Abaume Bafikapo Ukubomba ‘Umulimo Uwalekabilwa’ (Imil. 6:1-6)

17-19. Bwafya nshi ubwingaleta amalekano ubwaimine, e lyo kabili abatumwa bapingwile shani pa kuti bapwishe ubu bwafya?

¹⁷ Muli ici cilonganino icipya nomba mwali ubwafya ubukalamba nga nshi ubwaleleta umwenso. Bwali bwafya nshi? Abengi abasambi abalebatishiwa bali beni mu Yerusalemu e lyo kabili balefwaya ukusambilila ifingi ilyo tabalabwelelamo ku mwabo. Abasambi abaleikala mu Yerusalemu bali-itemenwe ukusangula indalama isha kwafwilishako abaishile muli uyu musumba ukulashitamo ifya kulya ne fintu fimbi. (Imil. 2:44-46; 4:34-37) Pali iyi nshita, kwalimine ubwafya ubwalefwaikwa ukucenjela pa kubupwisha. Pa “kwakanya” ifya kulya, bamukamfwilwa abalelanda iciGriki “tabalebakanyako.” (Imil. 6:1) Nomba bamukamfwilwa abalelanda iciHebere bena, lyonse balebapeela. Kanshi ubwafya bafwile bakwete, kapaatulula. Imilandu imo pamo ngo yu twalandapo kuti yaleta amalekano.

¹⁸ Abatumwa abaleimininako ibumba lyaletungulula ilya cilonganino icaleya cilekula, balimwene ukuti te kuti ciwame kuli bena “ukuleka ukusambilisha icebo ca kwa Lesa no kulayakanya ifya kulya.” (Imil. 6:2) Pa kuti bengapwisha ubwafya, baebele abasambi ukufwaya abaume 7 “abaisulamo umupashi na mano” abo abatumwa bengasonta ukubomba ‘umulimo walekabilwa.’ (Imil. 6:3) Abaume abafikapo balefwaikwa pantu tabali no kulabomba fye umulimo wa kwakanya ifya kulya epela lelo kwali no mulimo wa kusunga indalama, ukushita ifintu, e lyo no kusunga bwino ifyalembwa. Abaume bonse abo basalile bakwete amashina ya ciGriki, nalimo aba bena balibatemenwe kuli bamukamfwilwa abakalipe. Pa numa ya kupepa sana pa kufwaya aba kubomba uyu mulimo, abatumwa basontele abaume 7 aba kubomba ‘umulimo uwalekabilwa.’e

¹⁹ Bushe abaume 7 abo basontele ukula-akanya ifya kulya, balibafumisheko ku mulimo wa kushimikila imbila nsuma? Awe iyo! Pa baume abo basontele pali na Stefani uwali uwashipa kabili kabila wa bukombe uwa maka. (Imil. 6:8-10) Filipi na o wine ali pa baume 7, kabili balemwita ukuti, “kabila wa mbila nsuma.” (Imil. 21:8) Kanshi kuti twatila, abaume 7 bali ni bakabila ba Bufumu abacincila.

20. Bushe abantu ba kwa Lesa muno nshiku bacita shani pa kuti bapashanye abatumwa?

²⁰ Abantu ba kwa Yehova muno nshiku bakonka inshila imo ine iyalebombelamo abatumwa. Abaume abo basala ukubomba imilimo ya cilonganino balingile ukumoneka ukuti balishiba Icebo ca kwa Lesa, balingile no kupeela ubushininkisho bwa kuti balikwata umupashi wa mushilo. Ukulingana no butungulushi bwa Ibumba Litungulula, abaume abakumanisha ififwaikwa fya mu Malembo balasontwa pali bueluda na pa bubomfi butumikila mu filonganino.f (1 Tim. 3:1-9, 12, 13) Abakumanisha ififwaikwa e bo twingalanda ukuti nabasontwa no mupashi wa mushilo. Aba abaume ababombesha balabika amano ku “mulimo uukabilwa.” Ica kumwenako fye, baeluda balabikako amano ku kushininkisha ukuti abakalamba ababombela Lesa ne cishinka pa myaka iingi ba-afwiwa, nga cine cine balefwaikwa ukwafwiwa. (Yako. 1:27) Baeluda bamo balabombako sana umulimo wa kukuula Amayanda ya Bufumu, ukupekanya ukulongana kwa citungu, nangu ukubomba muli komiti ya cipatala. Ababomfi batumikila na bo balabomba imilimo iingi nga nshi iishili ya kusambilisha no kucema umukuni wa kwa Lesa. Bonse aba abaume bafikapo balingile ukushininkisha ukuti imilimo yonse iya mu cilonganino, ne ya mu kuteyanya pamo no kushimikila imbila nsuma iya Bufumu, ilebombwa fye bwino.—1 Kor. 9:16.