kuti tulecingililwa ku fingatufumya kuli Lesa na pa kuti tuleba ne nsansa.

¹⁰ Pali 1 Abena Korinti 16:14, Paulo atile: “Lekeni fyonse ifyo mulecita ficitilwe mu kutemwa.” Ukutemwa e kulenga abaletungulula balepingula bwino pa fintu ifikuma abantu ba kwa Lesa. Pali 1 Abena Korinti 13:4-8, Baibolo ilanda pa kutemwa ukuti: “Mu kutemwa mwaba ukushishimisha ne cikuuku. Mu kutemwa tamwaba ubufuba. Tamwaba ukuitakisha, nangu ukuituumika, mu kutemwa tamwaba ukucita ifishayana, tamwaba ukucita ifya kuisekesha, tamwaba ukukalifiwa. Tamwaba ukusunga ifilubo. Tamwaba ukusekelela pa fishilungeme, lelo mwaba ukusekelela pa cine. Ukutemwa kulasuulako ku fya bubifi fyonse, kusumina fyonse, kusuubila fyonse, kushipikisha fyonse. Ukutemwa takupwa.” Pa mulandu wa kuti abatungulula balaba no kutemwa muli fyonse ifyo bacita, tufwile ukucetekela ukuti bafwaya ifintu filetuwamina. Na kuba, bapashanya Yehova uwaba no kutemwa.

¹¹ Nga filya fine cali mu nshita ya batumwa, abo Yehova abomfya ukutungulula abantu bakwe, baume abashapwililika. Nangu ca kuti tabapwililika, balafikilisha ukufwaya kwakwe nga filya fine caleba na kale. Noa alikuulile icibwato kabili alesoka na bantu pa bonaushi ubwali no kwisa. (Ukute. 6:13, 14, 22; 2 Pet. 2:5) Mose balimupeele umulimo wa kulubula abantu ba kwa Yehova mu Egupti. (Ukufu. 3:10) Yehova abomfeshe abantu abashapwililika ukulemba Baibolo. (2 Tim. 3:16; 2 Pet. 1:21) Kanshi tatufwile ukusuula icilonganino ca kwa Yehova pa mulandu fye wa kuti abomfya abantu abashapwililika