Bushe AIDS Ikapwa Lilali?

Imisepela ilapokelela ifyebo ifingi pa fya kupanga icupo ilyo bali abaice kabili ifi fyebo fikoselesha ubulalelale. Ukuilasa imiti ikola ku nshindano na ko kwaliseeka sana kabili ni nshila imo abantu bambwilamo akashishi ka HIV. Nga mwatontonkanya pa fyo abantu bacita ifintu lelo ukwabula ukusakamana, kuti mwati fye katwishi no bulwele bwa AIDS nga bukatala abupwa.

BADOKOTA batila inshila yacindama iya kulwishishamo ubulwele bwa AIDS kwafwa abantu ukwalula imisango yabo. Akabungwe ka Centers for Disease Control and Prevention, katila: “Imisepela yonse fye ilakabila ifyebo ifingi lyonse ifingabafwa ukuba ne misango isuma iikabafwa ubumi bwabo bonse ukutaluka ku myendele ingalenga bayambula akashishi ka HIV. Abafyashi na bakasambilisha bafwile ukubombako uyu mulimo wa kusambilisha abaice.”

Kanshi twamona ukuti abafyashi bafwile ukusambilisha abana babo pali aya mafya ilyo abana bashilabepwa ku banabo nelyo ku bantu bambi. Kwena te lyonse ici canguka. Lelo ukucita ifi kuti kwapususha ubumi bwa mwana wenu. Ukusambilisha abana pa fya kupanga icupo ne miti ikola takwakabalenge ukutendeke ukucita ifyabipa. Na kuba kuti kwabafwa ukutwalilila ne misango isuma.

Calicindama Abafyashi Ukufunda Abana

Pa bantu ba kwa Lesa aba ku kale, abafyashi bali no kusambilisha abana babo pa fya kupanga icupo ne fya kucingilila ubumi bwabo. Na kuba, mu mafunde ya bena Israele mwali ne fishinte fyalelanda pa mibele isuma e lyo ne misango imo ifyabacingilile ku malwele. (Ubwina Lebi 18:22, 23; 19:29; Amalango 23:12, 13) Bushe abantu bali no kusambilishiwa shani aya mafunde? Yehova Lesa aebele abena Israele ukutila: “Ifyebo ifi, ifyo ndemweba lelo, fibe mu mitima yenu.” Abafyashi intanshi balekabila ukwishiba ubusuma bwali mu kukonka aya mafunde e lyo ne fibi fyali no kufuma mu kukanacite fyo. Lyene baebelwe ukutila: “Mulefundisha abana benu no mukoosha, mulefisosa na pa kwikala mu mayanda yenu na pa kwenda mu nshila, kabili pa kulaala na pa kubuuka.”—Amalango 6:6, 7.

Ishiwi lya ciHebere ilyo bapilibula ‘mulefundisha no mukoosha’ lyalola mu ‘kubwekeshabwekeshapo,’ ‘ukulandapo libili libili,’ nelyo ‘ukwafwa umuntu ukumfwikisha.’ Kanshi twamona ukuti calicindama ukupaatulako inshita. Abafyashi abapaatulako inshita ukusambilisha abana babo abaume na banakashi pa bubi bwaba mu kubomfya bubi bubi imiti ikola no bulalelale bakafwa abana babo ukukanaipoosa mu micitile iilenga umo ukwambula akashishi ka HIV na malwele yambi.a