“Kabili Mwafwaya na Bushimapepo?”

8. (a) Kora ali nani? (b) Cinshi napamo icalengele Kora ukutampa ukumwena bashimapepo mu nshila fye ya buntunse?

⁸ Kora tali mukankaala wa ng’anda ya kwa Lebi, kabili tali mukankaala wa ndupwa sha bena Kohati. (Impendwa 3:30, 32) Nangu cibe fyo, aali mukankaala wacindikwa mu Israele. Imilimo ya kwa Kora napamo yalemupalamika sana kuli Aarone na bana bakwe abaume. (Impendwa 4:18, 19) Pa kuimwena ukukanapwililika kwa aba baume, Kora napamo aletontonkanya ati: ‘Aba bashimapepo baleti mfwile ukunakila, bantu bashapwililika icine cine! Tapalepele sana apo Aarone apangile umutepa wa ng’ombe. Ukupepa ulya mutepa wa ng’ombe kwalengele abantu besu ukupepo tulubi. Nomba uyu wine umukalamba wa kwa Mose Aarone, e uli shimapepo mukalamba! Nshatalamona umucisha cinani wa musango yu! Ni shani na pali balya bamwana Aarone, Nadabu na Abihu? Balisaalwile cibi imilimo bapeelwe ukubomba ica kuti Yehova alibepeye!’a (Ukufuma 32:1-5; Ubwina Lebi 10:1, 2) Te mulandu ne fyo Kora aletontonkanya, cilemoneka kwati atampile ukumwena bushimapepo mu nshila ya buntunse. Ico calengele apondokele Mose na Aarone, na kwi pele pele, ukupondokela Yehova.—1 Samwele 15:23; Yakobo 1:14, 15.

9, 10. Milandu nshi Kora na bacipondoka banankwe bapeele Mose, kabili mulandu nshi balingile ukwishibe fintu bwino?

⁹ Apo Kora aali muntu wa maka, tacamukosele ukongola abantu abaletontonkanya nga wene. Wene, pamo na Datani na Abiramu, basangile abantu 250 abalesuminishanya na bo—kabili bonse bene bali bakankaala ba mu lukuta. Baile kuli Mose na Aarone capamo no kutila: “Ulukuta lonse lwa mushilo, bonse bene, na mu kati kabo muli Yehova: nga kanshi cinshi ico muisansabikila pa lukuta lwa kwa Yehova?”—Impendwa 16:1-3.

¹⁰ Aba bacipondoka e balingile ukwishibe ifintu bwino kabili nga tabasonsombele ubutungulushi bwa kwa Mose. Tapalepele sana ukufuma apo Aarone na Miriamu bacitiile ifi fine na bo. Na kuba, ukutontonkanya kwabo na bo iyo nshita kwapalene no kwa kwa Kora! Ukulingana na Impendwa 12:1, 2, baipwishe ati: “Bushe ni kuli Mose eka fye e ko Yehova asosa? bushe tasosa na kuli ifwe?” Yehova alekutika. Aebele Mose, Aarone, na Miriamu ukuyakumana pa mwinshi we hema lya kulaishanya pa kuti Alangilile untu asala ukuba intungulushi. Lyene, Yehova alandile apabuuta tuutu ati: “Nga mwaba kasesema muli imwe, ine Yehova mu fimonwa e mo nengela njishibwe kuli wene, mu filoto e mo nandila nankwe. Te ifyo ku mubomfi wandi Mose; mu ng’anda yandi yonse wene wa cishinka.” Ukukonka pali co, Yehova apamine Miriamu ku fibashi pa nshita iinono.—Impendwa 12:4-7, 10.

11. Bushe Mose acitile shani pa fyabuushishe Kora?

¹¹ Kora na balya balesuminishanya nankwe bafwile balishibe ulwa ici cacitike. Kanshi tabakwete umwa kulesesha pali bucipondoka bwabo. Na lyo line, Mose aeseshe ukupelulushanya na bo mu mutekatima. Abacincishe ukulatasha pa milimo babomba, ati: “Bushe kanono kuli imwe pa kuti Lesa wa kwa Israele amupaatwile mu lukuta lwa kwa Israele ku kumupalamika ku mwine?” Iyo, tacali kantu “kanono”! Abena Lebi kale kale balebomba ifingi. Finshi fimbi bengafwaya? Amashiwi Mose akonkeshepo aya kuti, “kabili mwafwaya na bushimapepo?” yasansalike ukupelulula kwa mu mitima yabo.b (Impendwa 12:3; 16:9, 10) Lelo, bushe Yehova acitile shani pali uku kupondokela abantu alaashile?

