Ilyo Tuli na Masakamika

8. Fintu nshi fimo ifilenga amasakamika, kabili cinshi amasakamika yengaleta?

⁸ Amasakamika cintu ico tushingasengauka muli shino “nshiku sha kulekelesha.” (2 Timote 3:1) Ca cine ukuti Yesu atile: “Mwisakamikilwa myeo yenu, ico mulelya; nangu mibili yenu, ico mulefwala.” (Luka 12:22) Lelo te lyonse tuba na masakamika pa mulandu wa kwangwa ifya ku mubili. Lote ali no “bulanda” pa mulandu wa bubifi bwali mu Sodomu. ( 2Petro 2:7) Paulo ali na masakamika pa mulandu wa “kusakamane nkuta shonse.” (2 Abena Korinti 11:28) Yesu alishikitike nga nshi ubushiku ilyo kwashele ubushiku bumo ukuti afwe ica kuti “amabe yakwe [yali] nga matoni yakalamba ya mulopa ayaleponena pa nshi.” (Luka 22:44) Kanshi twamona ukuti te masakamika yonse yalanga ukuti tatwakwata icitetekelo cakosa. Lelo, te mulandu ne calenga ayo masakamika, nga yacilamo kabili yasenda sana inshita, kuti yatulenga ukukanaba no mutende. Amasakamika yalinasha bamo, ukubalenga ukumfwa kwati te kuti batwalilile ukubomba imilimo yaba mu kubombela Yehova. Baibolo itila: “Ukusakamana kwa mu mutima wa muntu kulaukontamika.” (Amapinda 12:25) Kanshi cinshi twingacita nga twacushiwa na masakamika?

9. Finshi twingacita ifingatwafwa ukucefyako amasakamika, lelo fintu nshi ifilenga amasakamika ifyo tushingafumyapo?

⁹ Limo limo, kuti nalimo twacitapo fimo ifingatwafwa. Nga ca kuti ubulwele e buletulenga ukusakamikwa, kuti caba bwino ukubusakamana, lelo imilandu ya musango yo tufwile ukuipingwila.a (Mateo 9:12) Nga ca kuti imilimo yatufulila, kuti nalimo caba bwino ukupeelako imo kuli bambi. (Ukufuma 18:13-23) Ni shani kuli balya—nga bafyashi—abakwata imilimo ikalamba iyo bashingapeela bambi. Ni shani ulwa Mwina Kristu uleikala no mwina mwakwe uumukaanya ukupepa? Ni shani pa lupwa ululi mu bwafya bwa ndalama nelyo ulwikala mu cifulo umwaba inkondo? Kanshi twamona ukuti tatwingapwisha fyonse ifileta amasakamika muli buno bwikashi. Lelo, kuti twatwalilila no mutende wa kwa Kristu mu mitima yesu. Kuti twacita shani ifyo?

10. Ni nshila nshi shibili Umwina Kristu engabomfya pa kucefyako amasakamika?

¹⁰ Inshila imo kufwaya icisansamushi mu Cebo ca kwa Lesa. Imfumu Davidi yalembele ati: “Pa kuba ayengi muli ine amatontonkanyo ya kusakamika, ifya kusansamusha fyenu finengo kupekwa.” (Amalumbo 94:19) “Ifya kusansamusha” fya kwa Yehova kuti fyasangwa muli Baibolo. Ukubelenga ici Citabo capuutwamo lyonse kukatwafwa ukuba no mutende wa kwa Kristu mu mitima yesu. Baibolo itila: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” (Amalumbo 55:22) Paulo na o alandile ifyapalako ilyo alembele ati: “Mwisakamikwa nangu kamo, lelo mu fintu fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwapulamo mu kwiluka konse, wakulalinde mitima yenu na mapange yenu muli Kristu Yesu.” (Abena Filipi 4:6, 7) Nga tulepepa lyonse no mukosha tukaafwiwa ukuba no mutende wesu lyonse.

11. (a) Bushe Yesu ali shani ica kumwenako cisuma mu kupepa? (b) Tufwile ukumona shani ipepo?

¹¹ Yesu ali ca kumwenako cawamisha ukukuma kuli ici. Inshita shimo, alelanda kuli Wishi wa ku muulu mwi pepo pa nshita ikalamba. (Mateo 14:23; Luka 6:12) Ipepo lyamwafwile ukushipikisha amesho yabipisha. Ubushiku ilyo ashilaipaiwa, ubulanda bwakwe bwalicililemo. Cinshi acitile? Apepele no “kupimpo kwacila.” (Luka 22:44) Ca cine, Umwana wapwililika uwa kwa Lesa alepepa lyonse. Kanshi calicindama nga nshi ku bakonshi bakwe abashapwililika ukuba no musango wa kulapepa lyonse! Yesu asambilishe abasambi bakwe “ukupepa pe, no kukananenuka.” (Luka 18:1) Ipepo kulanshanya kwa cine kabili ukwacindama no Muntu uwatwishiba bwino ukucila ifyo twaishiba. (Amalumbo 103:14) Nga tulefwaya ukusunga umutende wa kwa Kristu mu mitima yesu, ‘tukapepa no kukanaleka.’—1 Abena Tesalonika 5:17.