Armagedone—Bushe Ikonaula Isonde na Fyonse Ifyabamo?

ARMAGEDONE! Bushe ili shiwi lilenga mwatendeka ukwelenganya ubonaushi ubukalamba nelyo ukwelenganya ukuti ifyaba mu lwelele filepya ku mulilo uukalamba nga nshi? Mu fyalo ifingi, abantu balitemwa ukubomfya amashiwi yamo yamo ayaba mu Baibolo ilyo balelanda, kabili ishiwi lya kuti “Armagedone” e lyo babomfya sana. Abengi babomfya sana ili shiwi ku kulangilila ifyabipa ifili no kucitikila abantunse ku ntanshi. Mu mafilimu, e lyo na pa maTV, balalangisha ifintu ifya kutiinya nga nshi ifilenga abantu ukwelenganya ukuti e fyo na “Armagedone” ikaba. Abengi tabaishiba bwino bwino ifyo ili shiwi lipilibula, kabili ne fyo batontonkanya pali ili shiwi te fya cine. Ilyo abantu balelondolola ifyo Armagedone ipilibula, balalanda ifintu ifingi nga nshi, lelo ifyo balanda fyalipusana sana ne fyo Baibolo—umo ili line shiwi lyalembwa—isambilisha.

Apo Baibolo ilosha kuli Armagedone ukuti e “kupwa kwa pano isonde,” bushe tamulesumina ukuti kanshi nacicindama sana ukwishiba bwino bwino ifyo ili shiwi lipilibula? (Mateo 24:3, The Bible in Bemba, 1956) Na kabili, bushe tacilimo amano ukuti mufwailishe mu Cebo ca kwa Lesa umwaba icine pa kuti mwishibe bwino bwino ifyo Armagedone ikaba, ne fyo ikacitila imwe capamo no lupwa lwenu?

Nga mwafwailikisha, mukasanga ukutila Armagedone tayakonaule isonde na fyonse ifyabamo, lelo e ikalenga kukabe imikalile isuma ku bantu abafwaya ukwikala bwino mwi sonde lipya ilyalungama. Mwalanonkelamo sana kabili mwalaumfwikisha icine cacindama ica mu Malembo ilyo mwalabelenga icipande cikonkelepo icilelondolola bwino bwino ifyo Armagedone ipilibula.

Armagedone—Ikaleta Imikalile Isuma

ISHIWI lya kuti “Armagedone” lyafuma kwi shiwi lya ciHebere ilya “Har–Magedone,” nelyo “Ulupili lwa Megido.” Ili shiwi lisangwa pa Ukusokolola 16:16, apatila: “Fyashilonganike ku cifulo iciitwa mu ciHebere Armagedone.” Bushe ni bani abakalonganikwa ku Armagedone, kabili mulandu nshi? Pa cikomo citangilileko, e kutila pa Ukusokolola 16:14, tubelengapo ukutila: “Ishamfumu sha pe sonde lyonse,” nashilonganikwa “ku nkondo ya bushiku bukalamba bwa kwa Lesa Uwa maka yonse.” Nga fintu fye twingenekela, aya mashiwi yalalenga abantu ukwipusha amepusho yalekanalekana ayasuma nga nshi. Bushe ishi “shamfumu” ni kwi shikalwila? Nga mulandu nshi kukabela iyi nkondo, kabili ni bani shikalwa na bo? Bushe ishi shamfumu shikabomfya ifyanso fya maka ifikalofya imyeo ya bantu abengi sana, nga fintu bamo batontonkanya? Bushe kukaba abakapusuka pa Armagedone? Lekeni Baibolo yasuke aya mepusho.

Bushe filya balumbula “Ulupili lwa Megido,” calola mu kuti inkondo ya Armagedone ikabela pa lupili lumo ifi ulwa ku Middle East? Awe. Ica ntanshi fye, takwaba ulupili ulo beta ati Megido, nangu fye ni pa ncende apali Megido kale sana, tapaba no lupili, paba fye akapili akanono akalepa bamita 20 akabela lwa mupepi ne lungu. Na kabili, iyi ncende ya Megido inono sana ica kuti “ne shamfumu sha pe sonde ne milalo ya shiko” te kuti shikumane. (Ukusokolola 19:19) Nangu cibe fyo, ukulingana ne lyashi lya kale ilya ku Middle East, pali yi ncende ya Megido e po balelwila inkondo sha lukaakala icine cine kabili isha kapeleko. E ico kanshi, ishiwi lya kuti Armagedone lipilibula ukulwa kwa kapeleko lelo umo fye e wa kucimfya.—Belengeni ifili mu mukululo uuleti “Megido—Icilangililo Calinga,” pe bula 5.

Inkondo ya Armagedone te kuti ibe ni nkondo ya fyalo fya pano isonde, pantu Ukusokolola 16:14 kutila “ishamfumu sha pe sonde lyonse” shalyumana akapi no kupanga ibumba ilya kulwisha Lesa pa “nkondo ya bushiku bukalamba bwa kwa Lesa Uwa maka yonse.” Mu kusesema kwakwe ukwapuutwamo, Yeremia atile, “mu bushiku ubo indase sha kwa Yehova shikabapo” na bakepaiwa “bakaba ukufuma ku mpela imo iya pano isonde ukufika ku mpela ibiye iya pano isonde.” (Yeremia 25:33) Kanshi, Armagedone te nkondo ya bantunse iikaba fye ku cifulo cimo ku Middle East iyo. Lelo, ni nkondo ya kwa Yehova, kabili ikakumana fye isonde lyonse.

Moneni no kuti, pa Ukusokolola 16:16, Armagedone baita ati ‘icifulo.’ Muli Baibolo, ishiwi lya kuti ‘icifulo,’ limo kuti lyapilibula ukuti kuli icintu cimo icilecitika, ne cilecitika apa ca kuti abantu mu calo conse bakekatana ukulwisha Yehova. (Ukusokolola 12:6, 14) Pa Armagedone inko sha pe sonde shonse shikoomana akapi ku kulwisha “imilalo ya mu muulu” iitungululwa na mushika mukalamba Yesu Kristu, “Imfumu ya shamfumu kabili Shikulu wa bashikulu.”—Ukusokolola 19:14, 16.

Bushe filya bamo batila Armagedone ikaba ni nkondo iyo bakabomfya ifyanso fyakwatisha amaka ifingalofya imyeo ya bantu abengi sana, nelyo filya batila ikaba kupunkana kwe sonde ne fyaba mu lwelele, bushe kwena fya cine? Bushe kwena Lesa wakwata ukutemwa kuti asuminisha icabipa umusango yo ukonaula abantunse bonse capamo ne sonde lintu bekalamo? Awe iyo. Alilanda mu kulungatika ukutila talengele icalo ‘icimfulumfulu,’ lelo “acibumbile ku kwikalwamo.” (Esaya 45:18; Amalumbo 96:10) Kanshi pa Armagedone, Yehova takonaule isonde ku mulilo uukalamba, lelo, ‘akonaula abaleonaula isonde.’—Ukusokolola 11:18.