Ukubinda Umulimo Wesu

Pa Cibelushi, pa January 18, 1941, abalashi ba Buteko baishile kwi ofeshi linono muli bamotoka bakalamba nalimo 6 ku kupoka icikuulwa. Apo nalebombela mwi ofeshi mufikila abeni pa Bethel, nine nabalilepo ukubamona. Amaawala nalimo 18 mu kubangilila, balitwishibishe ukuti umulimo wesu naubindwa, e co impapulo ishingi na mafaelo fyalifumishiwe mu maofeshi yanono. Umulungu wakonkelepo, abaume basano abalebomba pa Bethel, ukusanshako Lloyd, babikilwe mu cifungo.

Ulupwa lwa Bethel lwakuukile kwi ofeshi lyabelele ku Strathfield mu May 1942 kabili lwaleikala mu mayanda ya bamunyina. Balekuukakuuka ilyo papita imilungu pa kuti bakapokola beishiba uko bali. Ilyo ine na Lloyd twabwelele ku Bethel mu August, twatendeke ukubombela pamo nabo mu ng’anda baleikala. Umulimo twalebomba akasuba wa kupulinta mu bumfisolo ukubomfya bamashini. Lelo, mu June 1943, umulimo wesu walisuminishiwe.