Kapingula wa kwa Israele Acilima

12. Ni pali cinshi bucibusa bwasenaminwa na Lesa ubwa bena Israele bwashintilile?

¹² Ilyo Yehova apeele abena Israele Amalango, abebele ukuti nga baba ne cumfwila, bali no kuba “uluko lwa mushilo” kabili uluko lwali no kutwalilila ulwa mushilo kulila fye basumina ukukonka ukuteyanya kwa kwa Yehova. (Ukufuma 19:5, 6) Nomba, apo bucipondoka bwa pa lwalaala bwalitendeke, yali ni nshita ya kuti Kapingula kabili Uwa kupeela Israele ifipope acilime! Mose aebele Kora ati: “Iwe no lukuta lobe lonse mukabe ku cinso ca kwa Yehova, iwe, na bene, na Aarone, mailo. Mukabuule umuntu onse icifutumwino cakwe, mukabikepo ne fya cushi ce fungo, no kupalamika ku cinso ca kwa Yehova umuntu onse icifutumwino cakwe, ififutumwino imyanda ibili na makumi yasano; na iwe, na Aarone, umuntu onse icifutumwino cakwe.”—Impendwa 16:16, 17.

13. (a) Mulandu nshi cabelele kuituntumba kuli balya bacipondoka ukupalamika ifye fungo kuli Yehova? (b) Bushe Yehova abacitile shani bacipondoka?

¹³ Ukulingana ne Funde lya kwa Lesa, ni shimapepo epela e wali no kupalamika ifyanunke cisuma. Kulya kutubulula kwa kuti abena Lebi bashali bashimapepo bapalamike ifyanunke cisuma kuli Yehova nga kwalengele balya bacipondoka ukukutuluka. (Ukufuma 30:7; Impendwa 4:16) Lelo Kora na balemutungilila bena tabakutulwike! Ubushiku bwakonkelepo ‘alengele ulukuta lonse ukukuutanina [Mose na Aarone] ku mwinshi we hema lya Kulaishanya.’ Ifyalembwa fitweba ati: “E lyo Yehova aebele Mose na Aarone, ati, Talukeni mu kati ka lukuta ulu, no kuleka mbapwishe nomba line.” Lelo Mose na Aarone bapaapaatileko abantu ukuti beonaulwa. Yehova alyumfwile ukupaapaata kwabo. Lelo Kora wena ne bumba lyakwe, “umulilo wafumine kuli Yehova no koca abo bantu imyanda ibili na makumi yasano [250] abapalamike ifya cushi ce fungo.”—Impendwa 16:19-22, 35.c

14. Mulandu nshi Yehova aleteele ubupingushi bwaluma pa lukuta lwa Israele?

¹⁴ Lelo ku ca kupapusha, abena Israele abamwene ifyo Yehova acitile balya bacipondoka, tabasambilileko. “Ulucelo ulukuta lonse lwa bana ba kwa Israele bang’wintile Mose na Aarone, abati, Imwe mwaipaya abantu ba kwa Yehova.” Ku ca kupapusha, abena Israele, baletungilila balya bacumyalutwe! Ukutekanya kwa kwa Yehova kwasukile kwapwa. Takwali nangu umo uwali no kupaapaatilako abantu nomba, nangu ni Mose nelyo Aarone. Yehova aletele icikuko pali bacintomfwa, “nomba abafwile ku cikuko bali amakana ikumi na yane ne myanda cinelubali [14,700], pamo na bafwile pa mulandu wa kwa Kora.”—Impendwa 16:41-49.

15. (a) Milandu nshi abena Israele balingile ukusumina ukutungululwa na Mose na Aarone ukwabula no kushingashinga? (b) Bushe ifi fyalembwa cinshi fyamusambilisha pali Yehova?

¹⁵ Aba bantu bonse nga tabafwile no kufwa abapelulula fye bwino pa lwa ilya milandu. Nga baipwishe abene abati: ‘Ni bani bailemoneka pa ntanshi ya kwa Farao no kuibika mu kapoosa mweo? Ni bani bakoselepo pa kuti abena Israele balubulwe? Nani baitile ukunina Ulupili lwa Horebu pa numa ya kulubuka kwa bena Israele no kuyalanda na malaika wa kwa Lesa pa kanwa nkati?’ Cine cine, imilimo ya maka iyabombele Mose na Aarone yali bushininkisho bwa bucishinka bwabo kuli Yehova no kutemwa batemenwe abantu. (Ukufuma 10:28; 19:24; 24:12-15) Yehova tabekelwe ukwipaya balya bacipondoka. Lelo, lintu camoneke fye ukuti abantu bali no kuba aboomankonso mu kupondoka kwabo, alibacitile akantu. (Esekiele 33:11)