Ukunwenapo Ubwalwa na Bumbi

ALLEN atendeke ukunwa ubwalwa ilyo ali ne myaka 11.a Ena na banankwe baleangala sana mu mpanga, balepashanya abantu abo baletamba mu mafilimu. Abantu ba mu mafilimu abo balepashanya bali ba kwelenganya fye, lelo ubwalwa Allen na banankwe balenwa bwena bwali bwa cine cine.

Ba Tony bali ne myaka 40 ilyo batendeke ukulanwesha ubwalwa. Pa kubala, balenwa fye ibotolo limo nelyo yabili cila cungulo, nomba batampile ukunwa amabotolo 5 nelyo 6. Mu kuya kwa nshita, batendeke ukunwa sana ica kuti balilekele no kupenda amabotolo balenwa cila bushiku.

Allen alyeseshe ukusanga inshila ya kupwishishamo ubwafya bwa kunwesha ubwalwa. Ba Tony bena balikeene ukumfwila ifyo balupwa ne fibusa balebeba. Allen na nomba epo aba kabili alashimika ifyamucitikiile; lelo ba Tony bena balifwa, bafwile mu busanso bwa pa musebo pa mulandu wa kuti bale-ensha motoka ninshi nabakolwa icine cine.

Allen, uwalenwa sana ubwalwa, uo twacilandapo mu cipande cifumineko, atile: “Ukukunkuma ku bwalwa takonaula fye umubili wa muntu; lelo kulonaula na matontonkanyo yakwe. Umuntu nga alenwesha ubwalwa, tatontonkanya pa fyo akalifya bambi.”

Allen, uo twacilandapo mu fipande fyafumako, na o pa kubala alekaana ukuti takwete ubwafya bwa kunwesha ubwalwa. Atile: “Nalefisa ku bantu ukuti ndanwa, kabili naleipokolola nga ca kuti pali uulenjeba pa kunwa, naleti nshakwata ubwafya ubuli bonse. Nshalefwaya ukuleka ukunwa ubwalwa.” Nangu ca kuti abantu balimwene ukuti iminwene ya ba Tony ne ya kwa Allen tayaweme, aba babili bena balemona fye kwati tapali icalubene.

Allen, uwasukile aleka ukunwesha ubwalwa pa mulandu wa kusambilila Baibolo ne Nte sha kwa Yehova, atile, “Nalisumina ukuti ino nshita nga nalifwa akubula Baibolo iyangafwile ukuleka ukunwa ubwalwa.”