Ibuuku lya Imilimo lyabalilapo ukulanda pa milimo umutumwa Petro abombele, e lyo mu kulekelesha lyalanda pa milimo yabombele umutumwa Paulo. Apo Luka alebomfya amashiwi pamo nga “twatile,” “twafwaile,” “ifwe,” cilepilibula ukuti alebako ilyo fimo ifyalembwa muli ili buuku fyalecitika. Ukubika amano ku kubelenga ifyebo fyaba mwi buuku lya Imilimo kukatwafwa ukulashintilila sana pa Cebo ca kwa Lesa na pa mupashi wakwe uwa mushilo. (Heb. 4:12) Na kabili kuti fyalenga twaipeelesha ukulabombela Lesa no mutima onse kabili icitetekelo cesu mwi subilo lya Bufumu cikakoselako.

PETRO ABOMFYA “IMFUNGULO SHA BUFUMU”

(Imil. 1:1–11:18)

Pa numa ya kupokelela umupashi wa mushilo, abatumwa batendeka ukulashimikila ukwabula umwenso. Petro abomfya ‘ulufungulo lwa kubalilapo ulwa bufumu bwa mu muulu’ ku baYuda na ku bena fyalo abalekonka intambi sha baYuda “abapokelele icebo” pa kuti bengaba ne shuko lya kwingila mu Bufumu. (Mat. 16:19; Imil. 2:5, 41) Abasambi basalanganina mu ncende shimbi pantu bacilamo ukubacusha, lelo ici calenga fye ukuti umulimo wa kushimikila ufike ku ncende ishingi.

Ilyo abatumwa mu Yerusalemu baumfwa ukuti abena Samaria nabapokelela icebo ca kwa Lesa, batuma Petro na Yohane ku Samaria. Petro abomfya ulufungulo lwalenga bubili lintu alenga abena Samaria ukukwata ishuko lya kwingila mu Bufumu. (Imil. 8:14-17) Ilyo nalimo umwaka ushilapwa ukutula apo Yesu abuukile, Sauli wa ku Tarsi asanguka Umwina Kristu. Mu 36 C.E., Petro abomfya ulufungulo lwalenga butatu, kabili Lesa apongolwela ica bupe ca mupashi wa mushilo pa bena fyalo abashasembululwa.—Imil. 10:45.

IMILIMO PAULO ABOMBELE

(Imil. 11:19–28:31)

Mu 44 C.E., Agabu aisa ku Antioke, uko Barnaba na Sauli bashimikila pa “mwaka onse uutuntulu.” Agabu asobela ukuti “icipowe cikalamba” cili no kupona, kabili ilyo papita imyaka ibili kwaba icipowe. (Imil. 11:26-28) ‘Ilyo Barnaba na Sauli bafisha ifya kukumbusuka mu Yerusalemu,’ babwelelamo ku Antioke. (Imil. 12:25) Mu 47 C.E., ninshi papita nomba imyaka nalimo 12 ukutula apo Sauli abela Umwina Kristu, umupashi wa mushilo watuma Barnaba na Sauli mu mulimo wa bumishonari. (Imil. 13:1-4) Mu 48 C.E., babwelela ku Antioke, “uko baseekeshiwe ku cikuuku ca bupe fye ica kwa Lesa.”—Imil. 14:26.

Ilyo papita imyeshi 9, Paulo (uo kabili baleita ukuti Sauli) asala Sila ukuti aye nankwe kabili batendeka ulwendo lwa bumishonari ulwalenga bubili. (Imil. 15:40) Pali ulu lwendo, Paulo akumanya Timote na Luka kabili baya nankwe. Luka ashala mu Filipi ilyo Paulo ena atwalilila no bulendo ukuyafika ku Atena na ku Korinti, uko asanga Akula na Priskila kabili aikala na bo umwaka umo ne myeshi 6. (Imil. 18:11) Ku kutendeka fye kwa 52 C.E., Paulo asha Timote na Sila mu Korinti, asenda Akula na Priskila kabili aya nabo ku Suria. (Imil. 18:18) Awe bafuma mu Suria no kuyafika ku Efese, kabili uku kwine e ko Akula na Priskila bashala.

Pa numa ya kwikala panono mu Antioke ya ku Suria, Paulo atendeka ulwendo lwa bumishonari ulwalenga butatu mu 52 C.E. (Imil. 18:23) Mu Efese, “icebo ca kwa Yehova [catwalilila] ukukula no kucimfya.” (Imil. 19:20) Paulo aikalamo imyaka itatu. (Imil. 20:31) Ilyo cilefika mu Pentekoste mu 56 C.E., Paulo ali mu Yerusalemu. Ilyo bamwikata, ashimikila ukwabula umwenso ku balashi. Lintu ali mu Roma, umutumwa Paulo bamwikata no kumulesha ukulafuma pa ng’anda pa myaka ibili (c. 59-61 C.E.), kabili asangako inshila sha kushimikilamo pa Bufumu no kusambilisha “ifya kwa Shikulu Yesu Kristu.”—Imil. 28:30, 31